جەر ماسەلەسى قوعامدا قىزۋ تالقىلانعان كۇن تارتىبىندەگى وزەكتى پروبلەمالاردىڭ ءبىرى. سوندىقتان پرەزيدەنت قاسىم-جومارت توقاەۆ حالىق سوزىنە قۇلاق اسىپ, اتالعان ماسەلەنى شەشۋدىڭ ناقتى جولىن ۇسىندى. اتاپ ايتقاندا, مەملەكەت باسشىسى ءوزىنىڭ زاڭ شىعارۋعا باستاماشى بولۋ قۇقىعىن پايدالانىپ, اۋىلشارۋاشىلىق ماقساتىنداعى جەرلەردى شەتەلدىكتەرگە ساتۋعا جانە جالعا بەرۋگە تىيىم سالاتىن زاڭ جوباسىن پارلامەنتتىڭ قاراۋىنا جولدادى.
پارلامەنتتىڭ ەكى پالاتاسى دا بۇل قۇجات بويىنشا اۋقىمدى جۇمىس اتقارىپ, ونى جان-جاقتى قارادى. زاڭ جوباسىن تالقىلاۋعا جۇرتشىلىق, ساراپشىلار جانە عالىمدار دا بەلسەندى تۇردە قاتىستى.
سونىمەن قاتار وسى زاڭ جوباسىندا ەگەر مەنشىك يەسى بولىپ تابىلاتىن تۇلعانىڭ قازاقستان ازاماتتىعى توقتاتىلعان نەمەسە قازاقستان رەسپۋبليكاسىنىڭ زاڭدى تۇلعاسىنا شەتەلدىكتەر مۇشە بولعان جاعدايدا اۋىل شارۋاشىلىعى جەرلەرىن يەلىكتەن شىعارۋ ءراسىمى دە قاراستىرىلعان.
بۇگىن سەنات اتالعان زاڭ جوباسىن قاراپ, قۇجاتتىڭ نەگىزگى تۇجىرىمىن ماقۇلدادى. الايدا, تالقىلاۋ بارىسىندا وعان وزگەرىستەر ەنگىزۋ قاجەتتىلىگى تۋىندادى. سوعان بايلانىستى پالاتا وتىرىسىندا زاڭ جوباسىن ماجىلىسكە قايتارۋ تۋرالى شەشىم قابىلداندى.
«جەر – حالقىمىزدىڭ ەڭ باستى قازىناسى, قاستەرلى تاۋەلسىزدىگىمىزدىڭ بەلگىسى. سوندىقتان جەر ماسەلەسى قاشاندا ستراتەگيالىق ماڭىزعا يە. وسى زاڭ جوباسىنا سايكەس, بۇدان بىلاي شەتەلدىكتەرگە, ازاماتتىعى جوق ادامدارعا, شەتەلدىك زاڭدى تۇلعالارعا, قانداستارعا اۋىلشارۋاشىلىق ماقساتىنداعى جەر ۋچاسكەلەرى ساتىلمايدى, ءارى جالعا بەرىلمەيدى. جوبادا قازاقستان رەسپۋبليكاسى زاڭدى تۇلعاسىنىڭ مۇشەسى نەمەسە اكتسيونەرى بولىپ تابىلاتىن تۇلعانىڭ قازاقستان ازاماتتىعى توقتاتىلعان جاعدايدا اۋىل شارۋاشىلىعى جەرلەرىن يەلىكتەن شىعارۋ ءراسىمى دە قاراستىرىلعان. جالپى, بۇل زاڭ جوباسى, ەڭ الدىمەن, حالقىمىزدىڭ جانە مەملەكەتىمىزدىڭ مۇددەلەرىن قورعايدى», – دەدى سەنات توراعاسىنىڭ ورىنباسارى نۇرلان ءابدىروۆ.
وسى زاڭ قابىلدانعاننان كەيىن دە ەلىمىزدە جەر ماسەلەلەرىن زاڭنامالىق رەتتەۋدى جەتىلدىرۋ جۇمىستارى جالعاسا بەرەدى. تاياۋدا عانا ارنايى قۇرىلعان جەر كوميسسياسى ءوز جۇمىسىن اياقتاعانى بەلگىلى. ونىڭ قۇرامىنا بەس بىردەي سەنات دەپۋتاتى مۇشە بولعانىن ايتا كەتكەن ءجون. كوميسسيانىڭ وتىرىستارى كەزىندە بۇل سالاداعى زاڭنامالاردى جەتىلدىرۋگە قاتىستى كوپتەگەن ۇسىنىستار ايتىلدى. سوعان سايكەس, قازىرگى تاڭدا ۇكىمەت جەردى پايدالانۋعا قاتىستى زاڭنامالىق تۇزەتۋلەر توپتاماسىن ازىرلەۋدە. سونىڭ ناتيجەسىندە الداعى ۋاقىتتا ءتيىستى زاڭ جوباسى پارلامەنتكە كەلىپ تۇسەدى.
سونداي-اق بۇگىن سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىندا بانكتىك, ميكروقارجىلىق جانە كوللەكتورلىق قىزمەتتى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قاراپ, قابىلدادى.
مەملەكەت باسشىسىنىڭ تاپسىرماسى بويىنشا ازىرلەنگەن بۇل قۇجات ميكروقارجىلىق جانە كوللەكتورلىق قىزمەتتى ىسكە اسىرۋدىڭ قۇقىقتىق بازاسىن جەتىلدىرۋدى كوزدەيدى. ەندى وسى زاڭعا سايكەس كوللەكتورلارعا باسقا ادامداردىڭ تەلەفون نومىرلەرىنەن قوڭىراۋ شالۋعا تىيىم سالىنادى جانە ولار بورىشكەرلەرمەن اراداعى كەز كەلگەن ءىس-ارەكەت كەزىندە ۆيدەو جانە اۋديوفيكساتسيا جۇرگىزۋگە مىندەتتى بولادى.
