اسەم نۇرعاليەۆا كەيىنگى كەزدەرى باسشىلىق تاراپانىنان ءجابىر كورىپ, ارىپتەستەرىمەن بىرگە قۇزىرلى ورگانعا شاعىمدانعان. الايدا تەكسەرىس بارىسى ەندى باستالعاندا ول باقيلىق بولعان.
«ول: «قاتتى كۇيزەلىستەن ميىم قايناپ ءجۇر, شىداي المايمىن, قۋدالاپ ەسىمدى شىعاردى» دەدى. 20 كۇن بۇرىن ارىپتەسىمەن بىرگە قۇزىرلى ورگاندارعا مەكتەپ ديرەكتورىنىڭ ۇستىنەن شاعىم تۇسىرگەن. ءبىلىم سالاسىنداعى باقىلاۋ دەپارتامەنتى جوسپاردان تىس تەكسەرۋ جۇرگىزىپ, مەكتەپ ديرەكتورىنىڭ زاڭعا قايشى ارەكەتتەرىن اشكەرەلەگەن», دەيدى سول مەكتەپتىڭ باستاۋىش سىنىپ مۇعالىمى ساۋلە باپينوۆا.
ءبىلىم بەرۋ سالاسىنداعى ساپانى قامتاماسىز ەتۋ دەپارتامەنتى باسشىسىنىڭ ورىنباسارى جۇمابەك قامبەتوۆتىڭ ايتۋىنشا, بارلىق فاكتى راستالعان.
«بۇل كىسى تامىز ايىندا جۇمىسقا ورنالاسقان. سول كەزدە مەكتەپتە جوندەۋ جۇمىستارى ءجۇرىپ جاتقان. مۇعالىمدەر مەكتەپتىڭ اۋلاسىن تازالاۋ جۇمىستارىنا تارتىلعان. تەكسەرۋ قورىتىندىسى بويىنشا مەكتەپ ديرەكتورىنا قاتىستى 6 اكىمشىلىك ءىس قوزعالعان. وسى كەزدە شاعىم جازعان اسەم نۇرعاليەۆا اۋرۋحاناعا ءتۇسىپ, ءبىر اپتا ەس-ءتۇزسىز جاتىپ, كوز جۇمعان», دەدى جۇمابەك قامبەتوۆ.
ال مەكتەپ ديرەكتورى ناتاليا كارپوۆا دارىگەرلەردىڭ ءولىم تۋرالى انىقتاما قورىتىندىسىنا سۇيەنىپ, ءوزىن كىنالى دەپ سانامايدى.
«ول مينينگيتتەن قايتىس بولدى. بۇل جۇقپالى اۋرۋ. ال مەكتەپتەگى پسيحولوگيالىق احۋالدى اۋىر دەپ ەسەپتەمەيمىن. ەشكىمگە قىسىم كورسەتىلگەن جوق», دەيدى مەكتەپ ديرەكتورى ناتاليا كارپوۆا.
مارقۇمنىڭ تۋىستارى دارىگەردىڭ قورىتىندىسىمەن كەلىسپەي وتىر.
«دەنە قىزۋى كوتەرىلىپ, ورۆي بولعاندا ميدىڭ ءىسىنۋى بولادى دەدى. دارىگەردىڭ بىزگە العاش ايتقانى وسىنداي دياگنوز بولدى. ال ەندى مەنينگيت بولعان جاعدايدا, نەگە دارىگەرلەر انا مەكتەپتى جاپپايدى. مەنينگيتتىڭ ءوزى دە جۇقپالى اۋرۋ عوي», دەدى مارقۇمنىڭ ناعاشى اپاسى.
وسى جاعدايدان كەيىن وسكەمەن قالاسىنىڭ ءبىلىم باسقارماسى مەكتەپ ديرەكتورىن قىزمەتىنەن بوساتۋ تۋرالى شەشىم قابىلداعان.
