ارال تەڭىزىنىڭ قۇرعاعان تابانىنىڭ كولەمى 4,6 ملن گەكتاردى قۇرايدى. ونىڭ 2,2 ملن گەكتارى قازاقستانعا, 2,3 ملن گەكتارى وزبەكستانعا تيەسىلى. جىل سايىن تەڭىز ۇلتانىنان 100 ملن توننا تۇز بەن شاڭ شىعىپ مىڭداعان شاقىرىمعا تارالادى. ءبىر ءتۇپ سەكسەۋىل 4 توننا كوشكىن قۇمدى توقتاتۋعا ىقپال جاسايدى.
«ارال ماڭىنداعى ەكولوگيالىق اپات ايماعى مەملەكەت باسشىسى قاسىم-جومارت توقاەۆتىڭ ەرەكشە باقىلاۋىندا. تەڭىز تابانىنىڭ تۇزى مەن جىلجىمالى قۇمىن تۇراقتاندىرۋدىڭ ەكولوگيالىق ءتيىمدى جانە قاۋىپسىز جولى – بايىرعى وسىمدىكتەر ەگۋ. سوندىقتان 2008 جىلدان بەرى رەسپۋبليكالىق جانە جەرگىلىكتى بيۋدجەت ەسەبىنەن, دۇنيەجۇزىلىك بانك, عالامدىق ەكولوگيالىق قور كومەگىمەن ارالدىڭ قۇرعاعان تابانىندا 195 مىڭ گەكتاردان اسا جەرگە سەكسەۋىل وتىرعىزىلدى. وسىنداي جۇمىستى وزبەكستان دا جۇرگىزىپ جاتىر», دەدى ماعزۇم مىرزاعاليەۆ.
مينيستر ارال ماڭىنىڭ ەكولوگيالىق تۇراقتى دامۋىنا ىقپال جاساۋ ءۇشىن بيىل «ارال ماڭىنىڭ ەكولوگيالىق باعدارلانعان ايماقتىق دامۋى» اتتى ايماقتىق جوبا باستالعانىن اتاپ ءوتتى. وعان گەرمانيانىڭ ەكونوميكالىق ارىپتەستىك جانە دامۋ فەدەرالدى مينيسترلىگى 8 ملن ەۋرو قارجى بولگەن.
جوبا 2024 جىلدىڭ ماۋسىم ايىنا دەيىن قاراقالپاقستادا, وزبەكستاننىڭ حورەزم وبلىسىندا جانە قازاقستاننىڭ قىزىلوردا, ماڭعىستاۋ وبلىستارىندا جۇزەگە اسىرىلادى.
«ارال تابانىنداعى قۇرعاعان جەرلەردى ورمانداندىرۋ ءۇشىن پرەزيدەنتتىڭ 2 ملرد اعاش ەگۋ تاپسىرماسى اياسىندا ءبىز 2025 جىلعا دەيىن 213 مىڭ گەكتار اۋماققا سەكسەۋىل ەگۋدى جوسپارلادىق. بۇگىن فيتوورمانمەليوراتسيالىق جۇمىستارمەن تانىسىپ, 1 مىڭ گەكتارعا 1,8 ملن كوشەت وتىرعىزىلعانىن بايقاپ وتىرمىز. اعاش ەگۋ جۇمىسى كۇزدە جالعاسادى. جىلدامدىقتى ارتتىرامىز», دەپ مالىمدەدى مينيستر.
ايتا كەتەيىك, ارال اۋدانىنداعى ساپار بارىسىندا ماعزۇم مىرزاعاليەۆ جەرگىلىكتى عالىمدارمەن جانە تۇرعىندارمەن كەزدەسىپ, وڭىردەگى تۇيتكىلدى پروبلەمالار مەن ەكولوگيا ماسەلەلەرىنە قاتىستى ۇسىنىستارىن تىڭدادى. عالىمدار ءوز كەزەگىندە ارالدىڭ ەكولوگيالىق پروبلەمالارىن شەشۋ جۇمىستارىنا اتسالىسۋعا دايىن ەكەندەرىن جەتكىزدى.
