وقيعا • 21 ءساۋىر، 2021

ادام ولىمىنە اكەلگەن جول اپاتىنا كىنالى جۇرگىزۋشى بەس جىلعا سوتتالدى

23 رەت كورسەتىلدى

تۇركىستان وبلىسىندا ولىممەن اياقتالعان جول-كولىك وقيعاسى ءۇشىن كىنالى جۇرگىزۋشى بەس جىلعا سوتتالدى، دەپ حابارلايدى Egemen.kz Polisia.kz سايتىنا سىلتەمە جاساپ.

وتكەن جىلدىڭ جەلتوقسان ايىنىڭ سوڭىندا سارىاعاش-قازىعۇرت تاس جولىندا Mitsubishi Carisma جۇرگىزۋشىسى قارسى جولاققا شىعىپ كەتىپ، Opel Vectra-مەن سوقتىعىسقان ەدى.

اپات سالدارىنان Opel Vectra كولىگىنىڭ جۇرگىزۋشىسى سول جەردە قايتىس بولدى. جاراقات العان جولاۋشىلاردىڭ ءبىرى جانساقتاۋ بولىمىنە جەتكىزىلدى. الايدا، ءبىراز ۋاقىتتان كەيىن ول دا كوز جۇمعان.

وقيعا ورنىنا جەدەل-تەرگەۋ توبى قىزمەتكەرلەرى بارىپ، قاجەتتى شارالاردى جۇرگىزدى. تەكسەرۋ بارىسىندا قارسى بەتكە شىعىپ كەتكەن 45 جاستاعى جۇرگىزۋشىنىڭ الكوگولدىك ىشىمدىك ىشكەنى انىقتالدى. 

اتالعان فاكتى قازاقستان رەسپۋبليكاسى قىلمىستىق كودەكسىنىڭ 4-بولىگىنىڭ 345-1-بابى «كولىك قۇرالدارىن ماس كۇيىندە باسقاراتىن ادامداردىڭ جول قوزعالىسى ەرەجەلەرىن نەمەسە كولىك قۇرالدارىن پايدالانۋ ەرەجەلەرىن بۇزۋى» بويىنشا تىركەلدى. 

تەرگەۋ ايىپتاۋ قورىتىندىسىمەن سوتقا دەيىنگى تەرگەۋدىڭ جيناقتالعان ماتەريالدارىن پروتسەسسۋالدىق شەشىم قابىلداۋ ءۇشىن سوتقا جىبەردى.

جابىرلەنۋشى تاراپپەن تاتۋلاسۋىنا جانە سوتتالۋشىنىڭ بۇرىن سوت الدىندا جاۋاپ بەرمەۋىنە بايلانىستى Mitsubishi Carisma جۇرگىزۋشىسى سوت شەشىمىمەن بەس جىلعا باس بوستاندىعىنان ايىرىلدى.

سوڭعى جاڭالىقتار

ۇقساس جاڭالىقتار