وسى جىلعى 1 تامىزعا دەيىن ازىرلەۋ جوسپارلانعان قۇجاتتا مەملەكەتتىڭ كرەاتيۆتى كاسىپكەرلىكتى دامىتۋ, شىعارماشىلىق ونىمدەردى ەكسپورتتىق نارىققا شىعارۋ, شىعارماشىلىق يندۋستريا ءۇشىن كادرلاردى دايارلاۋ جانە قايتا دايارلاۋ, دارىندى قازاقستاندىقتاردى قولداۋ, زياتكەرلىك مەنشىكتى باسقارۋ جانە وزگە دە شارالار كورىنىس تاباتىن بولادى.
ەسكە سالايىق, مەملەكەت باسشىسى قاسىم-جومارت توقاەۆ بۇعان دەيىن ۇكىمەتكە كرەاتيۆتى ەكونوميكانى دامىتۋدىڭ نەگىزگى تاسىلدەرىن ازىرلەۋدى تاپسىرعان بولاتىن, ال 17 ناۋرىزدا الماتى قالاسىن ودان ءارى دامىتۋ ماسەلەلەرى جونىندەگى كەڭەستە ونى نورماتيۆتىك-قۇقىقتىق رەتتەۋدى پىسىقتاۋ قاجەتتىگى تۋرالى ايتتى.
تۇجىرىمداما حالىقارالىق ۇيىمدارمەن, ازاماتتىق قوعاممەن, بيزنەس وكىلدەرى جانە ساراپشىلارمەن بىرلەسە وتىرىپ جاسالادى. شىعارماشىلىق يندۋستريالاردى دامىتۋ جونىندەگى جوبالىق كەڭسەنىڭ جەتەكشىسى دانات ءجۋميننىڭ ايتۋىنشا, يۋنەسكو مەن بريتاندىق كەڭەستىڭ, سونداي-اق «اتامەكەن» ۇكپ, قازاقستاننىڭ شىعارماشىلىق كاسىپكەرلەر قاۋىمداستىعى, تۇركىتىلدەس ەلدەردىڭ شىعارماشىلىق يندۋستريالارى قاۋىمداستىعى, الماتى قالاسىنىڭ شىعارماشىلىق يندۋستريا كەڭەسى, Women in Creative Industries, ەۋرازيالىق ءىس-شارالار قاۋىمداستىعى وتاندىق Juzz Entertainment (Ninety One, Alba, Dna) لەيبلى, جايدارمان قازاق كۆن ليگاسى بىرلەسە جۇمىس ىستەۋگە نيەتتەرىن ءبىلدىردى.
سونىمەن قاتار قۇجاتتى جازۋعا شىعارماشىلىق وداقتاردى, وندىرىستىك ورتالىقتاردى, تانىمال ساۋلەتشىلەردى, سۋرەتشىلەردى, قولونەرشىلەردى, مۋزىكانتتاردى جانە شىعارماشىلىق نارىقتىڭ باسقا قاتىسۋشىلارىن تارتۋ جوسپارلانىپ وتىر. بريتاندىق كەڭەستىڭ مادەنيەتى مەن كرەاتيۆتى ەكونوميكاسى بويىنشا جوبالاردىڭ جەتەكشىسى گالينا كورەتسكايا ۇكىمەتتىڭ شىعارماشىلىق سەكتوردى دامىتۋعا دەگەن كوزقاراسى وسى سالاداعى حالىقارالىق ساراپشىلاردىڭ ۇسىنىستارىنا تولىق سايكەس كەلەتىندىگىن جانە قازاقستاندىق تاجىريبە تەك قانا ورتالىق ازيا ەلدەرى ءۇشىن عانا ەمەس, سونىمەن قاتار باسقا دامۋشى ەلدەر ءۇشىن دە ۇلگى بولا الاتىنىن اتاپ ءوتتى.
ءوز كەزەگىندە شىعارماشىلىق كاسىپكەرلەر قاۋىمداستىعىنىڭ باسقارما توراعاسى ەرنار قۇرماشەۆ ەل ۇكىمەتىنە شىعارماشىلىق يندۋستريالارعا كوڭىل بولگەنى ءۇشىن العىس ايتتى. ونىڭ پىكىرىنشە, بۇگىندە شىعارماشىلىق كاسىپكەرلەرگە مەملەكەت تاراپىنان قولداۋ بۇرىنعىدان دا كوپ قاجەت. پاندەمياعا بايلانىستى شەكتەۋلەردىڭ سالدارىنان ونداعان شىعارماشىلىق بيزنەس قاتتى زارداپ شەكتى.
«ەگەر مەملەكەت بىزگە سەنىپ, شىعارماشىلىق ادامدارعا قولداۋ كورسەتەتىن بولسا, وندا ءبىز بىرنەشە جىل ىشىندە وسى سالاداعى ونىمدەردىڭ ەكسپورتىن كەم دەگەندە 5 ەسەگە كوبەيتىپ, ەل ەكونوميكاسىنىڭ دامۋىنا زور ۇلەس قوسا الامىز», دەدى ە.قۇرماشەۆ.
جۇمىس توبىنىڭ ءبىرىنشى وتىرىسىن قورىتىندىلاي كەلە, پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ كرەاتيۆتى ەكونوميكانىڭ دامۋى بىرقاتار كەڭ اۋقىمدى ماسەلەلەرگە اسەر ەتەتىندىگىن جانە تىڭعىلىقتى جۇمىستى قاجەت ەتەتىندىگىن اتاپ ءوتتى جانە مينيسترلىكتەر مەن اكىمدىكتەرگە بىرقاتار ناقتى تاپسىرمالار بەردى.
كرەاتيۆتى ەكونوميكا — بۇل شىعارماشىلىق قىزمەتكە نەگىزدەلگەن ەكونوميكانىڭ ەرەكشە سالاسى. وعان مۋزىكا, ءسان, ديزاين, ساۋلەت, كينو, اT, مەديا, تەاتر جانە باسقالارى كىرەدى. قازىرگى كەزدە كرەاتيۆتى ەكونوميكا ەكونوميكانىڭ تەز دامىپ كەلە جاتقان سالالارىنىڭ ءبىرى. حالىقارالىق ساراپشىلاردىڭ باعالاۋى بويىنشا شىعارماشىلىق سالالاردىڭ الەمدىك ءجىو-گە قوسقان ۇلەسى $2,6 ترلن استى. (شامامەن 3%). بۇۇ باس اسسامبلەياسى 2021 جىلدى تۇراقتى دامۋ ءۇشىن حالىقارالىق كرەاتيۆتى ەكونوميكا جىلى دەپ جاريالادى. سينگاپۋر, وڭتۇستىك كورەيا, كانادا, اقش, ۇلىبريتانيا سياقتى بىرقاتار دامىعان ەلدەردە شىعارماشىلىق ەكونوميكانى دامىتۋدىڭ ستراتەگيالارى مەن باعدارلامالارى قابىلداندى. جاقىندا ءباا دۋبايدا كرەاتيۆتى ەكونوميكا ستراتەگياسىن جۇزەگە اسىرۋدىڭ باستالعانى تۋرالى حابارلادى. رەسەيدىڭ مادەنيەت مينيسترلىگى شىعارماشىلىق يندۋستريانى دامىتۋ تۇجىرىمداماسىن جاسادى.
