ەل ىشىندەگى ەڭسەلى تىرلىكتى, سۇتتەي ۇيىعان ۇيىمشىلدىقتى كورگەندە كوڭىلىڭ كوپ-كورىم ءوسىپ, ساتىمەن ساباقتالعان ساۋلەلى ىستەرگە جۇرەگىڭ جىلىپ قالادى ەكەن. نەسىن ايتاسىز, ەل ىشىندە بىرلىك بار ەكەن, مىقتى ەكەن. ادامداردىڭ ءبىر-بىرىنە اق ادال نيەتىمەن قامقور بولىپ, قىسىلىپ قينالعان ساتتە قوس قولتىعىنان دەمەپ تۇرۋعا ۇمتىلۋىنىڭ ءوزى – ءبىر ءسۇيىنىش. وسى ءبىر ىزگىلىك نۇرىن, شاپاعات شۋاعىن شاشاتىن ادەمى دە ايشىقتى مىسالداردى كورگەن سايىن جان جۇرەگىڭدى ريزاشىلىق سەزىم بۋىپ, كوكىرەگىڭ ۋىلجىپ كەتەدى.
ستەپنوگور قالاسىنداعى كاسىپورىندار كارانتين كەزىندە 57 ملن تەڭگەگە جۋىق قارجى اۋدارىپ, كوپبالالى جانە الەۋمەتتىك جاعىنان از قامتىلعان وتباسىلارىنا, جالعىزىلىكتى, مۇمكىندىگى شەكتەۋلى ادامدارعا كومەك كورسەتىپتى. ولار ەمدەۋ ورىندارىنا وتتەگىمەن تىنىستاۋ اپپاراتتارىن, قورعانىس قۇرالدارىن, ازىق-ت ۇلىكتى ساتىپ اپەرگەن. ماسەلەن, وسى قالاداعى ەمحاناعا قايىرىمدى جاندار 3,9 مىڭ قورعانىس قۇرالدارىن, 15,5 مىڭ بەتپەردە, 1,4 مىڭ قورعانىس كوستيۋمى ءتارىزدى زاتتاردى سىيعا تارتىپتى. ال «ەپك ستەپنوگورسك» اق, «استانا نان كەميكالز», «سگحك» سەرىكتەستىكتەرى مەن «ستەپنوگورسك گورۆودوكانال» كاسىپورنى, شاعىن جانە ورتا بيزنەس, ءدىني ۇيىمداردىڭ وكىلدەرى جامان تۇماۋ ايرىقشا ءورشىپ تۇرعان ۋاقىتتا الەۋمەتتىك جاعىنان از قامتاماسىز ەتىلگەن وتباسىلار مەن جالعىزىلىكتى جانداردىڭ ءتىزىمىن جاساپ, قاجەتتى ءدارى-دارمەكپەن, ازىق-ت ۇلىكپەن قامتاماسىز ەتىپ, ماتەريالدىق كومەك كورسەتكەن.
«قازاقالتىن تەحنولودجي» سەرىكتەستىگىنىڭ قولداۋىمەن اقسۋ كەنتىندە قۇنى 14,7 ملن تەڭگە تۇراتىن, زاماناۋي جابدىقتارمەن تولىق قامتاماسىز ەتىلگەن سپورت الاڭى سالىندى. بەستوبە كەنتىنىڭ «راۋان» مادەنيەت ءۇيىنىڭ جانىنداعى 5 ملن تەڭگەگە جابدىقتالعان, وسىنداي جاناشىرلىقتىڭ ارقاسىندا بوي كوتەرگەن ءاپ-ادەمى سپورت الاڭى حالىققا قىزمەت ەتىپ تۇر.
قاۋىپ قانشالىقتى بۇيىردەن قىسىپ, توبەدەن ءتونىپ تۇرسا دا, ەل تىرشىلىگى توقتاعان ەمەس. جۇرت قامىن ويلاعان جاقسى مەن جايساڭ بىرلىكتى بەكەمدەۋگە, ەلدىڭ الەۋمەتتىك-تۇرمىستىق جاعدايىن جاقسارتۋعا بىلەك بىرىكتىرىپ, اتسالىسىپ جاتىر. ايتالىق, قالاداعى «قازاقالتىن تەحنولودجي» كومپانياسى شاعىن قالانى شىرايلاندىرىپ, اباتتاندىرۋ تۋرالى باستاما كوتەردى. ناتيجەسىندە, 15 شاعىن اۋدان كوپ-كورىم كوركەيىپ قالدى. اتالعان كومپانيا وسى ورايداعى وڭدى شارۋانى ىسكە اسىرۋ ءۇشىن 25 ملن تەڭگە قاراجات ءبولدى.
اسىلىندا تۋعان جەرگە دەگەن پەرزەنتتىك ماحاببات كەز كەلگەن قيىندىقتى جەڭەدى. بۇل ولكەنىڭ ادامدارى دا تۋعان توپىراقتارىنىڭ كۇن وتكەن سايىن گۇلدەنىپ, اجارلانۋىنا اتسالىسۋدا. بەستوبە كەنتىنىڭ تۇرعىندارى ۇيىمداسىپ, 2 ملن تەڭگەگە زاماناۋي بالالار الاڭىن ورناتىپ بەردى. قازىر بەستوبەنىڭ بالالارى كارانتين تالاپتارىن ساقتاي وتىرىپ, سپورتپەن شۇعىلدانۋدا. ولار اعا تولقىننىڭ جاناشىرلىعىن جاقسى تۇسىنەدى. كۇنى ەرتەڭ وزدەرى دە وسىنداي شاراپاتتى شارۋاعا بەل بۋىپ ارالاسىپ جاتسا, بۇگىنگى كۇنى كورگەن ونەگەنىڭ ءورىسى دەپ قابىلداۋعا بولار. اۋىزبىرشىلىگى مىقتى جەردە جەكەلەگەن ادامدار دا كەڭپەيىلىمەن تانىلۋدا. ايتالىق قالا تۇرعىنى گ.ابىلشەنوۆ قانىش ساتباەۆ كوشەسىن جارىقتاندىرۋ جۇمىستارىن قولعا الدى.
قالالىق ءماسليحاتتىڭ دەپۋتاتتارى دا اۋىرتپالىقتى يىقتاسا كوتەرۋدە ۇلگى بولۋدا. ولار كوپبالالى, الەۋمەتتىك جاعىنان از قامتاماسىز ەتىلگەن وتباسىلار مەن جالعىزىلىكتى جانداردى ءوز قامقورلىقتارىنا الىپ وتىر. ءماسليحات دەپۋتاتى ا.قارشەگەنوۆ 561 500 تەڭگە بولسە, ارىپتەستەرى و.جاعىپاروۆ 110 مىڭ تەڭگە, د.بالپانوۆ 75 مىڭ تەڭگە, وبلىستىق ءماسليحاتتىڭ دەپۋتاتتارى ب.ناۋرىزباەۆا
80 مىڭ تەڭگە, ج.كامەليدەنوۆ
70 مىڭ تەڭگە قاراجات بولگەن. ءبىر ايتا كەتەرلىگى, وسى ءبىر يگىلىكتى ىستەن حالىق قالاۋلىلارىنىڭ ەشقايسىسى شەت قالماپتى. بارلىعى ءبىر ادامداي حال-قادىرىنشە قارجى جيناپ, كومەك كورسەتكەن. ەڭ باستىسى, وسىنداي جاناشىرلىق ءىس الداعى ۋاقىتتا دا جالعاسىن تابادى.
«اناعا كومەك» كوپبالالى انالاردى قولداۋعا ارنالعان ەرىكتىلەر قوزعالىسىنا باسشىلىق جاساعان گ.بايماقوۆا قالانىڭ جۇزدەگەن تۇرعىنىنا ماسكا مەن قورعانىس قۇرالدارىن تەگىن تاراتقان. ولار وسى ءبىر قيىن ساتتە كوپبالالى انالاردى قامقورلىقتارىنا الىپ, كۇنكورىستەرىن نازاردان تىس قالدىرمايدى. جەكەلەگەن كاسىپورىن باسشىلارى دا ەل ىشىندەگى تىنىس-تىرشىلىكتى قاداعالاپ وتىر. جۇرتتى جاقسىلىق ىسكە جۇمىلدىرۋعا Jas Otan جاستار قاناتى دا ۇيىتقى بولۋدا. ولار قاراجات جيناپ, قاجەتتى ءدارى-دارمەكتى ساتىپ الىپ, ەمحانادا تىركەۋدە تۇرعان سوزىلمالى سىرقاتى بار ادامدارعا مەكەنجايلارى بويىنشا جەتكىزىپ بەرۋدە. پارتيا ارداگەرى ن.رۋكاۆتسوۆا 35 مىڭ تەڭگە, م.ناۋكەۆ 60 مىڭ تەڭگە قاراجاتىن وسىنداي ىزگىلىكتى ىسكە جۇمساسا, وزگە دە ا.بەلباساروۆا, ر.سەميكين ءتارىزدى ارداگەرلەر جومارتتار قاتارىنان تابىلعان. اعا ۇرپاقتىڭ بۇل ءىسى ومىرشەڭ ونەگەنىڭ ءورىمى دەپ قالاي ايتپايسىز.
جالپى, شاعىن قالادا ءبىر-بىرىنە سەلبەسىپ, كومەك قولىن سوزۋ مىسالى وتە كوپ. ۇجىم باسشىلارى دا قالىپتاسىپ وتىرعان جاعدايدى جەتە ءتۇسىنىپ, قامقورلىقتارىن كۇشەيتە تۇسكەن. قۋاتى مول كاسىپورىندارمەن بىرگە شاعىن كاسىپ يەلەرى دە ورتاق ىسكە اتسالىسۋدا. وسى ورايدا چ.بەيسەنبەكوۆ, گ.ورالبەكوۆا, گ.بۇركىتباەۆ, س.رۋتسكي, ن.اندريەنكو ءتارىزدى جەكە كاسىپكەرلەردى ايتا كەتۋگە بولادى. بۇدان وزگە دە جاقسىلىق جاساۋعا ۇمتىلىپ تۇراتىن جانى جايساڭ ازاماتتار از ەمەس.
اتىمتاي جومارتتىق وسىندايدا تانىلسا كەرەك. «ستەپنوگورسك-ەنەرگوكومپلەكس» سەرىكتەستىگىنىڭ باس ديرەكتورى ا.قارشەگەنوۆ 15 كوپبالالى جانە الەۋمەتتىك جاعىنان از قامتىلعان وتباسىن تۇراقتى قامقورلىعىنا الىپ وتىر. «Organik FOOD» سەرىكتەستىگىنىڭ ديرەكتورى گ.بالپانوۆ تا ءدال وسىنداي كومەك كورسەتۋدە. «گمك قازاقالتىن» اكتسيونەرلىك قوعامى 210 كوپبالالى جانە الەۋمەتتىك جاعىنان از قامتىلعان وتباسىنا 2 ملن تەڭگە كولەمىندە جاردەم جاساعان. ەل ىشىندەگى تىرلىكتى, ەشكىمدى جۇدەپ-جاداتپايمىز دەگەن بەكەم بىرلىكتى كورگەننەن كەيىن «استانا-نان Chemicals» سەرىكتەستىگى 200 مىڭ تەڭگە قاراجاتىن ءبولىپ, جالعىزىلىكتى جانداردى جەبەگەن.
قالاداعى پاڭ نۇرماعامبەت اتىنداعى مەشىت كومەكتى قاجەت ەتەتىن ادامدارعا 420 كيلو ەت, 10 توننا كومىر, 154 ازىق-ت ۇلىك سەبەتتەرىن جەتكىزىپ بەرسە, 280 مىڭ تەڭگە قاراجاتتى اقشالاي ۇلەستىرگەن. قىرىققۇدىق اۋىلىنىڭ تۇرعىندارى اۋىلداعى جاستاردىڭ تىلەگىن ەسكەرە وتىرىپ, جارتى ملن تەڭگە قارجى جيناپ, ءوز ەلدى مەكەندەرىندە جاتتىعۋ زالىن سالىپ العان.
بۇل قالاداعى قايىرىمدىلىق ىستەردىڭ ءبىر پاراسى عانا. ءتىپتى, ءبارىن ايشىقتاي جازۋ مۇمكىن ەمەستەي. ءبىز ونداعان ۇلت قۇتتى قونىس ەتكەن شاعىن قالانىڭ جاناشىرلىقپەن ساۋلەلەنگەن شىرايىنىڭ ءبىر ۇشقىنىن عانا تىلگە تيەك ەتتىك. لايىم جاقسىلىق شىنارى وسىنداي لەپپەن تامىرىن تەرەڭگە جايا بەرگەي!
اقمولا وبلىسى,
ستەپنوگور قالاسى
