– ورتالىق نەبارى ءبىر جىل جۇمىس ىستەپ كەلە جاتسا دا, عالىمدار اراسىندا تەز تانىلدى. ورتالىقتىڭ ماقساتى قانداي؟
– ورتالىعىمىز عىلىمي زەرتتەۋلەردىڭ ساپاسىن جاقسارتىپ, عىلىمي قوعامداستىقتى وقىتۋ جانە مەملەكەتتىك ستراتەگيانى ىسكە اسىرۋعا كومەكتەسۋ ارقىلى تيىمدىلىكتى ارتتىرۋ ماقساتىندا قۇرىلدى. كومپانيامىز حالىقارالىق, ياعني قازاقستان رەسپۋبليكاسىنىڭ عالىمدارىنا عانا ەمەس, سونىمەن قاتار بۇكىل ورتالىق ازيا عىلىمىنىڭ ساپاسىن ارتتىرۋعا اتسالىسۋدى كوزدەيدى.
– عالىمدارعا قانداي قولداۋ كورسەتپەكسىزدەر؟
– نەگىزى, Research Support Center-ءدىڭ عالىمدارعا, اۆتورلارعا, ءتىپتى ۋنيۆەرسيتەتتەر مەن كىشىگىرىم ۇيىمدارعا تيگىزەتىن كومەگى زور. ءبىز عالىمدارعا ارنالعان 2,5 ايلىق اقىلى وقىتۋ ۆەبينارلارىن جۇرگىزەمىز. ۆەبينارلارىمىز عالىمدار اراسىندا وتە تانىمال. سوندىقتان ايىنا ءبىر رەت تەگىن نەمەسە وتە ارزان باعادا قىسقاشا ساباقتاردى دا وتكىزەمىز. سونىمەن قاتار اۆتورلاردىڭ پۋبليكاتسيالىق ونىمدىلىگىن ارتتىرۋ ماقساتىندا Enago اتتى بەدەلدى حالىقارالىق اكادەميانىڭ رەسمي وكىلى رەتىندە شىعىپ, اۆتورلارعا كەم دەگەندە ءبىر-ەكى الەۋەتتى عىلىمي جۋرنالدا ءوز جۇمىستارىن جاريالاۋعا كومەكتەسەمىز. دالىرەك ايتقاندا, ولاردى تەحنيكالىق جاعىنان باقىلاۋعا الىپ, جۇمىستارىن حالىقارالىق تەحنيكالىق قاعيدالارعا تولىقتاي بەيىمدەيمىز. ودان باسقا دا كورسەتەتىن قولداۋىمىز, كومەگىمىز, عىلىمنىڭ دامۋىنا قوسار ۇلەسىمىز جەتەرلىك. سەبەبى ورتالىعىمىز جالپى عىلىمي قوعامداستىققا تەك ساپالى جۇمىس كورسەتۋدى ماقسات ەتىپ وتىر. ءبىز عىلىم سالاسىندا عالىمدارعا مىندەتتى تۇردە قاجەت بولاتىن كوعامداستىقتار مەن كومپانيالاردىڭ ەكسكليۋزيۆتى ارنايى ديستريبيۋتورى سانالامىز: OJS پلاتفورماسى, Crossref-ءتىڭ DOI يدەنتيفيكاتورى, LMS سيستەمالارىمەن TurnitIn, Plagiat.PL انتيپلاگياتتار جۇيەسى. جالعاستىرا بەرسەك, كوپكە سوزىلۋى مۇمكىن. بىراق ارينە ءبىز ءۇشىن ساپا ساندىق كورسەتكىشتەردەن ءبىر ساتى جوعارى تۇر.
– عالىمدار كومەك نەمەسە قولداۋ الۋ ءۇشىن قالاي بايلانىسا الادى؟
– كەز كەلگەن عالىم ورتالىعىمىزبەن www.research-support-center.com رەسمي سايتى ارقىلى بايلانىس ورناتا الادى. رەسمي سايتتىڭ سوڭعى بەتىندە ءوزىنىڭ دەرەكتەرىن قالدىرعان جاعدايدا, ءبىزدىڭ قىزمەتكەرلەرىمىز ءبىر كۇن ىشىندە مىندەتتى تۇردە حابارلاسادى.
– وسىعان دەيىن قانداي جەتىستىكتەرگە جەتىپ ۇلگەردىڭىزدەر؟
– بىرنەشە اي بۇرىن Research Support Center ورتالىعى Enago اكادەمياسىمەن بىرلەسىپ, وتە ماڭىزدى حالىقارالىق See The Future اتتى ونلاين-فورۋم ۇيىمداستىرعان ەدى. فورۋم جوعارى ءبىلىم بەرۋ ساپاسىن جاقسارتۋ جانە جەتەكشى الەمدىك رەيتينگتەردەگى جوعارى وقۋ ورىندارىنىڭ پوزيتسياسىن كۇشەيتۋ, عالىمدار مەن اۆتورلارعا جوعارى كۆارتيل جۋرنالدارىندا ماقالالار جاريالاۋعا جاردەمدەسۋ, حالىقارالىق گرانتتار الۋ جانە عىلىمي زەرتتەۋلەردى كوممەرتسيالاندىرۋ ماسەلەلەرىنە وقىتۋ ماقساتىندا جۇرگىزىلىپ, جۇزدەگەن وڭ پىكىرلەرگە يە بولدى. See The Future ونلاين-فورۋمىندا ورتالىق ازيا ەلدەرىنىڭ ءبىلىم جانە عىلىم مينيسترلىكتەرىنىڭ قولداۋىمەن ۇلتتىق ۋنيۆەرسيتەتتەردىڭ رەكتورلارى قاتىسىپ, نوبەل سىيلىعىنىڭ لاۋرەاتى سەر ريچارد دج. روبەرتس, QS – ۋنيۆەرسيتەتتەردىڭ الەمدىك رەيتينگىنىڭ باسشىسى كۆاكۆارەللي سايموندس, گارۆارد ۋنيۆەرسيتەتىنىڭ زەرتتەۋ ساپاسىن باقىلاۋ بويىنشا باس مامانى ارا تاحماسيان جانە ت.ب. عىلىم سالاسىنداعى الەمدىك ەڭ ىقپالدى جانە بەدەلدى سپيكەرلەرمەن ديسكۋسسياعا ءتۇستى. بۇل – عالىمدارعا شەكارانى بۇزىپ, وتاندىق عىلىمدى الەمدىك ارەناعا شىعارۋىنا جانە ءوز كارەراسىن دامىتۋعا ىقپال ەتەتىن مۇمكىندىك. بۇعان دەيىن الەمدىك عىلىمداعى بەدەلدى ادامداردىڭ مۇنداي كولەمدەگى جينالىستارى ورتالىق ازيادا, اسىرەسە قازاقستاندا بولعان جوق. ءبىز وسىنداي الەمدىك ۇلگىدەگى بولاشاق فورۋمدارعا جول اشتىق. سوندىقتان سوڭعى جارتى جىل ىشىندە بولعان ەڭ باستى جەتىستىگىمىز دەپ وسى جۇمىسىمىزدى اتار ەدىم.
– الداعى جوسپارلارىڭىز قانداي؟
– شىنى كەرەك, الداعى جوسپارىمىز وتە كۇردەلى. بىرىنشىدەن, Research Support Center عالىمدار مەن ۋنيۆەرسيتەتتەرگە ەڭ كەرەكتى الەمدىك كومپانيالاردىڭ رەسمي وكىلى بولعاندىقتان, سول باعىتتاعى ءىس-شارالاردى دامىتۋ, پورتفوليومىزدى كەڭەيتۋدى كوزدەپ وتىرمىز. ەكىنشىدەن, بىزبەن بايلانىس ورناتۋدى كوزدەيتىن عالىمداردىڭ قاتارى جانە قولداۋ كورسەتۋدى قالايتىن ۋنيۆەرسيتەتتەردىڭ سانى كۇننەن-كۇنگە كوبەيىپ كەلەدى. ورتالىقپەن قارىم-قاتىناس ورناتۋ مۇمكىندىگىن يننوۆاتسيالىق شەشىمدەرمەن الماستىرۋ قاجەت. قازىردىڭ وزىندە بىزدە وننان اسا ادام سۇراققا جاۋاپ بەرىپ وتىرسا دا, بۇل جەتكىلىكسىز بولىپ تۇر. ۇشىنشىدەن, قازاق عالىمدارى ءۇشىن تەگىن جانە تياناقتى ماعلۇمات بەرۋ جوسپارىمىزدا بار. وكىنىشكە قاراي, «جىرتقىش جۋرنالدارداعى» ماقالالار جانە باسقا دا مەملەكەتىمىزدەگى پايدا بولعان عىلىم سالاسىنىڭ ماسەلەلەرى, كوبىنە بىلمەگەندىكتەن بولادى. پايعامبارىمىز ايتقانداي, اقىلىڭىزدى ەلگە تاراتۋ – ەڭ قاسيەتتى ساۋاپ. بىلگەنىمىزدى قازاق عالىمدارىنا جەتكىزىپ, تىڭ يدەيالارعا باي, زامان تالابىنا ساي كەلەتىن عىلىمي ىزدەنىستەرگە مۇمكىندىگىنشە قولداۋ كورسەتەمىز.
اڭگىمەلەسكەن
ايدانا شوتبايقىزى,
«Egemen Qazaqstan»
