بىراق كاسىپكەرلىك تە جالىنا قول, ساۋىرىنا قامشى تيمەگەن اساۋ سەكىلدى ىرىققا كونە قويمايتىن سالا. مۇنى ومىرلىك جارىمەن بىرگە بەس بالا تاربيەلەپ وتىرعان نۇراينا اسىلبەكقىزى جوققا شىعارمايدى. وتاعاسىمەن اقىلداسقان ول كاسىپكەرلىگىن اۋىل شارۋاشىلىعى سالاسىندا باستاۋعا بەل بۋىپ, «اۋىل شارۋاشىلىعىن قارجىلاي قولداۋ قورى» اق ارقىلى نەسيەسىن كەپىلدەندىرىپ وتىر.
– وتاعاسىنىڭ جالاقىسىن, بەس بالا ءۇشىن بەرىلەتىن جاردەماقىنى مىسە تۇتىپ, وتىرا بەرۋگە بولاتىن ەدى. الايدا بالالار ءوسىپ كەلە جاتىر. ۇلكەنىمىز – ستۋدەنت, ودان كەيىنگىسى كوللەدج بىتىرگەلى وتىر. كەيىنگىلەرى مەكتەپتە وقيدى. ولاردى ەڭبەك ەتۋگە باۋلۋ قاجەت. ونىڭ ۇستىنە ءوزىم اۋىلدا وسكەندىكتەن, ءتورت ت ۇلىكتى جاقسى كورەمىن. بۇل ويىمدى وتاعاسى دا قولدادى, – دەيدى نۇراينا نۇرحاتوۆا. – بۇل كاسىپكەرلىگىمدى اۋىل شارۋاشىلىعى سالاسىندا باستاۋىما ىقپال ەتتى.
دەگەنمەن قارجىنىڭ جوقتىعى قولبايلاۋ بولىپتى. بانكتىڭ پايىزى جوعارى نەسيەسىن الۋعا تاۋەكەل ەتپەدى. ءسويتىپ «قارجىگەر» نەسيە سەرىكتىگىنەن 6 ملن 945 مىڭ تەڭگە قارجى الدى. الايدا بۇل قارجىعا كەپىلدىك قاجەتتىگى تۋىندادى.
– سول سەبەپتەن, «اۋىل شارۋاشىلىعىن قارجىلاي قولداۋ قورى» اق-نىڭ اتىراۋ وبلىستىق فيليالىنا جۇگىندىم. قور ماماندارى 5 ملن 970 مىڭ تەڭگەنى كەپىلدەندىرۋ تۋرالى قۇجات راسىمدەدى. بۇل – مەن العان قارجىنىڭ 86 پايىزى. العاش رەت كاسىپ باستاعانعا وسىنداي قولداۋ كورسەتىلگەنىنە قۋاندىم. ايتپەسە, بانكتى ايتپاعاندا, نەسيە سەرىكتەستىگىنىڭ وزىنەن نەسيە الا الماۋىم مۇمكىن ەدى, – دەيدى نۇراينا اسىلبەكقىزى.
ويعا العان ءىسىن تەزىرەك باستاۋدى كوزدەگەن ول بىلتىرعى قاڭتاردا «نۇراينا» جەكە كاسىپكەرلىگىن تىركەتىپ, 9 ىنگەن ساتىپ الدى. ارينە, ءتورت ت ۇلىكتىڭ تورەسىنە بالانعان تۇيەگە دە جايىلىم كەرەك. سول سەبەپتەن, 800 گەكتار جەردى 10 جىلعا الىپ وتىر.
– ماقساتىمىز – بالالارىمىزدى ەڭبەككە تاربيەلەۋ. بالالارىمىزعا ماڭداي تەرمەن تاپقان ناننىڭ ءدامى ءتاتتى بولاتىنىن ۇعىندىرساق دەيمىز. بيىل كوللەدج بىتىرەتىن ۇلىمىز بەكسۇلتان كاسىبىمىزدى دامىتۋعا ىنتا ءبىلدىرىپ وتىر, – دەيدى اۋىل شارۋاشىلىعى سالاسىندا كاسىبىن باستاعان كوپ بالالى انا.
ونىڭ ىسكە اسىرۋدى كوزدەگەن جوسپارى دا كوپ. سونىڭ ءبىرى – بولاشاقتا تۇيە ءسۇتىن وڭدەيتىن شاعىن تسەح اشۋ.
– قازىر تۇيە سۇتىنەن دايىندالاتىن شۇباتقا سۇرانىس ارتىپ كەلەدى. سوندىقتان قولعا العان ءىسىمىز ىلگەرى باسارىنا سەنەمىن. بالكىم, ءبىز دە ءسۇت وڭدەۋ تسەحىن ىسكە قوسۋىمىز مۇمكىن. سول كەزدە جۇمىس ورىندارىن اشاتىن بولامىز, – دەيدى ن.نۇرحاتوۆا.
نۇراينا سەكىلدى كاسىبىن اۋىل شارۋاشىلىعىمەن بايلانىستىرعان جاندارعا «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى بويىنشا قولداۋ كورسەتىلەدى. بۇعان «اۋىل شارۋاشىلىعىن قارجىلاي قولداۋ قورى» اكتسيونەرلىك قوعامى دا اتسالىسىپ وتىر. ماسەلەن, اتالعان قوردىڭ وڭىردەگى فيليالىنىڭ ديرەكتورى گۇلزادا شالاعۇلوۆانىڭ مالىمەتىنشە, جىل سايىن اۋىل شارۋاشىلىعى سالاسىندا كاسىپ اشقاندارعا نەسيە دە بەرىلەدى. كاسىپكەرلەر نەسيەسىنىڭ باسىم بولىگىن كەپىلدەندىرۋگە دە قولداۋ كورسەتىلىپ كەلەدى.
– قوردىڭ ۇستانىپ وتىرعان بىرنەشە ماقساتى بار. بىرىنشىدەن, بيزنەس اشۋدى جانە ونى كەڭەيتۋدى نەسيەلەندىرۋ. ەكىنشىدەن, كاسىپكەرلەرگە نەسيە سەرىكتەستىكتەرى مەن ميكروقارجىلىق ۇيىمدار, ەكىنشى دەڭگەيلى بانكتەر ارقىلى بەرىلگەن نەسيەلەردى كەپىلدەندىرۋ. ۇشىنشىدەن, مال شارۋاشىلىعىن ساقتاندىرۋدى كوزدەيدى. باستى ۇستانىم – كليەنتتەرىمىزدىڭ تابىس تابۋىمەن بىرگە, اۋىل تۇرعىندارىنىڭ شاعىن نەسيەلەۋ جۇيەسىنە قولجەتىمدىلىگى مەن تيىمدىلىگىن ارتتىرۋعا مۇمكىندىك جاساۋ. اۋىل شارۋاشىلىعى سالاسىنداعى كاسىپكەرلىكتى قولداۋعا بەرىلەتىن نەسيەنىڭ وزىندىك شارتتارى بار. ماسەلەن, سوڭعى ءۇش جىلدا ءوڭىر كاسىپكەرلەرىنە 287,2 ملن تەڭگەنىڭ نەسيەسى بەرىلدى. بۇدان بولەك 140,2 ملن تەڭگەنىڭ نەسيەسى كەپىلدەندىرىلدى, – دەيدى گ.شالاعۇلوۆا.
ونىڭ ايتۋىنشا, سوڭعى ءۇش جىلدا وبلىستا 56 جوبا بويىنشا كەپىلدەندىرۋ راسىمدەلىپتى. قور تاراپىنان جاسالىپ وتىرعان مۇنداي قولداۋ اتىراۋدا اۋىل شارۋاشىلىعى سالاسىندا كاسىبىن اشۋعا نيەتتىلەر قاتارىن كوبەيتە ءتۇستى. اسىرەسە, اسىل تۇقىمدى ءتورت ت ۇلىكتى ساتىپ الىپ, ءونىم وڭدەۋگە بەت بۇرۋ بايقالىپ وتىر.
اتىراۋ وبلىسى
