ەل ەگەمەندىگىنىڭ 30 جىلدىق مەرەيتويىنا وراي ەلوردادا قالا ومىرىنە بەلسەنە اتسالىسىپ, تۇرعىندارعا قولداۋ كورسەتۋ ماقساتىندا «30 يگى ءىس» الەۋمەتتىك جانە قايىرىمدىلىق ءىس-شارالارى ءوتىپ جاتىر. وسى «30 يگى ءىس» قايىرىمدىلىق اكتسياسى اياسىندا نۇر-سۇلتان قالاسى اكىمدىگى «استانا جاستارى» ۇيىمى مەن استانالىق ۆولونتەرلەر «دوس» «تاۋەلسىز ءومىر» ورتالىعى مۇگەدەكتەرىنىڭ قوعامدىق بىرلەستىگى اۋماعىندا تازالىق جۇمىستارىن جۇرگىزدى.
«استانا جاستارى» جاستار رەسۋرستىق ورتالىعى ۇيىمداستىرۋ ءبولىمىنىڭ باسشىسى ارايلىم ساپارالى: «بۇل قايىرىمدىلىق ءىس-شارا قازاقستان تاۋەلسىزدىگىنىڭ 30 جىلدىعىنا ارنالعان قايىرىمدى ىستەر مارافونى اياسىندا ىسكە اسىرىلىپ جاتىر. ۆولونتەرلەر وسىلاي مۇمكىندىگى شەكتەۋلى ادامداردىڭ اۋلاسىن قوقىستاردان تازارتىپ, وندا كوشەت وتىرعىزىپ, بۇرىننان ءوسىپ تۇرعان اعاشتاردىڭ توپىراعىن قوپسىتىپ, ءتۇبىن اكتەپ, جالپى اباتتاندىرۋ, كوگالداندىرۋ جۇمىستارىن جۇرگىزدى. وسى جۇمىسقا 15-كە جۋىق ۆولونتەر بەلسەنە قاتىستى. الداعى ۋاقىتتا قايىرىمدىلىق جۇمىس جالعاسىن تابادى», دەدى.
ءبىر جارىم جىلدان بەرى ازاماتتىق ىسپەن اينالىسىپ جۇرگەن ۆولونتەر امانگەلدى ولجاس ءوز يدەيالاسىمەن بىرگە ءبىرشاما يگى ءىس-شارانىڭ باسى-قاسىندا بولعانىن ايتتى.
«ۋنيۆەرسيتەتتەگى وقۋىمدى بىتىرگەن سوڭ جۇمىسقا ورنالاستىم. سودان كەيىن بوس ۋاقىت پايدا بولا باستادى. مەن سول ۋاقىتىمدى جاقسى ىسكە جۇمساۋدى ءجون كوردىم. مىنە, سول ءبىر جارىم جىلدان بەرى ۆولونتەرلىكپەن اينالىسىپ ءجۇرمىن. وسى قىسقا عانا ۋاقىتتا ورتاق ماقساتتى ازاماتتارمەن بىرگە قالانى كوركەيتۋگە, تۇرعىندارعا كومەك كورسەتۋگە باعىتتالعان كوپتەگەن قايىرىمدىلىق جۇمىسقا قاتىستىق. وسى جولى دا تاۋەلسىزدىكتىڭ قۇرداستارى رەتىندە ەگەمەندىكتىڭ مەرەيتويىنا وراي ۇيىمداستىرىلعان قايىرىمدى ىسكە جۇمىلدىق. وزدەرىڭىز بىلەتىندەي, قىستان كەيىن قالا قاتتى لاستانادى. اينالانى كۇل-قوقىستان, قار استىندا 3-4 اي بويى كورىنبەي جاتقان قالدىقتاردان تازارتۋ قاجەت. ءوز قالامىزدىڭ تازالىعىنا ءوزىمىز جاۋاپ بەرۋگە ءتيىسپىز. بىراق مۇنداي مۇمكىندىكتەن ادا ادامدار, ياعني فيزيكالىق جۇمىسقا جارامايتىن جاندار دا بار. ولارعا البەتتە كومەك كەرەك. ءبىز كومەك كورسەتتىك», دەدى ۆولونتەر ا.ولجاس.
ايتا كەتەلىك, قالانى كوگالداندىرۋعا, اباتتاندىرۋعا بەلسەنە اتسالىسىپ, قالانىڭ ەكولوگيالىق دامۋىنا ۇلەس قوسقان ۇيىم قىزمەتكەرلەرى مەن ۆولونتەرلەر ءىس-شارا بارىسىندا سانيتارلىق نورمالاردى ساقتادى. بارلىق قاتىسۋشى بەتپەردەمەن جانە قولعاپپەن قامتاماسىز ەتىلدى.
