اق ءۇي بيلىگى كليمات داعدارىسىمەن كۇرەسۋ ءۇشىن مۇنداي قادام قاجەتتى دەپ ەسەپتەيدى. وسى اپتادا وتەتىن كليمات ءسامميتى اقش پرەزيدەنتى دجو بايدەننىڭ باستاماسىمەن ۇيىمداستىرىلماق. ءىس-شارا بەينەكونفەرەنتسيا رەجىمىندە وتەدى. وسىعان وراي, اق ءۇي اقش-تىڭ 2030 جىلعا دەيىن پارنيكتى گازدار كولەمىن 2005 جىلعى دەڭگەيدەن 50 پايىزعا ازايتاتىنىن حابارلادى.
اق ءۇي اكىمشىلىگىنىڭ قىزمەتكەرى The Guardian گازەتىنە بەرگەن سۇحباتىندا اقش-تىڭ بۇعان دەيىنگى پرەزيدەنتتىڭ شەشىمدەرىنەن باس تارتاتىنىن جەتكىزگەن. سونداي-اق كۇتۋگە ۋاقىت جوق ەكەنىن, ءدال قازىر ارەكەت ەتۋ قاجەتىنە ەكپىن بەرگەن.
ايتا كەتەرلىگى, اقش-تىڭ ەكس-پرەزيدەنتى دونالد ترامپ پاريج كەلىسىمىنەن شىعاتىنىن مالىمدەگەن ەدى. ەندى دجو بايدەن اكىمشىلىگى بۇرىنعى باسشىنىڭ كەمشىلىگىن جۋىپ-شايىپ, قايتادان حالىقارالىق قوعامداستىقتىڭ سەنىمىن يەلەنۋدى كوزدەيدى.
اق ءۇي بۇگىنگە دەيىن كانادانىڭ, ارگەنتينانىڭ, جاپونيانىڭ پارنيكتى گازدار شىعارۋ كولەمىن ازايتۋعا كومەكتەسكەنىن ايتادى. سونداي-اق ۇلىبريتانيا سەكىلدى باسقا ەلدەرگە قولۇشىن سوزۋعا ءازىر.
الەمدەگى كومىرتەگى گازىن شىعارۋ بويىنشا ەڭ ءبىرىنشى ورىندا تۇرعان قىتاي بۇل شەشىمگە كۇمانمەن قارايدى. ايتسە دە, ەل باسشىسى سي تسزينپين كليماتتىڭ جىلىنۋى جونىندەگى سامميتكە قاتىسادى.
بۇۇ باس حاتشىسى انتونيو گۋتەرريشتىڭ ايتۋىنشا, اقش-تىڭ پارنيكتى گازداردى 50 پايىزعا تومەندەتۋى پلانەتانىڭ كليمات داعدارىسىنا ۇشىراۋىن توقتاتۋى قاجەت. عالىمدار الەم 2030 جىلعا قاراي شىعارىندىلاردى ەكى ەسەگە ازايتۋى كەرەگىن ەسكەرتىپ وتىر.
