مەملەكەت باسشىسى قاسىم-جومارت توقاەۆ اسا كورنەكتى كومپوزيتور ءھام جۇرتقا تانىمال ءانشى, مەملەكەتتىك سىيلىقتىڭ يەگەرى, قازاقستاننىڭ حالىق ءارتىسى ەسكەندىر وتەگەن ۇلى حاسانعاليەۆتىڭ دۇنيەدەن وتۋىنە بايلانىستى ونىڭ وتباسى مەن جاقىندارىنا كوڭىل ايتىپ, جەدەلحات جولدادى.
«ەسكەندىر وتەگەن ۇلىن حالقىمىز قوڭىر داۋىستى ءانشى جانە جان تەبىرەنتەرلىك اندەر شىعارعان كومپوزيتور رەتىندە وتە جاقسى كورگەن ەدى. ۇزاق جىلعى شىعارماشىلىق جولىندا جەمىستى ەڭبەك ەتىپ, وتاندىق مۋزىكا ونەرىنىڭ دامۋىنا زور ۇلەس قوستى. حالقىمىزعا 200-گە جۋىق ءان, رومانس جانە حورعا ارنالعان شىعارمالارىن تارتۋ ەتتى. اسىرەسە, «اتامەكەن», «اناعا سالەم», «ەسىڭە ال», «اينالايىن», «ادەمى-اۋ», «گۇلسەزىم» جانە باسقا دا تاماشا تۋىندىلارى كورەرمەن تاراپىنان جوعارى باعاسىن الدى. حالقىمىزدىڭ سۇيىسپەنشىلىگى مەن ايرىقشا قۇرمەتىنە بولەندى. ەلىمىزدىڭ ونەرى مەن مادەنيەتىن وركەندەتۋگە اتسالىسىپ, سوڭىنا جارقىن ءىز قالدىرعان ەسكەندىر وتەگەن ۇلىنىڭ بەينەسى ۇمىتىلمايدى, ەسىمى حالقىمىزدىڭ جادىندا ساقتالادى», دەلىنگەن جەدەلحاتتا.
