ايماقتار • 16 ءساۋىر، 2021

توبىل قالاسىندا وبلىستىق «جاس تۇلپار» وقۋشىلار ايتىسى ءوتتى

75 رەت كورسەتىلدى

توبىل قالاسىندا قوستاناي وبلىسى وقۋشىلارىنىڭ «جاس تۇلپار» اتتى ءداستۇرلى ايتىسى ءوتتى، دەپ حابارلايدى Egemen.kz.

ەل تاۋەلسىزدىگىنىڭ 30 جىلدىعىنا جانە ۇلى اعارتۋشى ىبىراي ءالتىنساريننىڭ 180 جىلدىعىنا وراي وبلىستىق مادەنيەت باسقارماسىنىڭ قولداۋىمەن ۇيىمداستىرىلعان وقۋشىلاردىڭ جىر دوداسىندا قوستاناي، رۋدنىي، جىتىقارا، ارقالىق قالالارى مەن بەيىمبەت مايلين، امانگەلدى، جانگەلدين، قارابالىق اۋداندارىنىڭ جاس دارىندارى باق سىناستى.

وقۋشىلار ايتىسىنىڭ قازىلار القاسىنا اقتاڭگەر اقىن ايبەك قاليەۆ توراعالىق ەتتى. ءار ءوڭىردىڭ ءۇمىتىن ۇكىلەپ كەلگەن كىلەڭ جۇيرىكتەردىڭ جىر سايىسى باستالار ساتتە ساحناعا كوتەرىلءىپ «جاس تۇلپاردىڭ» تاريحىن ءبىر شولىپ وتكەن وبلىستىق مادەنيەت باسقارماسىنىڭ باسشىسى الامان دۇبىرگە ەلەڭدەپ تۇرعان جاس دۇلدۇلدەرگە بارماقتاي باق تىلەپ، كوپشىلىككە   قۇتتىقتاۋ ءسوزىن ارنادى.    

- بيىل 29-شى رەت ءوتىپ وتىرعان «جاس تۇلپار» اقىندار ايتىسى وڭىردەگى تالاي تالاپكەر جاستى ۇلكەن ونەرگە، ۇلكەن ومىرگە قاناتتاندىردى. «جاس تۇلپار» تۇلەتكەن جاس اقىنداردىڭ كوبى - بۇگىندە وسى ءوڭىرگە عانا ەمەس، ەلىمىزدىڭ ءار تۇكپىرىندە ورەلى ونەرىمەن، ادال ەڭبەگىمەن تانىلىپ، ءوزىنىڭ اقىندىق، ازاماتتىق بيىگىنە قول جەتكىزگەن ازاماتتار. سوناۋ 1992 جىلدان بەرى ۇزىلمەي كەلە جاتقان وقۋشىلار ايتىسىن ناعىز ونەر مەكتەبى دەپ باعالاۋعا بولادى. كيەلى تاۋەلسىزدىگىمىزبەن تەل تۇلەگەن بۇگىنگى ايتىستىڭ تاريحىنا كوز جۇگىرتەر بولساق، وسى ءبىر يگى ءداستۇردىڭ باسى-قاسىندا ءجۇرىپ، تالاي جاسقا قامقور بولىپ، جول كورسەتكەن بەلگىلى اقىن-ساتيريك عۇمار احمەتچين اعامىزدىڭ ەسىمىن ۇمىت قالدىرۋعا بولمايدى.  ول كىسى «جاس تۇلپاردىڭ» قازىلار القاسىنىڭ تۇراقتى توراعاسى، باتاگوي اقساقالى بولىپ ەدى، وكىنىشكە قاراي بىلتىر ايىرىلىپ قالدىق. بۇگىنگى جاس تۇلپارلاردىڭ دۇبىرىنەن ول كىسىنىڭ دە ارۋاعى ءبىر اۋناپ تۇسكەن بولار دەپ ويلايمىن. بۇگىنگى الاماندا جاس اقىندارىمىزعا ساتتىلىك سەرىك بولسىن، - دەدى ەرلان قالماقوۆ.

ايبەك قاليەۆتىڭ ايتۋىنشا، قوستاناي وبلىسىنداعىداي 1994 جىلدان بەرى قاراي ءداستۇرلى تۇردە ۇزىلمەي ءوتىپ كەلە جاتقان وقۋشىلار ايتىسى كوپ وبلىستاردا جوق.

- قازىر وقۋشىلار ايتىسى جالپى وڭىرلەردە ءجيى وتە بەرمەيدى. مەنىڭ بىلەتىنىم، تالدىقورعاندا وتەتىن سۇيىنبايعا ارنالعان رەسپۋبليكالىق وقۋشىلار ايتىسى بار، كەيدە ۇزىناعاشتا وتەدى، ودان وزگە ء ار وڭىردە اندا-ساندا مەرەيتويلارعا وراي ايتىستار ءوتىپ تۇرادى. قوستانايداعى ايتىس بيىل 29-شى رەت ۇيىمداستىرىلىپ وتىر، بىلاي قاراساڭىز، تاۋەلسىزدىگىمىزبەن قۇرداس ەكەن. «جاس تۇلپار» ايتىسىنان تۇلەپ ۇشقان تۇلەكتەردىڭ الدى رەسپۋبليكالىق الامانداردا وسى توبىل-تورعاي ءوڭىرىنىڭ نامىسىن قورعاپ ءجۇر. ءتىپتى وسى وبلىستىق مادەنيەت باسقارماسىن باسقارىپ وتىرعان ەرلان باۋىرىمىز دا وسى «جاس تۇلپاردان» قاناتتانعان. سوندىقتان الداعى ۋاقىتتا بۇل ايتىس ۇزىلمەي جالعاسىن تابا بەرۋى كەرەك. كەلەسى جىلى وقۋشىلار ايتىسىنىڭ بۇگىنگى بيىگىنە كوتەرىلۋىنە كوپ ەڭبەك سىڭىرگەن عۇمار احمەتچين اتامىزدىڭ اتىنا ءبىر سىيلىق تاعايىندالسا ارتىق بولماس ەدى، - دەدى ايبەك قاليەۆ.

ايتىستىڭ ىرىكتەۋ كەزەڭىندە ءسوز سايىستىرعان 8 جۇپ ەل تاۋەلسىزدىگىن  جىرعا قوسىپ، ۇلى اعارتۋشى ىبىراي اتالارىنىڭ ەڭبەك جولى مەن اسىل مۇراسىن دارىپتەدى. ءبىرىنشى كەزەڭدە قارا ءۇزىپ شىققان 3 جۇپ تۇستەن كەيىن فينالدىق كەزەڭدە باق سىناستى.

«جاس تۇلپاردىڭ» باس جۇلدەسىن ارقالىق قالاسىنىڭ 5-سىنىپ وقۋشىسى نۇريسلام راعات جەڭىپ الدى. بويى دومبىراداي عانا قارشاداي بالا بۇعان دەيىن ارقالىقتا وتكەن ستۋدەنتتەر ايتىسىندا جۇلدەلى ءۇشىنشى ورىندى ۇتىپ الىپتى. قارسىلاستارىنىڭ ەشبىرىنە بەت قاراتپاعان ەڭ كىشكەنتاي اقىن بۇل ايتىستا ەڭ بيىك تۇعىردان كورىندى. نۇريسلامنىڭ:  «جۇلدىزدار قانشاما كوپ بولعانىمەن، اي كورىنىپ تۇرادى ەرەكشە بوپ» نەمەسە «ارتىڭدا قالاتىنداي ءسوز ايتساڭشى، ايتىستا بولام دەسەڭ شىن تۇعىرلى»، «ورىستاردىڭ مەكەنى ەمەس سەنى، ارىستاردىڭ مەكەنى دەپ بىلەمىن» دەپ كەلەتىن ورنەككە تولى ورەلى ورىمدەرىنەن ونەرپاز ورەننىڭ بولاشاقتا باعىندىراتىن بەلەستەرىنىڭ بيىك ەكەنىن اڭعاردىق.

ءبىرىنشى ورىن ارقالىقتان كەلگەن سايان اۋەزحانعا بۇيىردى. ەكىنشى ورىننىڭ جۇلدەسىنامانگەلدىلىك نۇرلىبەك تولەۋوۆ قانجىعاسىنا بوكتەرىپ، رۋدنىيدان كەلگەن جامبىل توققوجاەۆ ءۇشىنشى ورىندى قاناعات تۇتتى. جۇلدەلى ورىندارعا ديپلومدار مەن اقشالاي سىيلىقتار تابىس ەتىلدى. ماراپاتتاۋ راسىمىندە ءسوز العان قازىلار القاسىنىڭ توراعاسى ايبەك قاليەۆ ساحنادا قۋىرىپ ايتپاسا دا، سۋىرىپ ايتىپ، سۇلۋ ءسوز ساپتاسىمەن، ايشىقتى ويىمەن كوزگە تۇسكەن، بىراق جۇلدەگە ىلىگە الماي قالعان 7 جاس اقىنعا ءوز قالتاسىنان شىعارىپ، قارجىلاي سىيلىق تابىس ەتتى.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار