ماجىلىسكە «2021-2023 جىلدارعا ارنالعان رەسپۋبليكالىق بيۋدجەت تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى ۇكىمەتتىك جوبا تانىستىرىلدى. زاڭ جوباسىنىڭ تانىستىرىلىمى پالاتانىڭ قارجى جانە بيۋدجەت كوميتەتىندە ءوتتى. ءىس-شاراعا دەپۋتاتتارمەن قاتار, بەينەكونفەرەنتسيا بايلانىسى ارقىلى مەملەكەتتىك ورگانداردىڭ, ۇلتتىق بانكتىڭ, «اتامەكەن» ۇكپ, قازاقستان قارجىگەرلەر قاۋىمداستىعىنىڭ وكىلدەرى, سونداي-اق ءماجىلىس جانىنداعى پارتياارالىق كەڭەستىڭ مۇشەلەرى – پارلامەنتكە ۇسىنىلماعان Adal, «اۋىل» جانە جسدپ پارتيالارىنىڭ وكىلدەرى قاتىستى. وتىرىستا رەسپۋبليكالىق بيۋدجەت پارامەترلەرىن ناقتىلاۋ تۋرالى قارجى مينيسترi ەرۇلان جاماۋباەۆ جانە ۇلتتىق ەكونوميكا ۆيتسە-ءمينيسترى ازامات ءامرين باياندادى.
زاڭ جوباسىن ازىرلەۋشىلەردىڭ تۇسىندىرمەلەرىنە سايكەس, بيۋدجەتتى ناقتىلاۋ شەڭبەرىندە Nur Otan پارتياسىنىڭ سايلاۋالدى تۇعىرناماسىندا بەلگىلەنگەن بىرقاتار مىندەتتى شەشۋ جانە مەملەكەت باسشىسىنىڭ قازاقستان حالقىنا جولداۋلارىندا ايتىلعان باسىم باعىتتاردى ىسكە اسىرۋ جوسپارلانىپ وتىر. سونداي-اق قوسىمشا قاراجات كوروناۆيرۋس ينفەكتسياسىمەن كۇرەسۋگە باعىتتالادى.
تۇسىمدەر بويىنشا بولجام 1,1 ترلن تەڭگەگە ۇلعايا وتىرىپ 12,6 ترلن تەڭگە بولجانۋدا. تاپشىلىق ءىجو-گە 3,5% دەڭگەيىندە جوسپارلاندى. 2021 جىلى رەسپۋبليكالىق بيۋدجەتتىڭ شىعىستارى 1,3 ترلن تەڭگەگە ءوسىپ, 15,3 ترلن تەڭگەنى قۇرايدى.
ەلدىڭ 2021-2025 جىلدارعا ارنالعان الەۋمەتتىك-ەكونوميكالىق دامۋ بولجامى شەڭبەرىندە 2021 جىلعا ارنالعان ماكروەكونوميكالىق كورسەتكىشتەردى ناقتىلاۋ كەزىندە نومينالدى ءىجو 2021 جىلى 77 869 ملرد تەڭگە كولەمىندە بولجانادى, بۇل ماقۇلدانعان بولجامنان 1 207 ملرد تەڭگەگە جوعارى. ناقتى ءىجو 103,1% دەڭگەيىندە بولجانادى. جان باسىنا شاققانداعى ءىجو 9 655 مىڭ اقش دوللارىن قۇرايدى.
بيۋدجەتتىك زاڭ جوباسىن تالقىلاۋ قارجى جانە بيۋدجەت كوميتەتىنىڭ مۇشەسى اناتولي بويچين باستاعان جۇمىس توبىندا جالعاسادى. ونىڭ قۇرامىنا ءماجىلىس جانىنداعى پارتياارالىق كەڭەستىڭ دە مۇشەلەرى كىردى.
– ءماجىلىستىڭ قۇرامىنا كىرمەگەن پارتيالاردىڭ پارتياارالىق كەڭەس شەڭبەرىندە جۇمىس ىستەپ جاتقان دەپۋتاتتارمەن, ساراپشىلارمەن, ۇەۇ-مەن قاتار جۇمىس توپتارىنا قاتىسۋعا قۇقىعى بار. ءبىز مۇنداي مۇمكىندىك بەرىلگەنى ءۇشىن زور العىس بىلدىرگىمىز كەلەدى. ءبىزدىڭ ساراپتامالىق توپ رەسپۋبليكالىق بيۋدجەتكە تۇزەتۋلەر ەنگىزۋ جۇمىسى بارىسىندا بيۋدجەتتىك باعدارلامالاردىڭ ءاربىر اكىمشىسىمەن ەگجەي-تەگجەيلى پىسىقتايتىن بولادى, – دەدى Adal پارتياسىنىڭ حاتشىسى ءانۋار كەرەمباەۆ.
– پارتياارالىق كەڭەس ءوز قاجەتتىلىگىن دالەلدەدى. قازىر رەسپۋبليكالىق بيۋدجەتتى تۇزەتۋ ماسەلەسى تالقىلانۋدا. بۇل ەكونوميكاداعى جاعدايدى جاقسارتۋعا بايلانىستى ماسەلەلەردىڭ جيىنتىعى, – دەدى «اۋىل» حالىقتىق-دەموكراتيالىق پاتريوتتىق پارتياسى توراعاسىنىڭ ءبىرىنشى ورىنباسارى تولەۋتاي راحىمبەكوۆ. سونىمەن قاتار ت.راحىمبەكوۆ بۇل بيۋدجەتتىڭ اتقارىلۋىنا پارلامەنتتىك باقىلاۋدى, بيۋدجەت اقشاسىنىڭ ماقساتتى جۇمسالۋىنا باقىلاۋدى كۇشەيتۋگە جانە وسى ءوسىم سومالارىنىڭ نەگە باعىتتالعاندىعىنا نازار اۋدارۋعا بولاتىنىن اتاپ ءوتتى.
ال جالپىۇلتتىق سوتسيال-دەموكراتيالىق پارتياسىنىڭ وكىلى قۋات كۇنبولاتوۆ وتىرىسقا بەينەبايلانىس ارقىلى قوسىلىپ, ينفلياتسيا ماسەلەلەرىنە نازار اۋداردى.
ايتا كەتۋ كەرەك, پارتياارالىق كەڭەس ءبىر اي بۇرىن ءماجىلىس توراعاسى نۇرلان نىعماتۋليننىڭ باستاماسىمەن قۇرىلدى. بۇگىندە كەڭەس مۇشەلەرى – قازاقستاندا تىركەلگەن بارلىق پارتيالاردىڭ وكىلدەرى ءماجىلىستىڭ قاراۋىنداعى زاڭ جوبالارى بويىنشا جۇمىسقا قاتىسۋدا.
قازىرگى ۋاقىتتا ءماجىلىس جۇمىسىنداعى وزەكتى زاڭ جوبالارىنىڭ قاتارىندا «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى, ونەركاسىپتىك ساياسات تۋرالى زاڭ جوبالارى بار.
ءماجىلىس مۇنداي جۇمىس نىسانى زاڭ شىعارۋ پروتسەسىن ءتيىمدى, اشىق جانە مەملەكەت باسشىسى باستاماشىلىق ەتكەن «حالىق ۇنىنە قۇلاق اساتىن مەملەكەت» تۇجىرىمداماسىمەن ۇيلەسىمدى ەتۋگە مۇمكىندىك بەرەتىنىنە سەنىمدى.
