ولار اتا قونىستارىمەن عانا ايىلداس ەمەس, ادەبي, مادەني ومىردە دە ءدام-تۇزى جاراسقان دالا كوشپەلىلەرى دەسەك بولادى. بىلتىر الەۋمەتتىك جەلىنى قىرعىزدىڭ قارشاداي عانا تالانتتى ءمۇسىنشى قىزى تاميلا ماماتوۆانىڭ تاڭعاجايىپ تۋىندىسى – زاڭعار جازۋشى شىڭعىس ايتماتوۆتىڭ الىپ ءمۇسىنى ارالاپ كەتكەن بولاتىن.
ءساتتى سكۋلپتۋرا ءبىزدى بەيجاي قالدىرمادى. دەرەۋ باۋىرلاس ەلدىڭ ءبادىزشى بەگىمىن باس گازەتىمىزگە شىعارىپ, شىن تالانتتىڭ شىعارماشىلىعى تۋراسىندا از-كەم اڭگىمە وربىتە قويعانىمىز بار. اتالعان ماقالامىزدا دا ايتتىق, ءبىزدى تاڭ-تاماشا ەتكەن ايتماتوۆ كوكەمىزدىڭ الگى الىپ ەسكەرتكىشى – ي.رەپين اتىنداعى سانكت-پەتەربۋرگ بەينەلەۋ ونەرى, ءمۇسىن جانە ارحيتەكتۋرا ينستيتۋتىن 2018 جىلى بىتىرگەن ءمۇسىنشى قىزدىڭ ديپلوم جۇمىسى عانا ەكەن.
جاسىراتىن نەسى بار, بىزدەگى ءبىر-بىرىنەن اينىماي مۇلگىگەن مۇسىندەردى كورگەندە «تاميلانىڭ شىڭعىسىنداي ەسكەرتكىش ابايىمىزدا دا بولسا» دەپ ارتىنشا ارمانداپ قالعانىمىز دا بار. ونىڭ ۇستىنە بىلتىر اباي اتامىزدىڭ 175 جىلدىق مەرەيتويى ءوتىپ جاتقانى بەلگىلى. جوعارىدا ايتقان جازبامىزدىڭ سوڭىن «حاكىمنىڭ اسقاق تۇلعاسىن شابلوننان شىعارىپ, ەركىن سومدايتىن تاميلاعا تاپسىرىس بەرسەك تالايدىڭ كوكەيىندەگى اباي الاتاۋدىڭ ارعى قاقپاسىنان الشاڭداي كىرەتىنىنە كۇمانىمىز جوق», دەپ اياقتاپپىز.
تاميلا تامىر ءبىزدىڭ ارمان-ءوتىنىشىمىزدى اياقاستى ەتپەي, از ارادا جاقسى جاڭالىعىمەن ءبولىستى. بىزدەن باسقا دا جەلى قولدانۋشىلارى شەبەرگە اباي اتامىزدىڭ ءمۇسىنىن سوعۋىن سۇراپ ءوتىنىش ايتقان بولسا كەرەك. تاميلا تولعانا كەلە ساز بالشىقتى سويلەتىپ, قازاق ءسوزى مەن ويىنىڭ, مادەنيەتى مەن ادەبيەتىنىڭ الىپ تەمىرقازىعى – اباي ءمۇسىنىن سومداپ شىعىپتى. تۋىندى شىنىمەن تاميلانىڭ تاڭعاجايىپ تۋىندىسى دەۋگە تۇرارلىق ەرەكشە قۇيىلىپ تۇسكەن. ءوزىنىڭ ايتۋىنشا, ءمۇسىنشى قىزىمىز ابايدىڭ كوپتەگەن ءمۇسىنىن قاراپ شىققان, الايدا ونىڭ اقىندىعىنان بولەك تەرەڭ ويشىل, حاكىم دارەجەسىندەگى ويلى وتىرىسى كوپ ەسكەرتكىشتەن كورىنە قويماعان. «مەن اباي تەرەڭىنە وسى تۇرعىدان ءۇڭىلدىم. ابايدىڭ ۇلدارىمەن تۇسكەن سۋرەتىنە قاراپ وتىرىپ جاۋاپتى ىسكە ۇلى قۇلشىنىسپەن كىرىسىپ كەتتىم», دەيدى ت.ماماتوۆا.
ءمۇسىن تەز ارادا ساز بالشىقتان سومدالىپ شىققانىمەن, مودەلدى قولادان قۇيۋعا قاراجات كەرەك. جەلىدە جاڭا ءمۇسىننىڭ اياقتالۋىنا اتىمتاي جومارتتىق تانىتاتىن ازاماتتار ىزدەپ جار سالدىق. سول زاماتتا-اق ارقا وڭىرىنە عانا ەمەس, الاشقا تانىمال ازامات, بەلگىلى مەتسەنات – بەكزات التىنبەكوۆ كەرى بايلانىسقا شىعىپ, قاجەتتى قاراجاتتى اۋداراتىنىن جەتكىزدى.
سونداي-اق قولادان قۇيىلعان حاكىم ءمۇسىنىن باسقا ەشقايدا ەمەس, باستاما كوتەرگەن ەل گازەتى «Egemen Qazaqstan»-عا سىيعا تارتاتىنىن ايتتى. «بۇكىل قازاق زيالىلارى باسشىلىق ەتكەن اتا باسىلىمنىڭ ارعى باستاۋىندا تۇتاس الاش يدەياسىنىڭ التىن قويناۋى – اباي تۇر. باس اقىن باس باسىلىمدا تۇرسا, قانداي عانيبەت؟!», دەگەن بەكزات مىرزا ءوزىنىڭ جومارتتىعىن عانا ەمەس, قازاق رۋحانياتى ءۇشىن قاجىرلى قايراتكەر ەكەندىگىن تانىتتى. ءوز كەزەگىندە گازەت باسشىسى دارحان قىدىرالى ءمۇسىندى ءساتتى سومداعان ءمۇسىنشى ماماتوۆاعا, جۇمىستىڭ جەمىستى اياقتالۋىنا ات سالىسىپ, رەداكتسياعا سىيعا تارتقان اتىمتاي التىنبەكوۆكە ۇجىمنىڭ عانا ەمەس, گازەتتىڭ بارلىق ويلى وقىرمانى اتىنان العىس ايتتى.
ءمۇسىندى ەلگە جەتكىزۋدە ەڭبەك ەتكەن ازاماتتار بولدى. ءبيۋستتى شەبەرحانادان الىپ شىعىپ, الماتىعا جەتكىزگەن گازەتىمىزدىڭ قىرعىزستانداعى ارناۋلى ءتىلشىسى, ارىپتەسىمىز نازاربەك بايجىگىتوۆ بولسا, ول جەردەن الماتىلىق ارىپتەستەرىمىز قارسى الىپ, نۇر-سۇلتانعا جەتكىزدى.
مىنە, كوپتەن كۇتكەن حاكىم ءبيۋستى قازاق ءسوزىنىڭ قارا شاڭىراعى تورىنە وسىلاي قۇرمەتپەن جايعاستى.
«ەي, قارا تاس! مەنىڭ سەنى قالاي سۇيەتىنىمدى سەزسەڭ عوي! سەنى قايىرىمسىز دەيتىندەردىڭ وزدەرى قاتتى!» دەپ تەبىرەنەتىن تاميلا تالانتتىڭ وسىناۋ تاڭعاجايىپ تۋىندىسىن ءبىز, تەك گازەت رەداكتسياسىنا عانا ەمەس, جالپى قازاق ەلىنە تارتقان تاماشا تارتۋى دەپ بىلدىك.
اباي – تەك قازاقتىڭ عانا قامىن ويلاعان قاتارداعى قالامگەر ەمەس, ادامزاتقا ورتاق الىپ تۇلعا, كەمەل كەمەڭگەر.
تاميلا سومداعان مۇسىنگە قاراپ وتىرعان بولساڭىز, ونىڭ ويلى جۇزىنەن «ادامزاتتىڭ ءبارىن ءسۇي, باۋىرىم دەپ» دەگەن ناقىلىن شىن ۇعاسىز.
اباي – ۇلت ايناسى. ابايدان الاشتىڭ ايقىن ديدارى كورىنەدى.
گازەت عيماراتى اباي مۇسىنىمەن ءتىپتى اسقاقتاي تۇسكەندەي. ءتىپتى اجارلانىپ كەتكەندەي!
