ەكونوميكا • 20 ءساۋىر، 2021

بيىل ەل ەكونوميكاسىنىڭ ءوسۋ بولجامى 3،1%-عا دەيىن جاقساردى

11 رەت كورسەتىلدى

قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا قازاقستاننىڭ 2021-2025 جىلدارعا ارنالعان الەۋمەتتىك-ەكونوميكالىق دامۋىنىڭ ناقتىلانعان بولجامى جانە 2021-2023 جىلدارعا ارنالعان رەسپۋبليكالىق بيۋدجەت قارالدى، دەپ حابارلايدى Egemen.kz.

ۇلتتىق ەكونوميكا ءمينيسترى اسەت ەرعاليەۆ، قارجى ءمينيسترى ەرۇلان جاماۋباەۆ جانە پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ بايانداما جاسادى.

جىل باسىنان بەرى قازاقستان ەكونوميكاسىنىڭ ءوسۋى بويىنشا جەدەل دەرەكتەردى جانە الەمدىك تاۋار نارىقتارىنداعى احۋالدى، سونداي-اق الەمدىك ەكونوميكانىڭ ءوسۋ بولجامدارىن ەسكەرە وتىرىپ، ۇكىمەت 2021 جىلعا ارنالعان الەۋمەتتىك-ەكونوميكالىق دامۋ بولجامىنىڭ كورسەتكىشتەرى مەن ينديكاتورلارىن ناقتىلادى.

ماسەلەن، 2021 جىلى ەل ەكونوميكاسىنىڭ ءوسۋ بولجامى 2،8%-دان 3،1%-عا دەيىن جاقساردى. مۇناي باعاسى باررەلىنە $50 (بۇرىن $35)، ۇلتتىق ۆاليۋتا باعامى – ءبىر دوللارعا 425 تەڭگە (بۇرىن 420 تەڭگە) دەڭگەيىندە بولجانۋدا.

سىرتقى سۇرانىستى قالپىنا كەلتىرۋ اياسىندا مەتاللۋرگياداعى ءوندىرىستىڭ نەعۇرلىم بەلسەندى ءوسۋى ەسەبىنەن وڭدەۋ ونەركاسىبىندەگى بولجامدى كورسەتكىشتەر 4،1%-دان 5،2%-عا دەيىن جاقساردى.

قۇرىلىستا بولجام 17 ملن شارشى مەتر تۇرعىن ءۇيدى پايدالانۋعا بەرۋ جوسپارىنا بايلانىستى 2،5%-دان 5%-عا دەيىن جاقساردى.

اقپارات پەن بايلانىس سالاسىندا ات قىزمەتتەرگە سۇرانىستىڭ ءوسۋى ناتيجەسىندە بولجام 3،8%-دان 6،5%-عا دەيىن ۇلعايدى.

ۇلتتىق بانكتىڭ بولجامى بويىنشا ەكسپورت $10،8 ملرد-قا – $52،2 ملرد-قا دەيىن ۇلعايادى. ينفلياتسيا بۇعان دەيىن بەكىتىلگەن 4،0-6،0% دالىزىندە ساقتالدى.

تۇزەتىلگەن ماكروەكونوميكالىق بولجام نەگىزىندە 2021 جىلعا ارنالعان رەسپۋبليكالىق بيۋدجەت پارامەترلەرىنىڭ بولجامى ناقتىلاندى.

وسى جىلعا ارنالعان ناقتىلانعان بيۋدجەت شىعىستارىنىڭ نەگىزگى باعىتتارى — Nur Otan پارتياسىنىڭ باعدارلاماسىن جانە مەملەكەت باسشىسىنىڭ 2020 جىلعى 1 قىركۇيەكتەگى قازاقستان حالقىنا ارناعان جولداۋىن ىسكە اسىرۋدى قامتاماسىز ەتۋ.

سونىمەن قاتار شىعىندار پاندەمياعا قارسى كۇرەس جونىندەگى ءىس-شارالاردى قارجىلاندىرۋعا جانە دەنساۋلىق ساقتاۋ جۇيەسىن جاڭعىرتۋعا، سونداي-اق ەكونوميكانىڭ ناقتى سەكتورىن ىنتالاندىرۋعا باعىتتالادى.

پرەمەر-مينيستر قر الەۋمەتتىك-ەكونوميكالىق دامۋىنىڭ 2021-2025 جىلدارعا ارنالعان بولجامىن جانە 2021-2025 جىلدارعا ارنالعان ناقتىلانعان رەسپۋبليكالىق بيۋدجەت تۋرالى زاڭ جوباسىن پارلامەنتكە ەنگىزۋدى تاپسىردى.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار