مەملەكەت باسشىسى ق.توقاەۆتىڭ زاڭ شىعارۋ باستاماسى تارتىبىمەن دايىندالعان بۇل قۇجاتتى قابىلداۋدىڭ ماقساتى – شەتەلدىكتەردىڭ, ازاماتتىعى جوق ادامداردىڭ, شەتەلدىك زاڭدى تۇلعالاردىڭ, شەتەلدىك قاتىساتىن قازاقستان رەسپۋبليكاسى زاڭدى تۇلعالارىنىڭ, حالىقارالىق ۇيىمداردىڭ, حالىقارالىق قاتىساتىن عىلىمي ورتالىقتاردىڭ, سونداي-اق اۋىل شارۋاشىلىعى ماقساتىنداعى جەر ۋچاسكەلەرىن جەكە مەنشىك قۇقىعىمەن جانە ۋاقىتشا جەر پايدالانۋ قۇقىعىمەن قانداستاردىڭ يەلەنۋىنە تىيىم سالۋدى ەنگىزۋ.
وسىعان ساي, جالپى وتىرىستا نۇرلان نىعماتۋلين: -بۇگىنگى ماقۇلدانىپ وتىرعان جەر قاتىناستارى تۋرالى زاڭ جوباسىنىڭ قازاقستان قوعامىندا ماڭىزى دا, ورنى دا ەرەكشە. سەبەبى, مەملەكەت باسشىسى قاسىم-جومارت كەمەل ۇلى توقاەۆتىڭ تاپسىرماسىمەن ازىرلەنگەن وسى قۇجاتتىڭ ناتيجەسىندە حالقىمىزدىڭ نازارىندا جۇرگەن سۇراق بويىنشا ناقتى شەشىم قابىلداندى. ەندى جەرىمىزدى شەتەلدىكتەرگە ساتۋعا دا, جالعا بەرۋگە دە تولىقتاي تىيىم سالىنادى, - دەدى. سونىمەن قاتار, نۇرلان نىعماتۋلين بۇل زاڭ جوباسى جەر تۋرالى ءتۇرلى پىكىرلەردى توقتاتىپ, الداعى ۋاقىتتا جەردى قولدانۋ مۇمكىندىكتەرىن ءتيىمدى پايدالانۋعا جول اشاتىنىنا نازار اۋداردى.
ايتا كەتۋ كەرەك, جەر زاڭناماسىنان شەتەلدىك جەر پايدالانۋشىلارعا جانە شەتەلدىك قاتىسۋ ۇلەسى بار بىرلەسكەن كاسىپورىندارعا, سونداي-اق قانداستارعا اۋىل شارۋاشىلىعى جەرلەرىنە قۇقىقتار بەرۋ ماسەلەلەرىن رەگلامەنتتەيتىن قۇقىقتىڭ ماتەريالدىق نورمالارى الىپ تاستالماق. بۇل رەتتە, 2016 جىلعى 1 شىلدەگە دەيىن جوعارىدا اتالعان جەر پايدالانۋشىلارعا جالعا بەرۋ شارتىمەن بەرىلگەن اۋىل شارۋاشىلىعى ماقساتىنداعى جەر ۋچاسكەلەرىنە ۋاقىتشا جەر پايدالانۋ قۇقىعى جالعا الۋ شارتىنىڭ قولدانىلۋ مەرزىمى اياقتالعانعا دەيىن قولدانىلاتىنى جانە ۇزارتىلۋعا جاتپايتىنى كوزدەلگەن.
سونىمەن قاتار, جالپى وتىرىستا «ەرەكشە تاۋارلاردى باقىلاۋ تۋرالى» زاڭ جوباسى مەن وعان ىلەسپە زاڭ جوبا I وقىلىمدا ماقۇلداندى.
زاڭ جوباسىندا ەرەكشە تاۋارلاردى باقىلاۋدىڭ ماقساتتارى, قاعيداتتارى مەن ادىستەرى بەلگىلەنگەن. قۇجاتتىڭ ماقساتى – ۇلتتىق قاۋىپسىزدىكتى قامتاماسىز ەتۋ, جاپپاي قىرىپ-جويۋ قارۋىن تاراتپاۋ جانە قارۋ-جاراقتىڭ زاڭسىز ساۋداسىنا جول بەرمەۋ جونىندەگى حالىقارالىق مىندەتتەمەلەردى ساقتاۋ. وتىرىس بارىسىندا دەپۋتاتتار تاۋارلار مەن قىزمەتتەردى زاڭسىز يمپورتتاۋعا بايلانىستى جاۋاپكەرشىلىك ەنگىزۋدى ۇسىندى.
- مەنىڭشە, دەپۋتاتتاردىڭ جۇمىس توپتارىندا ەنگىزگەن تۇزەتۋلەرى ماڭىزدى جانە وزەكتى. ەگەر اتالعان ماسەلە بويىنشا ۇكىمەتتىڭ نۇسقاسىن باسشىلىققا الاتىن بولساق, وندا ءبىزدىڭ شەكارامىز ارقىلى كەز-كەلگەن تاسىمال تەحنولوگيالارعا, عىلىمي-تەحنيكالىق قۇجاتتامالارعا باعدارلامالىق قامتاماسىز ەتۋگە تىيىم سالىنعان. الايدا, قىلمىستىق كودەكستىڭ 275-بابىنا سايكەس, تەك قانا زاڭسىز ەكسپورتقا جازا قولدانىلادى. سوندىقتان, دەپۋتاتتار تەك زاڭسىز ەكسپورتقا عانا ەمەس, سونىمەن قاتار ەرەكشە تاۋارلاردىڭ زاڭسىز يمپورتى ءۇشىن دە جازا بەلگىلەۋ تۋرالى وڭتايلى ۇسىنىس ەنگىزدى دەپ ەسەپتەيمىن, - دەدى نۇرلان نىعماتۋلين.
ايتا كەتۋ كەرەك, زاڭ جوباسى ەرەكشە تاۋارلاردىڭ ەكسپورتىن, كەرى ەكسپورتىن, يمپورتىن, ءترانزيتىن, ەكساۋماقتىق كەرى ەكسپورتىن, ەكساۋماقتىق دەلدالدىق قىزمەتتەر كورسەتۋدى نەمەسە تەحنيكالىق كومەكتى جۇزەگە اسىرۋ كەزىندەگى قاتىناستاردى رەتتەۋگە باعىتتالعان. جالپى وتىرىستا ءماجىلىس كوميتەتتەرى ءبىرشاما جاڭا زاڭ جوبالارىن جۇمىسقا الدى. ولار سايلاۋ تۋرالى كونستيتۋتسيالىق زاڭ جوباسىنا تۇزەتۋلەر ەنگىزۋ, الەۋمەتتىك كاسىپكەرلىكتى دامىتۋ ماسەلەلەرىنە قاتىستى زاڭ جوباسى مەن سالىق كودەكسىنە قاتىستى زاڭ جوباسى بار.
سونىمەن قاتار, دەپۋتاتتار قازاقستان رەسپۋبليكاسىنىڭ كەيبىر زاڭنامالىق اكتىلەرىنە ادۆوكاتتىق قىزمەت جانە زاڭ كومەگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى بويىنشا قازاقستان رەسپۋبليكاسى پارلامەنتىنىڭ ءماجىلىسى مەن سەناتى اراسىنداعى كەلىسپەۋشىلىكتى ەڭسەرۋ جونىندەگى كەلىسىم كوميسسياسىنىڭ ۇسىنىسىمەن كەلىستى.
وتىرىس سوڭىندا ءماجىلىس دەپۋتاتتارى مەملەكەتتىك ورگاندار باسشىلارىنا دەپۋتاتتىق ساۋالدار جولدادى. ولار: ع. ەلەۋوۆ, س. ناقپاەۆ, د. نۇرمانبەتوۆا, گ. نۇرىموۆا, د.ەسباەۆا, ا.پەرۋاشەۆ, ف.كامەنوۆ, ا.قوڭىروۆ, ع.قۇلاحمەتوۆ, ا.سقاقوۆا, ۆ.نابيەۆ.
قازاقستان رەسپۋبليكاسى پارلامەنتىنىڭ ءماجىلىسى
