ونەر • 12 ءساۋىر، 2021

ساحنانىڭ ساندۋعاشى

654 رەت كورسەتىلدى

كورگەندە كوز توياتىن كوركى، سىمعا تارتقانداي سىمباتى بولسا، اكتەرلىك شەبەرلىگى اتويلاپ تۇرسا، بەس قارۋى بويىندا تۇرعان ساحنا ارتىسىنە وسىدان باسقا نە كەرەك دەپ ويلايمىز.

ساحنا سۇلۋلىقتىڭ مەكەنى سانالعان سوڭ باسقاشا بولۋى مۇمكىن دە ەمەس. بىراق اكتەردىڭ دارالىعىن ايقىندايتىن تاعى ءبىر تالاپ بار جانە باستى تالاپ، ول – داۋىس. داۋىس – ادام بولمىسىنىڭ سىرتقى ايناسى. ساحنا ونەرى ءۇشىن ءتىل مادەنيەتىنىڭ ورنى بولەك.

جاي ادامنىڭ داۋىسىنىڭ قى­رىق ءتۇرلى قاتپارى بولعاندا، ءتۇرلى كەيىپكەردىڭ كوڭىل كۇي رەڭكىن، جان تولقىنىسىن جەتكىزەتىن اكتەر داۋىسىنا قويىلاتىن تالاپ ەكى ەسە كۇشتى بولاتىنى بەلگىلى. اكتەر ءدال وسى داۋىس ارقىلى كورەرمەننىڭ ەسىندە قالادى. جاقسى داۋىس – اكتەردىڭ جارتى باقىتى. كۇلدىڭ استىنا كومىپ قويسا دا، كۇركىرەپ شىعاتىن كەشەگى شاكەن ايمانوۆ پەن ىدىرىس نوعايباەۆتاردىڭ، ءبىر «قىز جىبەك» فيلمىندە ءارى جىبەكتىڭ ءسوزىن دىبىستاپ، ءارى جەڭگەسى بولىپ سىزىلعان، كەمەل­دەنىپ قالعان جاسىندا سوتقار «قوجا» بولىپ سويلەگەن فاريدا ءشارىپوۆالاردىڭ داۋىسى تارلان­دار تالانتىنىڭ قايتالانباس قىرى قاتارىندا ءالى كۇنگە اتالادى. ۇمىتىلمايدى. وكىنىشكە قاراي، ءۇن، داۋىس، ساحنا ءتىلى – كوڭىل كۇي رەڭكىن جەتكىزۋدىڭ كەرەمەت اسپابى ەكەنىن بۇگىندە ساناۋلى ارتىستەر عانا دالەلدەپ ءجۇر. م.اۋەزوۆ اتىن­داعى ۇلتتىق تەاتردىڭ ورتا بۋىن­داعى ارتىستەرى اراسى­نان گۇلشات تۇتوۆانى سپەكتاكل­دەردەن كورگەن سايىن داۋىسىنا نازار اۋداراتىنىمىزدى باي­قايمىز. داۋىسىنان دا، ويىن ور­نە­گىنەن دە كلاسسيكالىق ءداستۇر مەك­تەبىنىڭ ءىزىن كورەمىز. قۇلاق قۇ­رىشىن قاندىراتىن بوياۋى قانىق، ساندۋعاشتاي سايراعان اشىق داۋىسى قاشان دا ەلىكتىرىپ، ساحناداعى ويىنىنا زەر سالىپ قاراۋعا مىندەتتەپ تۇرادى.

اكتريسا نە وقىعانىن، نە بىلە­تىنىن، ونەرىنىڭ قانداي دەڭگەيدە دامىعانىن داۋىسى ارقىلى بىل­دىرەدى. سوزىندە سۋرەت، داۋىسىن­دا سيقىر بار. گۇلشاتقا كەڭىر­دە­گىن سوزىپ ايعايلاۋدىڭ كەرەگى جوق، ايعايلاماسا دا داۋىسىندا باتپانداي سالماق، ءزىل جاتادى. سى­بىرلاپ سويلەگەنىن تۇكپىر­دە­گى ادام ەستيدى. جانىندا ويناپ جۇر­گەن كەيبىر جاس اكتەرلەر جاۋ قۋ­عانداي اسىعىپ-اپتىعىپ سوي­لەپ، سوزىنە قاقالىپ-شاشالىپ جات­قاندا، ءار ءسوزى نىساناعا كوز­دەل­گەن جەبە سەكىلدى ساحنانى جارىپ ءوتىپ، كەۋدەگە كەلىپ قوناقتاپ، قىز­­دىرىپ، كۇيدىرىپ وتەدى. داۋىس­تىڭ دا ين­تەللەكتىسى بولاتىنىن گۇلشاتقا قاراپ تولىق پايىم­داۋعا بولادى.

ساليقالى، سابىرلى مىنەزىنەن اينىمايتىن گۇلشات ءوز قاتارىنان كەشىرەك تانىلدى. «ونەر – بايگە» دەپ ەكى وكپەسىن قولىنا الىپ جۇ­­گىرمەدى. گۇلشات ەشقاشان قاراگوز، ەڭلىك، بايان بولىپ وينامادى. ول ءۇشىن وكىنبەيدى. بىراق بۇل ءۇشىن ەشقاشان رەجيسسەرلەردى، كوركەمدىك جەتەكشى، ديرەكتورلاردى كىنالاپ كورگەن ەمەس. سەبەبىن تەك وزىنەن ىزدەدى. سەبەبى ناعىز تانىلاتىن شاعىندا دۇنيەگە پەرزەنت­تەرىن اكەلىپ، وتباسىنداعى ەڭ­لىك پەن قاراگوزدەردى تاربيەلەپ، ءرول ويناپ كورىنەتىن كەزىندە بالا باعىپ، دەكرەتتىك دەمالىستاردا وتىردى. تاعدىردىڭ سىناعىن دا از كورمەدى. ءبىر جاسىندا دارىگەرلەر سالعان انتيبيوتيكتىڭ سالدارىنان قۇلاعى تارس جابىلىپ، ساڭىراۋعا اينالعان قىزى ايگەرىمدى جيىرما جىل بويى ءتۇرلى ەمحانا كابينەتتەرىنىڭ ەسىگىن توزدىرىپ، تاباندىلىقپەن ەمدەتتى. سى­نىپتاستارى قۇلاعىنداعى اپپاراتىن ج ۇلىپ الىپ، قۇربىلا­رى كەمسىتىپ، ۇيگە جىلاپ كەلەتىن قىزىن ءىشى قان جىلاپ تۇرىپ جۇ­باتۋدان، جىگەرلەندىرۋدەن جا­لىق­پادى. اناسىنىڭ كۇتىمىنىڭ، سە­نىمىنىڭ ارقاسىندا ايگەرىم تۇ­توۆا بۇگىندە ەل تانىعان ان­شىگە اينالدى. پولشادا وت­كەن بايقاۋدا ءبىرىنشى ورىن الىپ، قازاقستاننىڭ كوك تۋىن جەل­بىرەتكەندە اناسى كوز جاسىنا يە بولا المادى. جاقسىلىق جال­قى بولماي، جەڭىستىڭ سوڭى ايگە­رىمنىڭ سانكت-پەتەربۋرگتەگى جە­كە شىعارماشىلىق كونتسەرتىنە جال­عاستى. جاپون كومپوزيتورى قازاق انشىسىنە ارناپ ءان جازىپ، جاپونيادا جەكە كونتسەرتىن وت­كىزۋگە شاقىردى. وسىنىڭ ءبارى ەڭ الدىمەن، اناسى گۇلشاتتىڭ ەڭبەگىنىڭ جەمىسى. گۇلشات ەڭ ۇلكەن مىندەتىن – پەرزەنت الدىنداعى انالىق پارىزىن ورىندادى.

ءارتىس ءۇشىن ءومىر بويى ورتا­قول ءارتىس بولىپ جۇرۋدەن اسقان قاسىرەت جوق. تاسادا جۇرگەن تەاتر ءارتىسى گۇلشاتتى كينو سالا­سىن­دا كورەرمەنگە تۇڭعىش رەت تا­نىستىرعان رەجيسسەر ەركىن را­قىشەۆ بولاتىن. مەيلى، «كا­سىبي دەڭگەيدە تۇسىرىلمەگەن فيلم» دەپ كىنالاسىن، سىن ايتسىن، ءمىن تاقسىن، بىراق گۇلشات تۇ­توۆانى حالىققا تانىستىرعان «جە­تىمدەر» ءفيلمى ەدى. كورەر­مەن پىكىرى سان قيلى بولسا دا، حا­لىق ءفيلمدى قابىلدادى. سە­بەبى گۇلشات ءوز رولىمەن كورەر­مەننىڭ قابىلداماسقا امالىن قال­دىرمايتىنداي دارەجەدە جۇ­مىس ىستەدى. ۇلكەن ونەردىڭ جو­لىندا جۇرگەن سوڭ ومىرىنە جار­قىل، جارىلىس كەرەك ەكەنىن، تۇر­مىستان بيىكتەپ، جۇمىسقا بەلسەنە كىرىسۋ كەرەك ەكەنىن ءتۇسىندى. ءوزىن وسى جولى اكتريسا رەتىندە دالەلدەمەسە، ءارى قاراي جۇرە بە­رۋدىڭ ماعىناسىز ەكەنىن، وتبا­سى، وشاق قاسىنان ۇزاي الماي قالا­تىنىن سەزىندى. جۇرەگىنە وت بەرگەن سول جارقىلدى اكتريساعا ە.راقىشەۆ سىيلادى. ءتاڭىردىڭ بۇل سىيى ءۇشىن گۇلشات رەجيسسەر­گە راحمەتىن جاۋدىرعاننان جا­لىققان ەمەس.

شىعارماشىلىق جاۋاپكەر­شى­لىگى زور كلاسسيكالىق سپەك­تاكل­دەردەگى رولدەر گۇلشاتتىڭ وڭ جامباسىنا جاقسى كەلەدى. جاس­تاۋ كەزىندە ويناعان سۇلۋ­لار مەن ارۋلاردىڭ وبرازى ۋاقىت وتە كەلە جەڭگەلەر مەن باي­بىشە­لەردىڭ رولىمەن الماستى. ساح­نا تىلىندە «پەرەحود» دەپ اتا­لاتىن ۇيرەنشىكتى ءبىر كۇيدەن قا­راما-قارسى كۇيگە اۋىسۋ اكتەردەن كاسىبيلىكتى قاجەت ەتەدى. ارۋ قىزداردان سوڭ، ءوز جاسىنداعى كە­لىستى كەلىنشەكتەردىڭ بەينەسىنەن كەيىن مىنەزدى، ادۋىندى بايبىشەلەر مەن كەكسە ايەلدەردىڭ كەلبەتىن جاساۋ اكتريساعا وڭايعا سوقپاسا دا، ورازحان كەنەباەۆ سەكىلدى تالاپشىل رەجيسسەردىڭ كومەگىمەن ونى دا تەز-اق مەڭگەرىپ الدى. ايتپەسە سەكسەندەگى اجەنىڭ رولىندە ويناپ تۇرىپ، كوزىن اۋدارىپ-توڭ­كەرىپ، سىنىقسىپ ءجۇرىپ، سىل­قىلداپ ك ۇلىپ، قىرىقتاعى قى­لىقتى مىنەزىن كورسەتىپ، ساحنادا ءوزىن ويناپ جۇرەتىن اكتريسالار از ەمەس. كورەرمەننىڭ كۇلكىسىن شا­قىراتىن مۇنداي بىلىكسىزدىكتى گۇل­شاتتىڭ بىردە-ءبىر رولىنەن كور­مەيسىڭ. الدىڭعى تولقىن اپا­لارىنىڭ ويىنىن، اسىرەسە «پەرە­حود» جاساۋدىڭ ايتۋلى شەبەر­لەرى عازيزا ابدىنابيەۆا مەن داناگۇل تەمىرسۇلتانوۆا سىندى اپكەلەرىنىڭ ءار جاساعان وبرازىن قاداعالاپ، كادەسىنە جارايتىن ءبىر ۇلگىنى تا­بۋعا، زەردەسىنە پايدالى وي ءتۇيىپ قالۋعا تىرىسىپ جۇرەدى.

جاستاۋ كۇنىندە ءاسانالى ءاشى­موۆ ايتتى دەگەن ءبىر سوزگە قاتتى تاڭىرقاعان ەدى. «قۇمارىڭنان شىعىپ ءبىر وينايىن دەسەڭ، ساح­نادا لايىقتى سەرىكتەسىڭ جوق. ءبارى كەتىپ قالدى» دەگەن قامىققان ءسوزىن ەستىگەندە، گۇلشات «سەرىكتەسى جوعى نەسى، جۇرگەن جوقپىز با؟» دەپ ويلاعان ەكەن. كۇپىرلىك بولىپتى. ءوزى دە ورتا بۋىننىڭ وكى­لىنە اينالعان كەزدە، الپىس جىل­دان ارتىق ءومىرىن ساحناعا ارناپ، تالانتى بىرىنەن ءبىرى اسىپ، تامساندىرار ويىن ورنەكتەرىن كورسەتكەن تارلاندارىن اڭساعان ءاسانالى اعاسىنىڭ ءسوزىن بۇگىندە بۇكىل ج ۇلىن-جۇيكەسىمەن تۇسىنەدى. ساحنادا بىرگە ويناپ جۇرگەن سە­رىك­تەستەردىڭ قاس-قاباقتان ءتۇ­سىنىسىپ، ويناماسىنا، شابىتتان­باسىنا قويماي ءبىرىن-ءبىرى ءۇيى­رىپ، جەتەكتەپ الا جونەلەتىن شە­بەر­لىگىنىڭ ماڭىزىن ەندى ءوزى دە سەزىنە باستاعان. اركىمنىڭ وزى­نە لايىق سەرىكتەسى بولسا، سۋدا جۇز­گەن بالىقتاي ەركىن ءجۇرىپ، وت بو­لىپ لاپىلداپ جانىپ، ساحنا­نى گۇلدەندىرىپ جىبەرەتىنىن ۇقتى. سوندىقتان وزىنەن مىقتى ارىپتەستەرىمەن بىرگە ويناعان كەزدە «شاپپا-شاپ»، ءسوزى مەن ارەكەتىن ءىلىپ الىپ، ءارى قاراي تۇتاندىرىپ جىبەرەتىن تاسىلدەر تابۋعا توسەلىپ العان. «بەس بويداققا ءبىر توي» سپەكتاكلىندەگى قازاقستاننىڭ حا­لىق ءارتىسى نۇكەتاي مىشباەۆا اپاسىنىڭ مەنشىكتى ءرولىنىڭ ءىزبا­سارى بولعاندا، كوريفەيدىڭ وبرازىنا كاريكاتۋرا جاساعانداي كۇلكىگە قالىپ جۇرمەيىن دەپ، جا­ۋاپكەرشىلىكتى تەرەڭ سەزىنە ءجۇ­رىپ، جانىن سالىپ ىزدەندى. بۇل از بولسا، ساحنادا بەكجان تۇرىستاي سايىپقىرانمەن بىرگە ويناۋ ەكى ەسە جاۋاپكەرشىلىك جۇكتەيدى. ساح­نادا ويناپ ءجۇرىپ تابان استىندا ءبىر دەتالدى ويلاپ تاۋىپ، ادام­نىڭ تۇسىنە دە كىرمەيتىن توسىن ارەكەتتەر جاسايتىن بەكجان اعا­سىنىڭ جاساعانىن قاعىپ الىپ، ءارى قاراي دامىتىپ اكەتپەسە، ەنەسىنەن اداسقان قوزىداي ايدالادا ماڭىراپ قالاتىنى انىق. نۇكەتاي اپاسى سپەكتاكلدى كە­لىپ كورىپ، باس بارماعىن بىلەپ باعا­سىن، قولىن جايىپ باتاسىن بەرىپ، سوڭىنان سىيلىعىن قوسا تارتۋ ەتكەننەن كەيىن عانا ەكى يىعىنان جۇك تۇسكەندەي كوڭىلى تىنشىدى.

بۇگىنگى كۇن ىزدەنىستى قاجەت ەتە­دى. سەبەبى قازىرگى كورەرمەننىڭ تال­عامى بيىك، ورەسى جوعارى. كەشەگى كۇنگى بولماشىعا جىلاي سالاتىن، كۇلە سالاتىن اڭعال كورەرمەندى بۇگىن تاپپايسىڭ. ساحنا اينا سە­كىل­دى، ءسال عانا قاتەلىگىڭدى سەزىپ قويادى.

«قازاقستان» ۇلتتىق ارناسى تۇسىر­گەن ۇلى اقىننىڭ ءۇش كە­زەڭ­نەن تۇراتىن جاسىن تۇتاس قام­تىعان التى سەريالى «اباي» فيل­مىندە باس كەيىپكەردىڭ اناسى ۇلجاننىڭ رولىندە وينادى. ساحنادا دا، كينودا دا ۇلى ويشىلدى ويناپ تانىلعان، جاسى دا، شەبەرلىگى دە وزىنەن كوش ىلگەرى بولات ءابدىلمانوۆ سەكىلدى ونەر مايتالمانىنىڭ شەشەسى بولىپ، وعان اقىل ايتىپ، ءوز وبرازىن قا­ناتتانا سومداپ، سەنىمدى الىپ شىقتى.

گۇلشات تۇتوۆانى كاسىبي دەڭ­گەيدەگى اكتەرلەردىڭ قاتارىنا ­قوس­قان ۇلكەن رولدەرىنىڭ ءبىرى – ءاپىش­­تىڭ بەينەسى. جۇرگەن جە­رى ويىن-ساۋىق، اينالاسىنا قىز-كەلىن­شەكتەردى ەرتىپ، وزى­نە تالاي ارۋدى عاشىق ەتكەن ءبىر­جان سالدىڭ بالالارىن ومىر­گە اكەلىپ، بوساعاسىن ادال­دىقپەن كۇزەتكەن ءاپىش بۇل. رەجيس­سەر دوسحان جولجاقسىنوۆ گۇلشات­تىڭ بەيكۇنا بالانىڭ جانارىنداي تازالىق تۇنىپ تۇراتىن كوزدەرىندەگى قوڭىرقاي مۇڭ مەن دوڭگەلەك ءجۇزى ءۇشىن ويلانباس­تان وسى وبرازدى ۇسىنعان ەدى. قاتەلەسپەدى. مۇنداي ءرولدىڭ ۋىسى­نا كۇندە تۇسە بەرمەيتىنىن بىل­گەن گۇلشات اسقار سۇلەي­مە­نوۆتىڭ «اداسقاعىن»، اقىننىڭ اپىشكە ارناعان ولەڭىن قايتالاپ وقىپ، التى ايىن ارپالىس پەن تولعانىستا وتكىزدى. ءتۇسىرۋ الا­ڭىنا بارعاندا شىن تولقىدى. ءبىرجان توقال الامىن دەپ وتىر. قايتپەك كەرەك؟ كوز الدىنا ەلەس­تەتتى. سارىقارىن بايبىشە جاسىنا جەتتىم دەگەنىمەن، بۇل دا ءالى جاس، قىلىعى ءالى قالعان جوق، قىزۋى، قىزىعى باسىلعان جوق. سويتە تۇرا ءوز بالالارىنىڭ اكەسى ۇستىنەن توقال الامىن دەپ تۇرسا، بۇل قالاي قابىلداعان بولار ەدى؟ ءاپىشتى تۇسىنگىسى كەلدى، بىراق ىشى­نە قىزعانىشتىڭ قىزىل شوعى ءتۇسىپ كەتكەن ەكەن، جانىن ورتەپ، جالاڭداعان وت كەۋدەسىن قارىپ، ءىشىن تۇگەل جاندىرىپ، كەڭىردەك-كەڭسىرىگىنە دەيىن ۋداي اشىتىپ كۇيدىرىپ بارادى. كوزىنە جاس كەل­دى. بىراق ءوزىنىڭ عانا ەمەس، ءبىر­جانداي ەل ەركەسىنىڭ ابىرويىن بيىك قويعان ءاپىش تەكتىلىگىن تانىتىپ، ەل الدىندا باسقا ءسوزدى ايتۋعا ءماجبۇر. بار قايراتىن جيىپ الىپ، جانارىندا تىعىلىپ تۇرعان جاستىڭ ءبىر تامشىسىن دا ءۇزىپ الماي، كوزىنە ىركىپ العان كۇيى ك ۇلىپ تۇرىپ كەڭ ايەلدىڭ مىنەزىن كورسەتتى. «ازاماتتىڭ ارى تاپتالىپ جاتقاندا، ءبىر قاتىننىڭ جانى ساداعا». ۇلتتىق كينوعا سۋساپ قالعان كورەرمەن ناعىز قازاق ايەلىنىڭ بەينەسىن كورىپ ءسۇيسىندى. اقىلدى، پاراساتتى مىنەزىنە قار­­قاراداي جاۋلىعى جاراسىپ، كەۋ­دەسىن تىك ۇستاعان گۇلشاتتىڭ كەر­نەيىنە جەتكىزىپ، كەلىستىرىپ تۇرىپ ايتقان ءسوزىن كورەرمەننىڭ ۇنات­قانى سونداي، قاناتتى سوزگە اينالدىرىپ، ورايى كەلگەندە وزدەرى دە قولداناتىن بولدى.

گۇلشاتتىڭ داۋىسى دارا دەدىك، سەبەبى بار. م.اۋەزوۆ تەاترىنىڭ مەرەكەلىك، ويىن-ساۋىق كەش­تەرىندە حالىق ءانى «بالاپان قا­زىن» سىزىلتىپ شىعاتىن گۇلشات اكتريسا بولماعاندا، انشىلىك ونەردىڭ جولىن قۋعان تانىمال وكىلدەرىنىڭ ءبىرى بولاتىنىنا ەش كۇمانسىز ءباس تىگۋگە بولادى.

بۇل ولكە – ءبىزدىڭ اۋىل

جايلاعان جەر،

جەلىگە اساۋ ق ۇلىن

بايلاعان جەر.

كوزىمە وت-جالىنداي كورىنەدى،

قۇربىممەن ق ۇلىن-تايداي

ويناعان جەر.

ە-ە-ي، احاۋ ساباز،

ۇشىرعان ۇياسىنان بالاپان قاز».

سەزىمنىڭ نازىك ءيىرىمىن سۋرەت ارقىلى استارلى ايتقان اسەم ءاننىڭ وزەگىندەگى كەۋدەنى قاريتىن ارمان مەن مۇڭدى ءدال گۇلشاتتاي جەتكىزەتىن ءانشى كەمدە-كەم. ءان ەمەس – دراما. بۇلكىلدەي اققان كۇرەتامىرداعى قانمەن بىرگە بوي-بويعا شىمىرلاي تاراپ، ساز­دى اۋەنمەن بىرگە توگىلگەن كۇيىك ارالاس اڭساردى باياعىنىڭ اجەلەرىندەي باس يزەپ وتىرىپ، ساف داۋىسپەن ايتىلعان سۇلۋ ءاندى سىمىرە بەرەسىڭ.

تۇياعىمەن جەر تارپىعان كىل دۇلدۇلدەر مارتەبەسىن كوتەرىپ كەت­كەن قارا شاڭىراقتىڭ ءداستۇ­رىن وزىنشە جالعاستىرىپ كەلە جات­قان كەيىنگى بۋىننىڭ اراسىندا ايرىقشا كوزگە تۇسەتىن گۇلشات تۇتوۆا، باستىسى، وزىنە، ونەرىنە ادال. ادالدىقتىڭ ادامدى كوشتىڭ سوڭىندا قالدىرىپ كورگەن جەرى جوق. سامساعان ساڭلاقتار مەن جۇتىنعان جۇيرىكتەر شاپقان ونەر الامانىندا دارا داۋىس يەسىنىڭ دەمىنىڭ ءدال قۇلاقتىڭ تۇبىنەن ەس­تىلەتىنى دە سوندىقتان بولسا كەرەك.

سوڭعى جاڭالىقتار

ەرلىككە تولى سۋرەتتەر

رۋحانيات • بۇگىن، 13:05

كيىكتەردىڭ تولدەۋ كەزەڭى باستالدى

فوتوگالەرەيا • بۇگىن، 12:07

«بارىستىڭ» العاشقى ترانسفەرى

حوككەي • بۇگىن، 08:50

«ءان» بە، «ءۇن» بە؟

رۋحانيات • بۇگىن، 08:36

جۋرناليست قاسىم

رۋحانيات • بۇگىن، 08:34

ءسوز سويىل: ءازىل-وسپاق

رۋحانيات • بۇگىن، 08:32

دالالىق وركەنيەت تاعىلىمى

تاريح • بۇگىن، 08:23

بالاباقشانىڭ جوعىنان بارى جاقسى

ايماقتار • بۇگىن، 08:18

كاسىپكە باۋلۋ – قاسيەتتى بورىش

ايماقتار • بۇگىن، 08:16

اتى-جونىمىزگە اباي بولايىق

قوعام • بۇگىن، 08:14

ءۇي ىشىندەگى ۇيلەسىم

پىكىر • بۇگىن، 08:06

قوي باققان وزار...

ايماقتار • بۇگىن، 08:03

حالىقارالىق قۇجاتتار قابىلداندى

قازاقستان • بۇگىن، 07:58

ايسبەرگ اقيقاتى

ادەبيەت • كەشە

جوق كىتاپتى ىزدەۋ

ادەبيەت • كەشە

كرەست-كەدەرگى...

ادەبيەت • كەشە

ۇقساس جاڭالىقتار