مىسالى, ەگەر قالا سىرقاتتانۋشىلىق دەڭگەيى بويىنشا «قىزىل» ايماقتا بولسا, وندا «Ashyq» قوسىمشاسىن قولداناتىن بيزنەس يەلەرى «سارى» ايماق ءۇشىن كوزدەلگەن شارتتار بويىنشا جۇمىس ىستەي الادى.
بۇگىنگى تاڭدا جوبا نۇر-سۇلتان بويىنشا 135 كاسىپكەرلىك سۋبەكتىسىن بىرىكتىردى. ولارعا فيتنەس جانە سپا, ساۋنا, باسسەين, بوۋلينگ, كومپيۋتەرلىك كلۋبتار مەن قوعامدىق تاماقتانۋ ۇيىمدارى كىرەدى. ايتا كەتۋ كەرەك, بۇل كاسىپورىندار وتكەن جىلى توتەنشە جاعداي جاريالانعاننان كەيىن جابىلىپ, توقتاتىلدى. «Ashyq» قوسىمشاسى توقتاپ قالعان كاسىپورىندارعا جۇمىسىن قايتا باستاۋعا مۇمكىندىك بەرەدى.
«Ashyq» پيلوتتىق جوباسىنىڭ باستى ماقساتى – كەلۋشىلەر مەن قىزمەتكەرلەردىڭ قاۋىپسىزدىگىن قامتاماسىز ەتۋ. سەبەبى بارلىق ازاماتتار قوعامدىق ورىندارعا بارۋ ارقىلى ءوزىن-ءوزى وقشاۋلاۋ رەجيمىن ساقتامايدى جانە وسىلايشا ۆيرۋستىڭ تارالۋ قاۋپىن تۋدىرادى. سونىمەن قاتار كارانتين كەزەڭىنىڭ باسىنان باستاپ قىزمەتىن قايتا باستاي الماعان كاسىپكەرلەرگە ەپيدەميولوگيالىق جاعدايدى باعالاۋ ماتريتساسىنىڭ بەلگىلى ءبىر ايماعىندا بولۋىنا بايلانىستى بىرتىندەپ نەمەسە تولىعىمەن جەڭىلدىكتەرمەن جۇمىس ىستەۋگە مۇمكىندىك بەرىلەدى.
ءموبيلدى قوسىمشانى قولدانۋ جەڭىل. قوعامدىق ورىنعا كىرەبەرىستە پايدالانۋشى ارنايى QR-كودتى سكانەرلەپ, ونى اكىمشىگە كورسەتەدى. كود كەلۋشىنىڭ مارتەبەسىن (ستاتۋس) انىقتايدى. مارتەبە پتر-زەرتتەۋلەردىڭ بىرىڭعاي ينتەگراتسيالىق پورتالى جانە قر دەنساۋلىق ساقتاۋ مينيسترلىگىنىڭ COVID-19 باقىلاۋ ورتالىعى سياقتى اقپاراتتىق جۇيەلەرمەن سالىستىرۋ نەگىزىندە بەرىلەدى. ءار تۇسكە سايكەس مارتابە كەلەسىدەي ماعىنا بەرەدى:
«قىزىل» مارتەبە پتر-تەست تاپسىرىپ, كوروناۆيرۋس انىقتالعان ادامعا بەرىلەدى. مۇنداي مارتەبە يەلەرى ۇيدە وقشاۋلانۋ رەجيمىن قاتاڭ ساقتاۋى ءتيىس.
«سارى» – بايلانىستا بولعان ادامدارعا بەرىلەتىن مارتەبە. ولارعا ازىق-ت ۇلىك الۋعا نەمەسە ءۇيدىڭ جانىنداعى دارىحاناعا بارۋعا رۇقسات ەتىلگەنمەن, باسقا قوعامدىق ورىندارعا بارۋعا تىيىم سالىنادى.
«كوك» — اۋرۋ جۇقتىرعان ادامدارمەن بايلانىستا بولعان ادامدار ەسەبىندە جوق, پتر-تەست (مىسالى اۋەجايدا) تالاپ ەتىلەتىن جەرلەردەن باسقا كەز كەلگەن جەردە ەركىن قوزعالۋ دەگەندى بىلدىرەدى.
«جاسىل» – ءجۇرىپ-تۇرۋدا شەكتەۋ جوعىن بىلدىرەدى, مۇنداي ادام بازادا COVID-19 ىندەتىنە پتر-تەستىلەۋى تەرىس ناتيجە شىققان پايدالانۋشى بولىپ شىعادى.
ەلوردا قازىر «قىزىل ايماقتا» ورنالاسقان. الايدا, «Ashyq» قوسىمشاسى ارقىلى جۇمىس ىستەيتىن كاسىپورىندارعا دەمالىس كۇندەرى جۇمىس ىستەۋىنە رۇقسات ەتىلەدى. ياعني فيتنەس جانە سپا, ساۋنا, باسسەين, بوۋلينگ, كومپيۋتەرلىك كلۋبتار مەن قوعامدىق تاماقتانۋ ۇيىمدارىنا بارۋعا بولادى. بۇل قالاداعى ەپيدەميولوگيالىق جاعدايعا قالاي اسەر ەتەدى؟
«Ashyq» قوسىمشاسى بويىنشا جۇمىس جانە دەمالىس كۇندەرى جۇمىس ىستەيتىن وبەكتىلەر قالا بويىنشا ىندەتتىڭ تارالۋىنا ەش اسەر ەتپەيدى. بۇل كەلۋشىنىڭ QR-كودىن ەنگىزگەننەن كەيىن قىزىل نەمەسە سارى مارتەبە انىقتالعان جاعدايدا, نىسانعا كىرۋگە رۇقسات ەتىلمەۋىمەن بايلانىستى. تەك ءساۋىر ايىندا نۇر-سۇلتان قالاسى بويىنشا «Ashyq» جوباسىنا قاتىسۋشى وبەكتىلەردەن 212 ءۇي كارانتينىن بۇزۋشى انىقتالدى, ونىڭ ىشىندە 99 ناۋقاس جانە 113 بايلانىستا بولعان ادام بار.
14 ساۋىردەن باستاپ پيلوتتىق جوباعا كينوتەاترلار جانە قوعامدىق تاماقتانۋ (بانكەت زالدارى, اسحانا, فاست-فۋد جانە ستريت-فۋدتار تۇرىندەگى نىسانداردان بولەك) نىساندارى, تەاترلار, فيلارمونيالار جانە ەرىكتى قاتىسۋشىلار قوسىلدى. ال 21 ساۋىردەن باستاپ – وبلىسارالىق جانە قالالىق تۇراقتى ەمەس (تۋريستىك) جولاۋشىلار تاسىمالى, بيليارد كلۋبتارى مەن كونتسەرت زالدارى.
قازىرگى ۋاقىتتا «Ashyq» قوسىمشاسىنا تىركەلىپ, ءوز كاسىبىن قايتا جانداندىرعىسى كەلەتىن كاسىپكەرلەردىڭ سانى ارتىپ كەلەدى.
بۇگىنگى كۇنى بيزنەس سۋبەكتىلەرى ءۇشىن جوباعا قاتىسۋ ەرىكتى تۇردە جۇرگىزىلەدى.
قالاداعى ەپيدەميولوگيالىق جاعداي تۇراقسىز بولىپ قالۋدا. وسىعان بايلانىستى, نۇر-سۇلتان قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى تۇرعىنداردى بارلىق شەكتەۋ شارالارى مەن سانيتارلىق نورمالاردى ساقتاۋعا شاقىرادى. اسىرەسە, ينفەكتسيانىڭ تارالۋىن تومەندەتۋگە جانە اۋرۋ قاۋپىن ازايتۋ ماقساتىندا ءۇي كارانتينىندەگى ادامدار مەن كاسىپكەرلىك سۋبەكتىلەرگە سانيتارلىق دارىگەردىڭ ۇسىنىستارىن قاتاڭ ساقتاۋ تالاپ ەتىلەدى.
