تاريحي جەڭىسكە قول جەتكىزدى

ماتچتان ءبىر كۇن بۇرىن وتكەن جەرەبە تارتۋ راسىمىندە جارىستىڭ ءبىرىنشى كۇنىندە كورتقا ەڭ العاش يۋليا پۋتينتسەۆا مەن جارىس قو­جايىنى, ءتۇبى ۋكراينالىق ناديا پودوروسكا شىعاتىنى بەلگىلى بول­دى. وتكەن جىلى رولان گار­روس تۋرنيرىندە ايدى اسپانعا شى­عارىپ, جارتىلاي فينالعا دەيىن جەتكەن ن.پودوروسكا ارگەن­تينانىڭ ءبىرىنشى راكەتكاسى سانالادى. سول ايتۋلى دودادا ول جەرلەسىمىز يۋ.پۋتينتسەۆانى دا جەڭىپ كەتكەنى جانكۇيەرلەردىڭ ەسىندە بولسا كەرەك. ەكىنشى ماتچ قازاقستاننىڭ 1-ءشى, الەمنىڭ 23-راكەتكاسى ەلەنا رىباكينا مەن ارگەنتينانىڭ ەكىنشى راكەتكاسى ماريا لۋردەس كارلە اراسىندا وتەتىن بولىپ بەكىتىلدى. ال ەكىنشى جارىس كۇنىندە ن.پودوروسكا مەن ە.رىباكينا, م.كارلە مەن يۋ.پۋ­تينتسەۆا جانە جۇپتىق سىندا ياروس­­لاۆا شۆەدوۆا مەن اننا دا­­نيلينا – ن.پودوروسكا مەن م.كار­لە كەزدەسۋلەرى جوسپارلان­دى.

جارىستىڭ شىمىلدىعىن اش­قان يۋليا پۋتينتسەۆا مەن نا­ديا پودوروسكا جانكۇيەرلەرگە ناعىز تارتىستى ويىن سىيلادى. ماتچ الدىندا-اق جەرلەسىمىزدىڭ بىلتىرعى رولان گارروستا كەتكەن ەسەسىن قايتارۋدى كوزدەيتىنى, پودوروسكانى ءوز ەلىندە جانە جان­كۇيەرلەرى الدىنا قالايدا جەڭىپ كەتكىسى كەلەتىنى ايدان انىق ەدى. ماتچتىڭ ءبىرىنشى پارتياسى 6:2 ەسەبىمەن ارگەنتينالىق تەننيسشىنىڭ پايداسىنا شەشىلدى. ەكىنشى پارتيادا قارسىلاسىنا قارا­عاندا ساۋاتتى ويناعان قا­زاق­ستاندىق تەننيسشى جىلدام ەسە قايتارىپ ۇلگەردى – 6:4. شەشۋشى ءۇشىنشى سەتتە يۋ.پۋ­تينتسەۆا رەيتينگتە بەكەرگە 30-ورىندا تۇرماعانىن دا­لەل­دەپ, قارسىلاسىنا بىردە-ءبىر گەيم بەرمەي 6:0 ناتيجەسىمەن قاپى قالدىردى. وسىلايشا ن.پو­دو­روسكاعا پاريجدە كەتكەن ەسەسىن قايتارعان يۋليا ءبىرىنشى ويىننان كەيىن قازاقستان قۇراماسىن ەسەپتە العا شىعاردى – 1:0.

كورتقا ەكىنشى بولىپ شىققان ەلەنا رىباكينا دۇنيەجۇزىلىك رەيتينگتە نەبارى 430-ورىندا تۇرعان ارگەنتينالىق ماريا لۋردەس كار­لەنى قالپاقپەن ۇرىپ الادى دەپ ويلاپ, ماتچ باستالماي جاتىپ-اق رىباكينانىڭ جەڭىسىنە سەنىمدى بولعانبىز. وكىنىشكە قاراي, ويىن ءبىز كۇتكەندەي وربىگەن جوق. ءبىرىنشى پارتيادا ە.رىباكينا ەكى برەيكپەن العا شىققانىمەن, قارسىلاسى تەز ارادا تارازى باسىن تەڭەستىرىپ قانا قويماي, 6:4 ناتيجەسىمەن جەڭىسكە جەتتى. ەكىنشى سەتتە ەلەنا تاكتيكاسىنا وزگەرىس ەنگىزىپ, ءوز مۇمكىندىگىن ءتيىمدى پايدالانىپ, 6:3 ەسەبىمەن تابلوداعى كور­­سەتكىشتى – 1:1-گە جەتكىزدى. ءۇشىن­شى پارتيادا ءوزىن جايسىز سەزىن­گەن رىباكينا مەديتسينالىق كومەككە دە جۇگىنۋگە ءماجبۇر بولدى. باسەكەنى ويىنداعىداي وتكىزە الماعان جەرلەسىمىز بىردە-ءبىر گەيمدە باسىمدىق تانىتا الماي, قارسىلاسىنا 6:0 ەسەبىمەن جول بەردى. ءسويتىپ ءبىرىنشى جارىس كۇنىنەن كەيىن ەسەپ تەڭەستى – 1:1.

ەكىنشى جارىس كۇنىندەگى تاڭ­عى سەسسيادا كورتقا شىققان ەلەنا رىباكينا ءبىر كۇن بۇرىن يۋ.پۋتينتسەۆادان جەڭىلگەن ناديا پودوروسكامەن كەزدەستى. كەشەگى جە­ڭىلىسىنەن ءتيىستى قورىتىندى شىعارا بىلگەن ەلىمىزدىڭ ءبىرىن­شى راكەتكاسى قارسىلاسىن ەش قيىندىقسىز ەكى سەتتە 6:4, 6:4 ەسە­بىمەن جەڭىپ, قازاقستان قۇراماسى تاعى دا العا شىعاردى. ەسەپ – 2:1.

تۇسكى سەسسياداعى يۋليا پۋ­تين­تسەۆا مەن ماريا لۋردەس كار­لە اراسىنداعى ماتچ قازاق­ستان قۇراماسى ءۇشىن جارىستى مەرزىمىنەن بۇرىن جەڭىسپەن اياق­تاۋعا, ال ارگەنتينا تەننيس­شى­لەرىنە ەسەپتى تەڭەستىرىپ, كەز­دەسۋدى جۇپتىق باسەكەگە دەيىن سوزۋعا تاماشا مۇمكىندىك ەدى. الايدا العاشقى سەتتى ءوز پايداسىنا شەشكەن (7:6) يۋليا ەكىنشى سەتتىڭ سو­ڭىندا وقىس قيمىلداپ, بالتىرىن اۋىرتىپ الدى. قازاقستان قۇراماسىنىڭ دارىگەرلەرى تەز ارادا وتانداسىمىزعا مەديتسينالىق كومەك كورسەتتى. اياعى اۋىرعانىنا قاراماستان ويىندى جالعاستىرعان پۋتينتسەۆا بۇل سەتتە 7:6 ەسەبىمەن قارسىلاسىنا جول بەردى. ۇزىلىستە تاعى دا مەديتسينالىق كومەككە جۇگىنگەن جەرلەسىمىز ءۇشىنشى سەتكە شىققانىمەن, جارىستى ءارى قاراي جالعاستىرا المادى. وسىلايشا ءتورت ويىننان كەيىن ەسەپ تەڭەسىپ (2:2), بارلىعى جۇپتىق باسەكەدە شەشىلدى.

 جالپى ەسەپ تەڭەسكەن سوڭ ار­گەنتينا تەننيسشىلەرىنىڭ قۋا­نىشىندا شەك بولمادى. قۇددى قازاقستان قۇراماسىن جەڭىپ, كەلەسى كەزەڭگە شىققانداي اسەر قالدىردى. بىراق جۇپتىق سىندا ارگەنتينا قۇراماسىنان ەكى كۇندە ەكى ويىن وتكىزىپ, ءالى قۇ­رىپ قالعان ناديا مەن ماريانى ءبىزدىڭ قۇرامانىڭ تىڭ ويىنشى­لارى – اننا دانيلينا جانە ياروسلاۆا شۆەدوۆا كۇتىپ تۇرعان ەدى. ەكى سەتكە سوزىلعان باسەكەنىڭ ءبىرىنشى سەتىندە جەرلەستەرىمىز قارسىلاستارىنا سوقىر ۇپاي ۇستاتپاي 6:0 ەسەبىمەن باسىم ءتۇستى. بىراق ەكىنشى سەتتە قارسىلاستار ءبىزدىڭ قۇرامانىڭ تەننيسشىلەرىنە ءبىراز قارسىلىق كورسەتتى. جەر­گىلىكتى جانكۇيەرلەردىڭ قولداۋىنا يە بولعان كورت قوجايىندارى ەسەپتى 5:5-كە جەتكىزگەنىمەن, قالعان ەكى گەيمدە جەڭىستى ج ۇلىپ الۋعا شامالارى كەلمەدى. قورىتىندى ەسەپ – 7:5.

جالپى ەسەپتە 3:2 ەسەبىمەن باسىم تۇسكەن قازاقستان قۇرا­ما­سىنىڭ تەننيسشىلەرى العاش رەت پلەي-وفف كەزەڭىندە جەڭىسكە جەتىپ, تاريحي جەتىستىككە قول جەتكىزدى. وسىلايشا, ءبىزدىڭ قۇراما الەمدىك توپتاعى ءوز ورنىن ساقتاپ قانا قويماي, 2022 جىلى وتەتىن ءتۋرنيردىڭ فينالدىق باسەكەسىندە ويناۋ قۇقىعىنا يە بولدى.