قوعامدىق ىستەردەن بولەك رەسپۋبليكالىق دەڭگەيدەگى اگەنتتىكتەرگە جەتەكشىلىك ەتكەن, قورشاعان ورتاعا جاناشىرلىقپەن قاراعان مۇساعالي دۋامبەكوۆ بىلتىر 28 شىلدە كۇنى الەمدى جايلاعان ىندەت سالدارىنان كوز جۇمدى. ءتىرى بولعاندا 5 مامىر كۇنى 60 جاسقا تولار ەدى.
بۇگىن ونىڭ قۇرمەتىنە جاڭا اللەيا اشىلىپ, 60 ءتۇپ قاراعاي اعاشى ەگىلدى. ءىس-شاراعا كەلۋشىلەردىڭ سوزىنشە, ساياباق قالانىڭ ءسانىن كەلتىرىپ قانا قويماي, وسكەلەڭ ۇرپاقتى ونەگەلى ءومىر يەسىنىڭ ۇلگى الارلىق ىستەرىنە ۇندەيتىن بولادى. اللەيا نۇر-سۇلتان قالاسى اكىمدىگى مەن قازاقستاننىڭ تابيعاتتى قورعاۋ ۇيىمدارىنىڭ قاۋىمداستىعى قولداۋىمەن اشىلعانىن ايتا كەتكەن ءجون.
«مۇساعاليدى كەيبىرەۋلەر مەملەكەتتىك قىزمەتكەر دەپ ويلايدى, ەندى ءبىرى ساياساتكەر رەتىندە كورەدى. ال مەن ونى قوعام قايراتكەرى دەپ سانايمىن. ەكولوگياعا نازار اۋدارۋ, ماسەلەلەرىن شەشۋ جولىنداعى ىستەرى بولەك اڭگىمە... ول ءار ىسكە شىن جۇرەگىمەن بەرىلىپ جانە ءوزىنىڭ ازاماتتىق بورىشىن وتەپ تۇرعانداي كىرىسەتىن. مىسالعا, م. دۋامبەكوۆ بىرقاتار ادامنىڭ قۇقىقىعىن قورعاۋعا اتسالىستى. سوت وتىرىستارىنا قاتىسىپ, ءباسپاسوز جيىندارىن وتكىزىپ ءجۇردى. سونداعى ماقساتى ادامدارعا كومەكتەسۋ ەدى. سول ءۇشىن ءوزى دە جاۋاپقا تارتىلعان كەزدەرى بولدى. ال اۋىل شارۋاشىلىعى مينيسترلىگىندە جۇمىس ىستەگەن كەزدەرىندە سالانىڭ باستى ولقىلىقتارىن زاڭداردى ساراپتامادان وتكىزۋ ارقىلى تۇزەتۋگە تالپىندى», دەيدى قازاقستانداعى پارلامەنتاريزمدى دامىتۋ قوعامدىق قورىنىڭ ءتورايىمى زاۋرەش باتالوۆا.
ەكولوگتى ەسكە الۋ شاراسىنا جينالعانداردىڭ اراسىندا قوعام بەلسەندىلەرىنەن بولەك, دوس-جاراڭدارى دا كوپ ءجۇردى. ولار اسەرلى ەستەلىكتەرىمەن ءبولىسىپ, ءىس-شارانىڭ ماڭىزىنا توقتالدى. زامانداستارى مەن ارىپتەستەرى بولسا, عىلىمي ىزدەنىسى جايلى ءسوز ەتىپ, ونىڭ تابيعات تازالىعىنا عانا ەمەس, ازاماتتىق قوعامنىڭ تازا بولۋىنا دا ۇلەس قوسقانىن جەتكىزدى.
ءسوز سويلەۋشىلەر لەگى اياقتالعان سوڭ, مارقۇمنىڭ ارۋاعىنا قۇران باعىشتالدى. ودان سوڭ قولدارىنا كۇرەك الىپ, قاراعاي اعاشتارىن وتىرعىزدى.
ايتا كەتەيىك, مۇساعالي دۋامبەكوۆ 100-دەن استام عىلىمي جاريالانىمنىڭ جانە ونەرتابىستىڭ اۆتورى. ونىڭ «قازاقستان ەكولوگياسى», «كاسپي تەڭىزىنىڭ ەكولوگيالىق قاۋىپسىزدىگى», «ەكولوگيالىق مەنەدجمەنت» سەكىلدى تاعى دا باسقا كىتاپتارى جارىق كورگەن.
