ەۋروپالىق كوميسسيانىڭ ۆيتسە-پرەزيدەنتى – ەۋروپالىق وداقتىڭ سىرتقى ىستەر جانە قاۋىپسىزدىك ماسەلەلەرى جونىندەگى جوعارعى وكىلى جوزەپ بوررەللمەن كەزدەسۋ بارىسىندا ول قازاقستان مەن ەو اراسىنداعى ىنتىماقتاستىقتى ودان ءارى تەرەڭدەتۋدىڭ وزەكتى ماسەلەلەرىن تالقىلادى. سۇحباتتاستار قر مەن ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمنىڭ تولىق الەۋەتىن ىسكە اسىرۋ ەكى تاراپتىڭ مۇددەلەرىنە جاۋاپ بەرەتىنىن جانە پاندەميادان كەيىنگى كەزەڭدە ەكونوميكالىق ءوسۋ مەن دامۋدى قالپىنا كەلتىرۋگە ىقپال ەتەتىنىن اتاپ ءوتتى.
ج. بوررەلل قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسى اياسىندا قولعا العان ساياسي جانە ەكونوميكالىق رەفورمالاردىڭ جۇزەگە اسىرىلۋ بارىسىمەن تانىستى.
تاراپتار جوعارى دەڭگەيدەگى ساپارلار قارىم-قاتىناستارعا ايتارلىقتاي سەرپىن بەرەتىنىنە كەلىستى جانە جاقىن اراداعى بايلانىستاردىڭ پەرسپەكتيۆالارىن تالقىلادى. حالىقارالىق كۇن تارتىبىندەگى بىرقاتار وزەكتى ماسەلەلەر بويىنشا پىكىر الماستى. تاراپتار ءوڭىردىڭ تۇراقتى دامۋىنا باعىتتالعان جوبالار مەن باعدارلامالاردى ىسكە اسىرۋعا باسا نازار اۋدارا وتىرىپ, ەۋرووداقتىڭ ورتالىق ازيامەن ىنتىماعىن تالقىلادى.
ء«بىز قازاقستانمەن ەۋروپالىق وداقتىڭ ورتالىق ازياعا قاتىستى ستراتەگياسى شەڭبەرىندە, اسىرەسە پاندەميادان كەيىنگى قالپىنا كەلتىرۋ, ءوزارا بايلانىس جانە قاۋىپسىزدىك بولىگىندە ىنتىماقتاستىقتى كەڭەيتۋىمىز قاجەت», دەپ اتاپ ءوتتى ەو جوعارعى وكىلى.
كەزدەسۋ سوڭىندا ديپلوماتتار قر-ەو جانە ەو-ورتالىق ازيا ىنتىماقتاستىق قۇرىلىمدارى جەلىسى بويىنشا بيىل وتەتىن ءىس-شارالاردىڭ كەستەسىن كەلىستى. م. تىلەۋبەردى ءوز ارىپتەسىن ىڭعايلى ۋاقىتتا قازاقستانعا ساپارمەن كەلىپ قايتۋعا شاقىردى.
سونداي-اق قازاقستان ءسىم باسشىسى ەۋروپالىق پارلامەنتتىڭ سىرتقى ىستەر كوميتەتىنىڭ توراعاسى داۆيد ماكاليستەر, ەو ادام قۇقىقتارى جونىندەگى ارنايى وكىلى ەيمون گيلمور جانە ەۋروپارلامەنت دەپۋتاتى, قر-ەو پارلامەنتتىك دوستىق توبىنىڭ توراعاسى رىشارد چارنەتسكيمەن كەزدەستى. كەزدەسۋلەر بارىسىندا پارلامەنتارالىق ىنتىماقتاستىقتى نىعايتۋ, ازاماتتىق قوعامدى دامىتۋ, دەپۋتاتتاردىڭ پارلامەنتتىك بايلانىستارى مەن ءوزارا ساپارلارىنىڭ كەستەسى, سونداي-اق قازاقستانداعى ساياسي رەفورمالاردى ىسكە اسىرۋ بارىسى تۋرالى ماسەلەلەر قوزعالدى.
پىكىر الماسۋ قورىتىندىسى بويىنشا تاراپتار ادام قۇقىقتارىن قورعاۋ سالاسىندا سىندارلى, ءوزارا سىيلاستىق ديالوگ جۇرگىزۋگە كەلىستى.
سونىمەن بىرگە, م. تىلەۋبەردى ەو كەڭەسىنە توراعالىق ەتەتىن پورتۋگاليانىڭ سىرتقى جانە ەۋروپالىق ىستەر ءمينيسترى اۋگۋشتو سانتۋش سيلۆامەن كەزدەستى. ديپلوماتتار ەكىجاقتى جانە كوپجاقتى ىنتىماقتاستىقتىڭ بىرقاتار ماسەلەسىن تالقىلاپ, وزەكتى وڭىرلىك جانە حالىقارالىق ماسەلەلەر بويىنشا پىكىر الماستى.
ساۋدا-ينۆەستيتسيالىق ىنتىماقتاستىقتى ىلگەرىلەتۋ شەڭبەرىندە مينيستر قازاقستاندا جۇمىس ىستەيتىن جانە قازاقستاندىق نارىقتا جۇمىس ىستەۋگە مۇددەلى ءىرى ەۋروپالىق كومپانيالاردىڭ باسشىلىعىمەن بىرقاتار كەزدەسۋ وتكىزدى.
