الايدا وبلىستىق دەنساۋلىق ساقتاۋ باسقارماسىنىڭ باسشىسى ەرمەك وماربەكوۆ مەملەكەتتىڭ ەشكىمگە بەرەشەگى جوق ەكەنىن ايتىپ اقتالدى. بىراق اتى جامان ىندەت ەلىمىزگە ەنگەلى جەدەل جاردەم ستانساسىنىڭ قىزمەتكەرلەرىنەن مازا كەتكەن. كۇن-ءتۇن دەمەي, الدىڭعى شەپتە اۋرۋمەن بەتپە-بەت كەلەتىن دە سولار ەدى.
– بىزگە اي سايىن 425 مىڭ تەڭگە تولەۋ كەرەك بولعان. وكىنىشكە قاراي, ونداي قاراجات الىپ وتىرعانىمىز جوق. 10-20 پايىزىن عانا تولەدى. بىلتىر جاز ايلارىندا تىنىم تاپپاي ەڭبەك ەتسەك تە ۇستەمەاقىدان قاعىلىپ قالدىق, – دەيدى جەدەل جاردەم قىزمەتكەرى دارحان ەسجانوۆ.
ءتيىستى دەگەن ۇستەمەاقىلارىن الا الماي جۇرگەن دارىگەرلەر وبلىستىڭ اۋداندارىندا دا از ەمەس. قايدا بارىپ, شاعىم ايتارىن بىلمەي جۇرگەندەر دە جەتكىلىكتى. جالپى العاندا, ادىلدىك ىزدەگەن 300-دەن استام اق حالاتتى ادۆوكاتتىڭ كومەگىنە جۇگىنگەن. ونىڭ ىشىندە سەمەي مەن ريددەر قالالارىنىڭ دا دارىگەرلەرى بار. ادۆوكات ەلەنا سۋحوۆانىڭ ايتۋىنشا, دارىگەرلەرگە دەگەن بەرەشەك وتە اۋقىمدى.
– ۇستەمەاقىنىڭ مولشەرىن شامالاپ ەسەپتەگەننىڭ وزىندە 70 ملرد تەڭگەگە شىعىپ تۇر. ونىڭ وزىندە, ءبىز تەك شىعىس قازاقستانداعى جەدەل جاردەم ستانساسىنىڭ قىزمەتكەرلەرىنە دەگەن قارىزدى ەسەپتەي الدىق, – دەيدى ەلەنا سۋحوۆا.
ال دەنساۋلىق ساقتاۋ باسقارماسىنىڭ باسشىسى مەديتسينا قىزمەتكەرلەرى مەن ادۆوكاتتىڭ ايتقان ۋاجدەرىن جوققا شىعارىپ وتىر. ياعني ەشقانداي قارىزدىڭ جوقتىعىن ايتادى.
– مەن وسكەمەندەگى جەدەل جاردەم ستانساسىنىڭ قىزمەتكەرلەرى ءتيىستى جاردەماقى مەن تولەمدەرىن الا المادى دەگەن اقپاراتتى جوققا شىعارعىم كەلەدى. الەۋمەتتىك مەديتسينالىق ساقتاندىرۋ قورى مەديتسينالىق قىزمەتكەرلەرگە تيەسىلى بارلىق قىزمەتى وتەماقى تولەمدەرىن تولەدى. 2020 جىل مەن 2021 جىلدىڭ قاڭتار-اقپان ايلارى دا تولىعىمەن جابىلدى. بۇكىل قازاقستاننىڭ دارىگەرلەرىنە ءبىر جارلىق بويىنشا تولەنەدى. زاڭ بارىنە بىردەي. ۇكىمەتتىڭ قاۋلىسى, دەنساۋلىق ساقتاۋ ءمينيسترىنىڭ بۇيرىعى بار. بارلىق تولەمدى اشىق تۇردە كورە الاسىزدار. قارىز جوق, – دەيدى نىق سەنىممەن وبلىستىق دەنساۋلىق ساقتاۋ باسقارماسىنىڭ باسشىسى ەرمەك وماربەكوۆ.
الەۋمەتتىك مەديتسينالىق ساقتاندىرۋ قورىنىڭ شىعىس قازاقستان وبلىسى بويىنشا فيليالىنىڭ ديرەكتورى عالىمجان ءابىلوۆ ءوڭىر دارىگەرلەرىمەن بىرنەشە رەت كەزدەسۋ وتكىزىپ, تيەسىلى جاردەماقىنى ەسەپتەۋ بويىنشا تۇسىنىكتەمەلەر بەرىلگەنىن ايتادى. تەك 2020 جىلى مەديتسينالىق قىزمەتكەرلەرگە بەرىلگەن تولەمدەر سوماسى 8 ملرد تەڭگەنى قۇراعان.
– 2021 جىلدىڭ قاڭتار-اقپان ايلارى بويىنشا جەدەل جاردەم قىزمەتكەرلەرىنە بارلىق تولەم بەرىلدى. بىزگە ۇيىمنان ءالى ناۋرىز ايىنا وتىنىشتەر تۇسكەن جوق. باقىلاۋ جۇرگىزىلىپ, ءبارى ەسەپتەلىپ جاتىر. تولەمدەر بويىنشا كوميسسياعا ءوتىنىش تۇسكەن سوڭ قاراجات وپەراتورى حاتتاماعا سايكەس ءتيىستى تولەمدەردى جۇزەگە اسىرادى. ءار ايدىڭ ونىنا دەيىن تولەم جاسايمىز. تولەمدەردى كەشىكتىرگەن ەمەسپىز. ءدال قازىر ەشقانداي قارىز جوق, – دەدى ع.ءابىلوۆ.
ايتا كەتەيىك, الداعى ۋاقىتتا الەۋمەتتىك ساقتاندىرۋ قورى فيليالىنىڭ ماماندارى مەديتسينا قىزمەتكەرلەرىنە 2020 جىلدىڭ جانە 2021 جىلدىڭ ءبىرىنشى توقسانىندا قانشا قىزمەتكەرگە, قانشا جەدەل جاردەم بريگاداسىنا اۋدارعان قاراجاتى تۋرالى بۇگە-شىگەسىنە دەيىن بارلىق ەسەپتى ۇسىناتىن بولادى.
شىعىس قازاقستان وبلىسى
