قوعام • 16 ءساۋىر، 2021

اقىن ەسەنعالي راۋشانوۆ ومىردەن ءوتتى

386 رەت كورسەتىلدى

بەلگىلى اقىن، مەملەكەتتىك سىيلىقتىڭ لاۋرەاتى ەسەنعالي راۋشانوۆ ومىردەن ءوتتى، دەپ حابارلايدى Egemen.kz.

بۇل تۋرالى قازاقستان جازۋشىلار وداعىنىڭ ءبىرىنشى ورىنباسارى اقىن اقبەرەن ەلگەزەك الەۋمەتتىك جەلىدەگى پاراقشاسىندا جازدى.

«قادىرلى اعايىن! قازاقتىڭ اسا كورنەكتى اقىنى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى ەسەنعالي راۋشانوۆتان ايىرىلىپ قالدىق.
اللا الدىنان جارىلقاسىن. اسىل رۋحى بەيىشتىڭ تورىندە شالقىسىن.
قوسىمشا اقپارات كەيىنىرەك بەرىلەدى»، دەپ جازدى ول.

ەسەنعالي راۋشانوۆ 1957 جىلى 5 قازاندا قاراقالپاق اكسر-ىندە تۋعان.

1973 جىلى قىزىلوردا وبلىسى، جاڭاقورعان اۋدانى، كەلىنتوبە سوۆحوزىنداعى №192 ورتا مەكتەپتى بىتىرگەن سوڭ، 1975–1977 جج. كەڭەس اسكەري كۇشتەرى قاتارىندا سولتۇستىك كاۆكاز اسكەري وكرۋگىندە قىزمەت اتقاردى. قازمۋ-ءدىڭ جۋرناليستيكا فاكۋلتەتىن بىتىرگەن. ولەڭدەرى 1973 جىلدان بەرى جاريالانىپ كەلەدى. 1983 جىلى «بەرداۋلەت پەن جولامان» اتتى پوەماسى قازاق كسر باسپا، پوليگرافيا جانە كىتاپ ساۋداسى ىستەرى جونىندەگى مەملەكەتتىك كوميتەتىنىڭ، قازاقستان جازۋشىلار وداعى، قازاقستان لكجو ورتالىق كوميتەتى مەن «جالىن» باسپاسىنىڭ وزىق شىعارمالارعا جاريالاعان بايگەسىندە ءبىرىنشى ورىن الدى.

1983–1987 جج. «جالىن» جانە «اراي» جۋرنالدارىندا پوەزيا ءبولىمىنىڭ مەڭگەرۋشىسى، جاۋاپتى حاتشى، 1988–1995 جج. ء«بىلىم جانە ەڭبەك» («زەردە») جۋرنالىنىڭ باس رەداكتورى قىزمەتىن اتقاردى. قازىر «جازۋشى» باسپاسىنىڭ ديرەكتورى.

وزبەك كلاسسيگى حامزا ءنيازيدىڭ ولەڭدەرىن وزبەك تىلىنەن تىكەلەي اۋدارىپ، جەكە كىتاپ ەتىپ شىعاردى. ورتاعاسىرلىق تاريحي تانىمدىق جادىگەر «تەمىر جارعىلارى» دا تۇڭعىش رەت قازاق تىلىندە ە.راۋشانوۆ تارجىماسىمەن سويلەدى.

ولەڭدەرى ورىس، ليتۆا، بولگار، چەح، ۋكراين، وزبەك، قىرعىز تىلدەرىنە اۋدارىلعان.

قازاقستان لەنين كومسومولى سىيلىعىنىڭ جانە حالىقارالىق «الاش» ادەبي سىيلىعىنىڭ لاۋرەاتى. ماسكەۋدە وتكەن جاس اقىن-جازۋشىلار فەستيۆالىنىڭ، سونداي-اق قازاق كسر-ءى شىعارماشىلىق جاستارىنىڭ «جىگەر» فەستيۆالىنىڭ تۇڭعىش لاۋرەاتى. قازاق كسر-ءى سىيلىقتارىمەن جانە تاۋەلسىز قازاقستاننىڭ ون جىلدىعى مەدالىمەن ماراپاتتالعان. قازاقستان رەسپۋبليكاسى مەملەكەتتىك سىيلىعىنىڭ لاۋرەاتى (2006). «قۇرمەت» وردەنىنىڭ يەگەرى. قازاقستانعا ەڭبەگى سىڭگەن باسپا قايراتكەرى. ش.ەسەنوۆ اتىنداعى اقتاۋ تەحنيكالىق ۋنيۆەرسيتەتىنىڭ قۇرمەتتى پروفەسسورى.

شىعارمالارى: باستاۋ. ولەڭدەر. ا.، «جالىن»، 1980; كەلىنتوبە. ولەڭدەر. ا.، «جالىن»، 1984; شولپان جۇلدىز تۋعانشا. ولەڭدەر. ا.، 1986; عايشا ءبيبى. ولەڭدەر. ا.، «جازۋشى»، 1992; قارا باۋىر قاسقالداق. ولەڭدەر. ا.، «جالىن»، 1995; پەرىشتەلەر مەن قۇستار. ا.، «جازۋشى»، 2005; بوزاڭعا بىتكەن بوزجۋسان. ا.، «راريتەت»، 2006; قۇستار ءبىزدىڭ دوسىمىز. ا.، «جازۋشى»، 2007.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار