«قوعامدىق كەلىسىم» كمم-ءنىڭ جۇمىس جوسپارىنا سايكەس وبلىستىق قحا جانىنداعى عىلىمي-ساراپشىلىق توبى «تاۋەلسىزدىك جىلدارىنداعى جەتىستىكتەر» تاقىرىبىندا دوڭگەلەك ۇستەل, 1 ناۋرىز – العىس ايتۋ كۇنىنە وراي «قازاقستان تاۋەلسىزدىگىنە 30 جىل: بىرلىك پەن بىرەگەيلىكتىڭ مودەلى» اتتى رەسپۋبليكالىق عىلىمي-تاجىريبەلىك كونفەرەنتسيا وتكىزىلدى. بارلىق ءبىلىم بەرۋ مەكەمەلەرىندە وسى تاقىرىپتا تاربيە ساعاتتارى ۇيىمداستىرىلدى.
«30 يگى ءىس» قايىرىمدىلىق اكتسياسى اياسىندا «جۇرەك جىلۋىمەن» اتتى الەۋمەتتىك كومەك كورسەتۋ شارالارى ۇيىمداستىرىلدى. جىل باسىنان بەرى 60-تان استام قايىرىمدىلىق شاراسى وتكىزىلىپ, 2752 ادامدى قامتىعان كومەككە دەمەۋشىلەر قولداۋىمەن 12 708 160 تەڭگە قارجى جۇمسالدى.
وسى جىلعى جاڭالىقتىڭ ءبىرى – «قوعامدىق كەلىسىم» كمم باستاماسىمەن «30 جىلعا – 30 تۇلعا» ءىس-شاراسى باستاۋ الدى. جوبا اياسىندا تاۋەلسىزدىك جىلدارىندا سىر ءوڭىرىنىڭ ءوسىپ-وركەندەۋىنە جانە جالپىۇلتتىق بىرلىك پەن كەلىسىمدى ساقتاۋعا سۇبەلى ۇلەس قوسقان ەتنوس وكىلدەرى ناسيحاتتالادى.
سولاردىڭ ءبىرى – تاتار ەتنومادەني بىرلەستىگىنىڭ ارداگەرى رايسا سماحانوۆا. قازاق وتباسىنا كەلىن بولىپ تۇسكەن رايسا حانيۆقىزى نەمەرە, شوبەرە سۇيگەن اجە. بىرنەشە جىل وبلىستىق قازاقستان حالقى اسسامبلەياسى جانىنداعى انالار كەڭەسىنىڭ ءتورايىمى قىزمەتىن اتقارىپ, ەل اراسىندا بىرلىك پەن تاتۋلىقتىڭ بەكي تۇسۋىنە ەسەلى ۇلەس قوستى.
بيىل قىزىلوردا قالاسىنداعى دوستىق ۇيىندە قازاق ءتىلىن وقىتۋ كۋرسى باستالدى. اپتاسىنا ەكى مارتە تەگىن وتەتىن كۋرسقا جازىلۋعا تىلەك بىلدىرگەندەر كوپ. دوستىق ۇيىندەگى تىلدەردى وقىتۋ كابينەتىنىڭ جەتەكشىسى گۇلزيرا سارسەنبەك جۇرگىزەتىن كۋرسقا ۇلكەندەر دە قاتىسىپ ءجۇر.
سان ەتنوسقا سايا بولعان سىر ەلىندەگى بۇل باستامالار تاتۋ ەلدىڭ تابىسى كوپ بولاتىندىعىن دالەلدەپ تۇرعانداي.
قىزىلوردا
