مىسالى, شىمكەنت قالاسىنداعى كەڭەس وداعىنىڭ باتىرى سابىر راحيموۆ اتىنداعى «جاس ۇلان» رەسپۋبليكالىق مەكتەبىنىڭ كۋرسانتتارى 58 بالا تاربيەلەنىپ جاتقان №3 بالالار ۇيىندە سەنبىلىك وتكىزدى. كۋرسانتتار بالالارمەن بىرگە تاڭەرتەڭگىلىك جاتتىعۋ جاساپ, مەكەمەنىڭ اۋماعىن تازالاپ, اباتتاندىردى. ء«بىز اتا-اناسىنىڭ قامقورلىعىنسىز قالعان بالالاردىڭ ءبىلىم الۋىنا جانە دامۋىنا ۇنەمى ءوز ۇلەسىمىزدى قوسۋعا تىرىسامىز», دەدى شىمكەنت قالاسىنداعى «جاس ۇلان» رەسپۋبليكالىق مەكتەبىنىڭ باستىعى, پولكوۆنيك عازيز تولەۋشەۆ. ايتا كەتۋ كەرەك, «جاس ۇلان» مەكتەبى مەن بالالار ءۇيىنىڭ اراسىنداعى دوستىق قاتىناس بىرنەشە جىلدان بەرى جالعاسىپ كەلەدى. ءداستۇر بويىنشا جىل سايىن اسكەري مەكتەپتىڭ اسكەري قىزمەتشىلەرى مەكەمەگە قولدان كەلگەنشە كومەك كورسەتەدى.
جامبىل وبلىسىندا قازاقستان حالقى اسسامبلەياسى انالار كەڭەسىنىڭ باستاماسىمەن «ىزگىلىك ايى» قايىرىمدىلىق ءىس-شارالار تسيكلى جالعاسۋدا. حالىقتىڭ وسال توپتارىنان, از قامتىلعان جانە كوپ بالالى وتباسىلاردان شىققان بالالارعا ارنالعان قايىرىمدىلىق اكتسياسىن ەاەو «سانا سەزىم» ايەلدەر باستامالارىنىڭ قۇقىقتىق ورتالىعى جانە بۇۇ بالالار قورى (يۋنيسەف) قولدادى. وبلىستىق اسسامبلەيا جانىنداعى انالار كەڭەسىنىڭ وكىلى لولا داۆلاتوۆا جوعارىدا اتالعان قايىرىمدىلىق ۇيىمدارىنىڭ كومەگىمەن 44 بالاعا كومەك كورسەتكەندەرىن اتاپ ءوتتى. ء«ار بالاعا 200 مىڭ تەڭگەنىڭ وقۋ قۇرالدارى مەن جەكە گيگيەنا زاتتارىن, ياعني كۇندەلىكتى مەكتەپ جانە سپورت كيىمدەرىنە ارنالعان سومكەلەر تاراتىلدى», دەيدى اسسامبلەيا وكىلى. سونىمەن قاتار «سانا سەزىم» ايەلدەر باستامالارىنىڭ قۇقىقتىق ورتالىعى بالالار مەن اتا-انالاردىڭ قۇجاتتارىن راسىمدەۋگە كومەكتەسۋدە. اكتسيانى ۇيىمداستىرۋشىلار «ىزگىلىك ايى» قايىرىمدىلىق ءىس-شارالار تسيكلى رامازان ايىنىڭ سوڭىنا دەيىن جالعاساتىنىن ايتادى.
ال باتىس قازاقستان وبلىسىندا بوكەي وردا اۋدانىنىڭ مۇراتساي اۋىلىندا ا.قۇسايىنوۆ اتىنداعى مەكتەپتىڭ 2001 جىلعى تۇلەكتەرى جالعىزباستى انا قانيسا مۇساعاليەۆاعا باسپانا سىيلادى. «ەكى بالام بار, ەكەۋى دە باستاۋىش سىنىپتا وقيدى. ءوزىمىزدىڭ باسپانامىز جوق ەدى. قامقور ادامداردىڭ ارقاسىندا شاعىن وتباسىمىزعا جارامدى ءۇيىمىز پايدا بولدى. مۇقتاج جانداردىڭ تاعدىرىنا بەي-جاي قارامايتىن بارشا ادامدارعا تاعى دا العىس ايتقىم كەلەدى», دەدى قانيسا مۇساعاليەۆا.
سولتۇستىك قازاقستان وبلىسىندا «ازاماتتارعا ارنالعان ۇكىمەت» مەملەكەتتىك كورپوراتسياسى وڭىرلىك فيليالىنىڭ قىزمەتكەرلەرى قاراۋسىز قالعان جانۋارلارعا باسپانا ۇسىناتىن «بەلىي بيم» مەكەمەسىنە كومەك جاسادى. ەرىكتىلەردىڭ قاراجاتىنا سالىنعان باسپانادا 400-دەن استام يت بار. مەملەكەتتىك كاسىپورىن قىزمەتكەرلەرى 60 كيلو قۇرعاق جەم, 20 كيلو جارما بوتقاسى مەن شىنجىر, قارعىباۋ, كارابين سياقتى كەرەك-جاراقتارىن اپارىپ بەردى. ء«بىز الەۋمەتتىك جەلىدەگى «بەلىي بيم» مەكەمەسىنىڭ كومەك سۇراعان ۇندەۋىنە ءۇن قوسۋ كەرەك دەپ شەشتىك. وسى مەكەمەگە تۇراقتى كومەكتەسىپ جۇرگەن ەرىكتىلەردىڭ ءبىرى – ءبىزدىڭ ارىپتەسىمىز. ساتىپ العان زاتتاردى سول ادام ارقىلى بەرىپ جىبەردىك. ءبىز الداعى ۋاقىتتا دا وسى ۇيىمعا كومەكتەسە بەرەمىز» دەيدى فيليالدىڭ HR-مەنەدجەرى ەرمەك جاكين.
ەسكە سالا كەتەيىك, «قايىرىمدى ىستەر مارافونى» جالپىۇلتتىق جوباسى وسى جىلدىڭ اقپان ايىندا مەملەكەت باسشىسى قاسىم-جومارت توقاەۆتىڭ باستاماسىمەن قازاقستان تاۋەلسىزدىگىنىڭ 30 جىلدىعىن مەرەكەلەۋ اياسىندا باستالعان بولاتىن. جوبانىڭ ەڭ ماڭىزدى مىندەتتەرىنىڭ ءبىرى – قايىرىمدى ازاماتتار مەن ۇيىمداردىڭ باسىن قوسىپ, قوعام ءومىرىن جاقسى جاعىنا وزگەرتۋگە مۇمكىندىك بەرەتىن جومارتتىق پەن مەيىرىمدىلىك يدەياسىنا نەگىزدەلگەن قوعامداستىقتى بىرگە قۇرۋ. مارافونعا كەز كەلگەن ادام #قايىرىمدى ىستەر مارافونى #مارافوندوبرىحدەل رەسمي حەشتەگتەرى بويىنشا الەۋمەتتىك جەلىدە ءوز يگى ىستەرىمەن ءبولىسۋ ارقىلى قوسىلا الادى. بارلىق ۇيىمداستىرۋشىلىق سۇراقتارى بويىنشا ۇيلەستىرۋشىلەرمەن +7 7172 22 12 24 تەلەفون ءنومىرى بويىنشا نەمەسە ينستاگرامداعى @qaiyrymdy_ister_marafony اككاۋنتى ارقىلى بايلانىسا الاسىزدار.
