پارلامەنت • 13 مامىر، 2021

ارمەنيا مەن قىرعىزستاننىڭ كەدەندىك باجدارىنا قاتىستى زاڭ قابىلداندى

27 رەت كورسەتىلدى

سەناتورلار ارمەنيا مەن قىرعىزستاننىڭ كەدەندىك باجدارىن ەاەو مولشەرلەمەسىنە كەزەڭ-كەزەڭىمەن ينتەگراتسيالايتىن زاڭدار قابىلدادى، دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ. 

سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وندا دەپۋتاتتار «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا ارمەنيا رەسپۋبليكاسىنىڭ قوسىلۋى تۋرالى 2014 جىلعى 10 قازانداعى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» جانە «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋىنا بايلانىستى قىرعىز رەسپۋبليكاسىنىڭ 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتتى، ەۋرازيالىق ەكونوميكالىق وداقتىڭ قۇقىعىنا كىرەتىن جەكەلەگەن حالىقارالىق شارتتاردى جانە ەۋرازيالىق ەكونوميكالىق وداق ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى 2015 جىلعى 8 مامىرداعى حاتتاماعا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭداردى قاراپ، قابىلدادى.

بۇل زاڭدار ارمەنيا مەن قىرعىزستاننىڭ كەدەندىك باجدارىن ەاەو بىرىڭعاي كەدەندىك ءتاريفىنىڭ مولشەرلەمەسىنە كەزەڭ-كەزەڭىمەن ينتەگراتسيالاۋعا مۇمكىندىك بەرەدى. سوعان بايلانىستى ەكى مەملەكەت ءۇشىن وتپەلى كەزەڭ 1 جىلعا نەعۇرلىم سەزىمتال تاۋارلارعا قاتىستى ەاەو ءتاريفىن تولىق يمپلەمەنتاتسيالاۋعا دەيىن ۇزارتىلادى.

«بۇگىن قابىلدانعان زاڭدار قىرعىز جانە ارمەنيا رەسپۋبليكالارىنىڭ اۋماقتارىنا ءۇشىنشى ەلدەردەن اكەلىنەتىن بىرقاتار تاۋار تىزبەسى بويىنشا كەدەندىك-تاريفتىك رەتتەۋ سالاسىن قامتيدى. ناقتى ايتقاندا، بۇل ەلدەر ەۋرازيالىق ەكونوميكالىق وداق شەڭبەرىندە قاراستىرىلعان ۋاقىتشا جەڭىلدىكتەردى الەۋمەتتىك-ەكونوميكالىق جاعدايعا بايلانىستى ءبىر جىلعا ۇزارتۋدى سۇراعان. وتىنىشتەر ءتيىستى دەڭگەيدە قولداۋ تاپتى. جالپى، بۇل زاڭدار ەۋرازيالىق ەكونوميكالىق وداق اياسىنداعى ارىپتەستىك پەن ىنتىماقتاستىق قاتىناستاردى نىعايتۋعا وڭ سەپتىگىن تيگىزەدى دەپ سەنەمىز»، دەدى ماۋلەن اشىمباەۆ.

سونىمەن قاتار وتىرىس بارىسىندا سەناتورلار دەپۋتاتتىق ساۋالدارىن جولدادى. اقىلبەك كۇرىشباەۆ تۇقىم شارۋاشىلىعى جانە سەلەكتسيالىق عىلىم سالاسىنداعى وزەكتى ماسەلەلەردى كوتەرسە، ءالىمجان قۇرتاەۆ ازاماتتاردىڭ وڭتۇستىكتەن سولتۇستىككە كوشۋ باعدارلاماسىن ىسكە اسىرۋ كەزىندەگى پروبلەمالارعا نازار اۋداردى.

 

سوڭعى جاڭالىقتار

ۇقساس جاڭالىقتار