جىل سايىن كونە تاراز توپىراعىندا كەنەن ەسىمىن ۇلىقتاۋعا جانە شىعارمالارىن ناسيحاتتاۋعا ارنالعان رەسپۋبليكالىق «شىرقا, داۋسىم!» اتتى ءداستۇرلى انشىلەر بايقاۋى وتەدى. اتالعان بايقاۋ تالاي ونەرپازدىڭ جولىن اشىپ, تالانتىن ۇشتادى. بيىل «شىرقا, داۋسىم!» بايقاۋى وڭىردە ونىنشى رەت ۇيىمداستىرىلىپ, جىر الىبى جامبىل جاباەۆتىڭ 175 جىلدىعى مەن ەل تاۋەلسىزدىگىنىڭ 30 جىلدىعىنا ارنالىپ وتىر.
نەگىزىنەن, سانيتارلىق تالاپتارعا سايكەس, بايقاۋ وتكەن «بالاساعۇن» ورتالىق كونتسەرت زالىندا كورەرمەن بولعان جوق. بىراق ۇلتتىق ونەردى باعالايتىن كوپشىلىك ءۇشىن ونلاين كورسەتىلىم ۇيىمداستىرىلدى. ەكى جىلدا ءبىر رەت وتەتىن ءداستۇرلى انشىلەر مەرەكەسىنە بيىل ەلىمىزدىڭ ءار قيىرىنان وتىزعا جۋىق ۇمىتكەر قاتىسقان. ءبىر قۋانتارلىعى, ونىڭ ءبارى دە جاستار ەكەن. بايقاۋعا التىنبەك قورازباەۆ, سايات مەدەۋوۆ, ايگۇل قوسانوۆا جانە بەيبىت مۇساەۆ سىندى تانىمال ونەر قايراتكەرلەرى قازىلىق ەتىپ, ۇمىتكەرلەردىڭ ونەرىن باعالادى. «بيىل بۇل ءداستۇرلى ءان بايقاۋى ونىنشى رەت وتكىزىلسە, مەن ءۇشىنشى مارتە توراعا رەتىندە قاتىسىپ وتىرمىن. بايقاۋعا جاستاردىڭ كوپ قاتىسقانى كوڭىلگە مەدەۋ بولدى. بۇل دەگەنىمىز – كەنەن مۇراسى ماڭگى ولمەيتىندىگىنىڭ دالەلى», دەيدى التىنبەك قورازباەۆ.
بايقاۋدا كەنەن ازىرباەۆتىڭ اتاقتى «تىك شىرقاۋ», «شىرقا, داۋسىم!», «كوكشولاق» سەكىلدى كوپتەگەن عاجاپ اندەرى ورىندالدى. جالپى, شارادا ونەرپاز جاستار كەنەننىڭ كوركەم الەمىن اشا ءبىلدى. ناتيجەسىندە بايقاۋدىڭ باس جۇلدەسىن الماتىلىق ۋاتحان شاتتىق جەڭىپ الدى. سونىمەن قاتار جامبىل وبلىسى اكىمىنىڭ ارنايى جۇلدەسى شىمكەنتتىك ۇلسايا بەكتاسقا بۇيىردى. باس جۇلدە مەن ارنايى جۇلدەنى وبلىس اكىمى بەردىبەك ساپارباەۆ جەڭىمپازدارعا ءوزى تابىستادى. سونداي-اق ول كەنەن مۇراسى ماڭگىلىك ەكەنىن اتاپ ءوتىپ, بايقاۋدا ونەر كورسەتكەن جاس ونەرپازدار مەن ولاردى دايىنداعان ۇستازدارىنا العىس ءبىلدىردى. ال اۋليەاتا وڭىرىنەن قاتىسقان ەربوسىن قاسىمبەك ءبىرىنشى ورىندى يەلەنسە, ەكىنشى ورىن الماتى وبلىسىنان كەلگەن جىگەر ومارحان مەن بالقاشتىق نۇربولات ۇزاقبايعا بەرىلدى. سونداي-اق جۇلدەلى ءۇشىنشى ورىنعا تالدىقورعان قالاسىنان نۇردانا ءسالىمحان مەن تۇركىستان شاھارىنان ەلبول قۋانبەك لايىق دەپ تانىلدى. «شىرقا, داۋسىم!» بايقاۋىندا بىرقاتار قاتىسۋشى العىس حاتتارعا يە بولسا, ۇمىتكەرلەردىڭ ءبىرازى ديپلومانت اتاندى. ال بىرقاتار قاتىسۋشى «كورەرمەن كوزايىمى», «كۇمىس كومەي», «جاس ءۇمىت», «جاس دارىن» جانە «كونە تاراز» سەكىلدى اتالىمدار بويىنشا ماراپاتتالدى. سونداي-اق كەيبىر ۇمىتكەرلەر وبلىستىق مادەنيەت, ارحيۆتەر جانە قۇجاتتاما باسقارماسى مەن كەنەن ازىرباەۆ اتىنداعى وبلىستىق فيلارمونيانىڭ ارنايى جۇلدەسىن يەلەندى.
جامبىل وبلىسى
