كينو • 30 ءساۋىر، 2021

الماتىدا جاڭا باعىتتاعى مەديا جانە كينو مەكتەبى اشىلادى

53 رەت كورسەتىلدى

شاكەن ايمانوۆ اتىنداعى «قازاقفيلم» اق جانە الماتى مەنەدجمەنت ۋنيۆەرسيتەتىنىڭ بىرلەسكەن قۇرىلتايشىلىعىمەن الماتىدا جاڭا فورماتتاعى مەديا جانە كينو مەكتەبى (Media & Film School) اشىلدى، دەپ حابارلايدى Egemen.kz

جاڭا ءبىلىم ورداسىنىڭ اشىلۋىنا وراي ءباسپاسوز وتىرىسى ۇيىمداستىرىلىپ، بولاشاق ءبىلىم ورتالىعىنىڭ ماقسات-ماڭىزى تۋرالى كەڭىنەن اڭگىمەلەندى. 

AlmaU كاسىپكەرلىك ۋنيۆەرسيتەتى نارىق تالاپتارى مەن ءوزىنىڭ ستراتەگيالىق ماقساتتارىنا سايكەس يننوۆاتسيالىق ءبىلىم بەرۋ باعدارلامالارىن قۇراستىرۋدا. قازىرگى كەزدە سىني تۇرعىدان ويلاي الاتىن، ەتيكالىق قۇندىلىقتارعا يە، تەرەڭ ءبىلىمى بار جانە جاڭا تەحنولوگيالاردى مەڭگەرگەن ماماندارعا سۇرانىس جوعارى بولىپ وتىرعان سالالاردىڭ ءبىرى – كرەاتيۆ يندۋستريا، اتاپ ايتقاندا، مەديا جانە كينو باعىتى. قازاقستاندا 40-تان استام جۋرناليستيكا مەكتەبى مەن 3 كينو مەكتەبى جۇمىس ىستەيتىنىنە قاراماستان، ساپالى كادر ماسەلەسى تاپشى بولىپ وتىر.

جاڭا مەكتەپتىڭ ماقساتى – ەلدەگى كرەاتيۆ يندۋستريانىڭ دامۋىنا بەلسەندى ۇلەس قوساتىن، بۇقارالىق اقپارات قۇرالدارى مەن كينو نارىعىنىڭ زاماناۋي تالاپتارىنا ساي كەلەتىن مامانداردى دايارلاۋ.

العاشقى ستۋدەنتتەردى وقۋعا قابىلداۋ 2021-2022 وقۋ جىلىندا باستالادى. جاڭا مەكتەپتىڭ باستى مىندەتى – قاجەتتى ينفراقۇرىلىمدى قالىپتاستىرۋ. Media & Film School مەكتەبىنىڭ تەحنيكالىق جانە ينتەللەكتۋال بازاسىن جاساۋعا ش.ايمانوۆ اتىنداعى «قازاقفيلم» اق كينوستۋدياسى اتسالىساتىن بولادى.

AlmaU رەكتورى ەربول سۇلەيمەنوۆ جاڭا مەكتەپتىڭ ارتىقشىلىعى جايلى «قازاقفيلم» – وزىندىك ماڭىزدى تاريحى بار جانە قازىرگى باعىتتاردى قالىپتاستىراتىن ەلىمىزدىڭ باستى كينوالاڭى. وسىعان وراي كينوستۋديا باسشىلىعىنىڭ ءبىزدىڭ ىنتىماقتاستىق يدەيامىزدى قولداعانىنا قۋانىشتىمىز» دەپ اتاپ ءوتتى.

«قازىرگى تاڭدا وتاندىق كينو سالاسى كاسىبي ماماندارعا ءزارۋ. تەحنولوگيا جانە شىعارماشىلىق باعىتى بۇگىندە تەز وزگەرىپ جاتقان زاماندا كينويندۋستريادا تابىسقا جەتۋ ءۇشىن الەمدىك باعىت اعىمدارعا عانا سۇيەنىپ قويماي، سونىمەن بىرگە ءوز ەرەكشەلىگىمەن تاڭعالدىرۋ قاجەت. مەملەكەت باسشىسى ءوز جولداۋىندا ءبىلىمنىڭ قول جەتىمدىلىگى مەن ساپاسىن ارتتىرۋدىڭ ماڭىزدىلىعىن اتاپ ءوتتى. قازاقستاننىڭ ەڭ ۇزدىك ۋنيۆەرسيتەتتەرىنىڭ ءبىرى AlmaU-ءدىڭ زامان تالاپتارىنا دەر كەزىندە جاۋاپ قاتاتىن وسىناۋ باستاماعا سەرىكتەس بولىپ بىرلەسە جۇمىس جاساپ جاتقانىمىزعا قۋانىشتىمىز»، دەدى ش.ايمانوۆ اتىنداعى «قازاقفيلم» اق ۆيتسە-پرەزيدەنتى ايدار باتالوۆ.

«Media & Film School باعدارلاماسىنا ەنگىزىلگەن پاندەر الەمدەگى جەتەكشى وقۋ باعدارلامالارىنا نەگىزدەلەدى، ال وقىتۋشىلارى – كاسىبي بىلىكتىلىگى عىلىمي-تاجىريبەلىك جۇمىستارمەن راستالعان ماماندار. بيىلدان باستاپ ءبىز بىرنەشە ماماندىقتاردى ەكسپەريمانتتى باعىت تۇرىندە اشامىز، اتاپ ايتساق: كرەاتيۆ ونەر وقۋ باعدارلاماسى، جاڭا مەديا وقۋ باعدارلاماسى جانە ديدجيتال مادەنيەت وقۋ باعدارلاماسى دەپ اتالاتىن 3 وقۋ باعدارلاماسى بويىنشا ديدجيتال كينو رەجيسسەرى جانە مونتاج رەجيسسەرى، ديدجيتال گەيم-ديزاينى، داتا جۋرناليستيكا جانە موبيل جۋرناليستيكا جانە ديدجيتال كينو سىنى ماماندارى دايارلاناتىن بولادى»، دەدى Media & Film School مەكتەبىنىڭ دەكانى PhD مولديار ەرگەبەكوۆ.

«اريزونا ۋنيۆەرسيتەتىندەگى امەريكالىق ءبىلىم بەرۋدىڭ جاڭا تەحنولوگيالارى مەن جوعارى ستاندارتتارى، وتاندىق كينەماتوگرافيستەردىڭ تاجىريبەسى مەن ​قازاقفيلم​ كينوستۋدياسىنىڭ ءتۇسىرىلىم الاڭدارى جانە AlmaU-ءدىڭ مىقتى بازاسى – مۇنىڭ ءبارى مەديا جانە كينو مەكتەبىنىڭ قالىپتاسىپ جاڭا ساپاعا جەتۋىنىڭ جانە ەلىمىزدەگى مەديا مەن كينو سالاسى ءۇشىن كاسىبيلەردى دايارلاۋدىڭ كەپىلى»، دەپ اتاپ ءوتتى قازاقستان كينوسىنشىلارى قاۋىمداستىعىنىڭ پرەزيدەنتى گۇلنار ابىكەەۆا.

سونىمەن قاتار، سپيكەرلەر مەديا جانە كينو مەكتەبىن دامىتۋ جوسپارلارى تۋرالى ايتتى. 2021-2022 وقۋ جىلىندا مەكتەپ جانىنان مەديا جانە كينەماتوگرافيا سالاسىنداعى ينتەرديستسيپلينار زەرتتەۋلەرمەن اينالىساتىن مەديا جانە كينو ينستيتۋتى اشىلادى. كەلەسى جىلى جۋرناليستيكا، تەلەديدار جانە راديوجۋرناليستيكا، انيماتسيا، گرافيكالىق ديزاين، دراماتۋرگيا جانە تاعى دا باسقا ماماندىقتار اشىلادى.

ءباسپاسوز وتىرىسى سوڭىندا ش.ايمانوۆ اتىنداعى «قازاقفيلم» كينوستۋدياسىنىڭ ۆيتسە-پرەزيدەنتى ايدار باتالوۆ جانە AlmaU رەكتورى ەربول سۇلەيمەنوۆ ىنتىماقتاستىق تۋرالى مەموراندۋمعا قول قويدى.


الماتى

سوڭعى جاڭالىقتار

Atmaca زىمىرانى سىناقتان ءساتتى ءوتتى

تەحنولوگيا • بۇگىن، 18:35

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار