پارتيا حاتشىسى الىبەك الدەنەيدىڭ ايتۋىنشا, «باقىتتى وتباسى» جوباسى اياسىندا ورتالىق جانە جەرگىلىكتى اتقارۋشى ورگاندار كەڭەستىڭ ۇسىنىستارىن ەسكەرە وتىرىپ, ەلىمىزدىڭ 220 ەلدى مەكەنىندە ينتەرناتتار مەن مەكتەپتەردە جوندەۋ جۇمىستارىن جۇرگىزۋ, مەديتسينالىق-الەۋمەتتىك مەكەمەلەردە بالالاردىڭ كۇتىم ساپاسىن جاقسارتۋ بويىنشا كوپتەگەن جۇمىستار جۇرگىزىلگەن. سونىمەن قاتار 200 قىزمەتكەر ءۇشىن ءبىلىم الۋ ۇيىمداستىرىلىپ جانە جالاقى 50%-كە ارتتى.
«Nur Otan» پارتياسىنىڭ جانىنان قيىن جاعدايعا تاپ بولعان وتباسىلارعا, ايەلدەر مەن بالالارعا كەشەندى كومەك كورسەتۋ جانە ولاردى انىقتاۋ ءۇشىن «111 شۇعىل قىزمەتى» بايلانىس ورتالىعى اشىلدى. ول ەلىمىزدىڭ بارلىق وڭىرلەرىندە ارنايى قۇرىلعان جەدەل ارەكەت ەتۋ توپتارىمەن ءوزارا بىرلەسە جۇمىس جاسايدى.
كەڭەس توراعاسى دينارا زاكيەۆا وڭىرلەردە جۇرگىزىلگەن تالداۋ جۇمىستارىنىڭ ناتيجەسىندە, سول ايماقتارعا وتباسىن قولداۋ ورتالىقتارىنىڭ سانىن ارتتىرۋ قاجەتتىگىن كورسەتەتىنىن اتاپ ءوتتى. اتاپ ايتقاندا, اۋدان ورتالىقتارىندا وتباسىلارعا, قيىن جاعدايلارعا تاپ بولعان ايەلدەرگە, زورلىق-زومبىلىققا ۇشىراعان جاندارعا ۋاقىتىلى كومەك كورسەتۋدى قامتاماسىز ەتۋ كەرەكتىگىن ايتتى.
«جەدەل ارەكەت ەتۋ توپتارى جۇمىس ىستەگەن 10 ايدىڭ ىشىندە بارلىق وڭىردە 46 مىڭ وتباسىعا كومەك كورسەتىلگەن, ونىڭ ىشىندە قۇجاتتاردى رەسىمدەۋ, جۇمىسقا ورنالاستىرۋ جانە دە باسقادا دا كەشەندى كومەكتەر قامتىلعان. پارتيانىڭ سايلاۋالدى باعدارلاماسىندا 5 جىل ىشىندە ءاربىر قالا مەن اۋداندا وتباسىن قولداۋ, وتباسىلىق جانجالداردى شەشۋ جانە بالالارى بار ايەلدەرگە ۋاقىتشا تۇرعىنجاي ۇسىنۋ بويىنشا وسىنداي 234 ورتالىق اشۋ مىندەتى كوزدەلگەن», دەدى دينارا زاكيەۆا.
باسقوسۋ بارىسىندا كەڭەس مۇشەسى ديانا ەرلان ءبىلىم جانە عىلىم مينيسترلىگىنىڭ وكىلدەرىنە بالالاردىڭ ينتەرناتتاردا تۇراتىن جاتاقجايلارى مەن ءبىلىم الۋ ساپاسىن جاقسارتۋعا نازار اۋدارۋ كەرەكتىگىن ايتتى.
ماسەلەن, 2019 جىلى كەڭەستىڭ جۇمىس توبى ەلىمىزدىڭ بارلىق وبلىستارىنداعى 61 ينتەرناتقا بارىپ, ولاردىڭ 19-ىندا سانيتارلىق نورمالار مەن شارتتاردىڭ بۇزىلعانى انىقتالعان. ەسكەرتۋ العان بارلىق ينتەرناتتا ماتەريالدىق-تەحنيكالىق بازا نىعايتىلىپ, كۇردەلى جوندەۋ جۇمىستارى جۇرگىزىلدى. الايدا ەلىمىزدە 400-دەن استام جاقسارتۋدى قاجەت ەتەتىن ينتەرنات بار.
پارتيانىڭ ءباسپاسوز قىزمەتىنىڭ مالىمەتىنشە, ۋاكىلەتتى ورگانعا 2021 جىلدىڭ 1 شىلدەسىنە دەيىن بارلىق ينتەرناتتاعى جاعدايدى جاقسارتۋ جونىندەگى جۇمىس كەستەسىن كەڭەسكە ۇسىنۋ تاپسىرىلعان.
وتىرىس قورىتىندىسى بويىنشا اتقارۋشى ورگاندارعا بىرقاتار ۇسىنىستار دايىندالعان. ولاردىڭ اراسىندا ۇكىمەت جانىنداعى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى ۆەدومستۆوارالىق كوميسسيانىڭ قاراۋىنا ارنايى مەكتەپتەردەن ورالعاننان كەيىنگى كامەلەتكە تولماعانداردى وڭالتۋ, مۇگەدەك بالالارعا ارنالعان وڭالتۋ ورتالىقتارىنىڭ سانىن ۇلعايتۋ جانە ت. ب. ماسەلەلەردى ەنگىزۋ تۋرالى ۇسىنىستار بار.
