«Ashyq» – بۇل ەل ىشىندە COVID-19 ۆيرۋسىن جۇقتىرۋ جانە تارالۋ ۇردىسىنە بارىنشا توسقاۋىل بولىپ, ازاماتتاردىڭ قاۋىپسىزدىگىن قامتاماسىز ەتۋگە باعىتتالعان, كارانتيندىك شەكتەۋلەر كەزىندە بيزنەستىڭ دامۋىنا مۇمكىندىك بەرەتىن موبيلدىك قوسىمشا. IT-قوعامداستىق جاساعان بۇل قوسىمشاعا بيۋدجەتتەن قارجى شىعىندالعان جوق.
قوسىمشا ەشقانداي جەكە مالىمەتتەردى ساقتامايدى, تەك قانا قر دەنساۋلىق ساقتاۋ مينيسترلىگىنىڭ پتر بازاسىنان قولدانۋشىنىڭ مارتەبەسى تۋرالى اقپارات الادى.
ونىڭ ۇستىنە, «Ashyq» قوسىمشاسى «ەلەكتروندىق ۇكىمەتتىڭ» اقپاراتتىق-كوممۋنيكاتسيالىق وپەراتورى - «ۇلتتىق اقپاراتتىق تەحنولوگيالار» اق-نىڭ سەرۆەرلەرىندە قاۋىپسىزدىك شارالارىمەن قامتاماسىز ەتىلگەن. بۇل تۇرعىدا اقپاراتتىق قاۋىپسىزدىك قاتاڭ قاداعالانادى. سونداي-اق قر «اقپاراتتاندىرۋ تۋرالى» زاڭىنا سايكەس اقپاراتتىق جۇيە 1 جىل بويى تاجىريبەلىك قولدانىستا بولۋى ءتيىس, سوسىن اقپاراتتىق قاۋىپسىزدىك سىناعىنان ءوتىپ, كۇندەلىكتى كەڭ قولدانىسقا ەنگىزىلەدى. ياعني قازىرگى تاڭدا «Ashyq» قوسىمشاسى تاجىريبەلىك قولدانىستا, پيلوتتىق تارتىپتە جۇزەگە اسىپ جاتىر.
بىلتىر «Ashyq» قوسىمشاسى قازاقستاننىڭ بىرنەشە قالاسىندا پيلوتتىق تارتىپتە ىسكە قوسىلدى. قولدانۋشىلار مەن جوباعا قاتىسۋشىلاردىڭ پىكىرلەرىن ەسكەرە وتىرىپ, كەيبىر تەحنيكالىق اقاۋلىقتار جوندەلدى. جالپى, جوباعا قاتىسۋشىلار قوسىمشا تۋرالى جاقسى پىكىر ءبىلدىرىپ جاتىر. قوسىمشانى سىناۋ بارىسىندا 800-دەن استام ادامنان COVID-19 وڭ ناتيجەسى انىقتالىپ, بيزنەس نىساندارىنىڭ كليەنتتەرىنە قاۋىپسىز ورتا قالىپتاستىرۋعا مۇمكىندىك جاسالدى. ءساۋىردىڭ باسىندا پرەزيدەنت قاسىم-جومارت توقاەۆ ۇكىمەتكە بۇل جوبانى ەل بويىنشا ەنگىزۋگە تاپسىرما بەردى;
قازىر قولدانۋشىلاردىڭ ۇسىنىس-پىكىرلەرىنە وراي «Ashyq» قوسىمشاسى ۇنەمى جاڭارتىلىپ جاتىر. بۇگىن 28 ساۋىردە تەحنيكالىق تۇرعىدا جەتىلدىرىلگەن, ونىمدىلىگى جوعارى, شەتەلدىك ازاماتتاردىڭ دا پتر مارتەبەسىن تەكسەرۋ فۋنكتسياسى بار جاڭا نۇسقا ىسكە قوسىلدى.
قولدانۋشىنىڭ اعىمداعى مارتەبەسىن ashyq.kz ۆەب-رەسۋرسىنان تەكسەرۋگە بولادى. قازىر وسى پاراقشانى دەرەكتەرمەن تولتىرۋ, «Ashyq» قوسىمشاسىنىڭ سيپاتتاماسى تۋرالى بولىمدەر جاساۋ, ءجيى قويىلاتىن سۇراقتارعا جاۋاپ بەرۋ, تەحنيكالىق قولداۋ ءبولىمىنىڭ بايلانىس تەلەفوندارىن ەنگىزۋ جۇمىستارى ءجۇرىپ جاتىر. «Ashyq» جوباسىنا قاتىسۋشىلاردىڭ ءتىزىمىن اكىمدىكتەردىڭ جانە «اتامەكەن» اكپ سايتتارىنان كورۋگە بولادى.
ايتا كەتەيىك, مۇنداي IT-شەشىمدەر حالىقارالىق تاجىريبەدە كەڭىنەن قولدانىلادى. ماسەلەن, بىرىككەن اراب امىرلىكتەرىندە COVID-19 - DXB Smart App موبيلدىك قوسىمشاسى بولسا, مالايزيا ۇكىمەتى COVID-19 ىندەتىنىڭ قارقىنىن باقىلايتىن قوسىمشا جاساپ شىعاردى.
