پوليتسيا باسشىسىنىڭ پىكىرىنشە, ۇرلىقتىڭ الدىن الۋ ءۇشىن مالدى ەركىن جايىلىمعا قاراۋسىز جىبەرمەۋ كەرەك. ۇرىلاردىڭ كوبى قاداعالاۋسىز جۇرگەن مالدى ۇرلايدى.
دەپارتامەنت باستىعىنىڭ مالىمەتىنشە, اكىمدىكتەردىڭ ىقپال ەتۋىمەن 262 مال تۇراعى ۇيىمداستىرىلعان. بىلتىر 18 مىڭ باس مال سونداي تۇراقتارعا قامالىپ, ۇرلىقتىڭ الدى الىنعان, 5 مىڭعا جۋىق مال يەسى اكىمشىلىك جاۋاپقا تارتىلعان.
– اتالعان قىلمىستى اشۋ جانە الدىن الۋ ماقساتىندا پروفيلاكتيكالىق رەيدتەر جۇرگىزىلدى. اتاپ ايتساق, بازارلار مەن ەت ساتۋ ورىندارىنا تەكسەرۋ جۇرگىزىلىپ وتىرادى. مىسالى, توسقاۋىل بەكەتتەرى ۇيىمداستىرىلىپ, ۇرلانعان مالدى تاسىمالداۋمەن اينالىساتىن 8 قىلمىسكەر ۇستالدى. تاعى 336 ازامات قۇجاتسىز مال جانە ەت ونىمدەرىن تاسىمالداعانى ءۇشىن اكىمشىلىك جاۋاپقا تارتىلدى, – دەدى ساعات ماديەۆ.
وبلىستىڭ باس پوليتسەيى جەدەل-ىزدەستىرۋ ءىس-شارالارىن وتكىزۋ ناتيجەسىندە مال ۇرلاۋمەن اينالىسقان 14 توپتىڭ قۇرىقتالعانىن جانە 700-دەن استام مال يەلەرىنە قايتارىلعانىن اتاپ ءوتتى. ماسەلەن, وسى جىلدىڭ اقپانىندا ۇلان اۋدانىنداعى ەركىن جايىلىمنان قاراۋسىز جۇرگەن 19 باس جىلقى جوعالعان. ولاردى ىزدەۋ ءبىر اپتاعا سوزىلدى. 20 پوليتسيا قىزمەتكەرى جۇمىلدىرىلىپ, بەس بىرلىك تەحنيكا جانە تىكۇشاق تارتىلدى. كاسىبي مامانداردىڭ ەڭبەگىنىڭ ارقاسىندا جوعالعان جىلقىلار تابىلدى. پوليتسەيلەردىڭ ايتۋىنشا, بۇل ءبىر عانا جاعداي ەمەس, قاراۋسىز جۇرگەن مال ءجيى جوعالادى.
الايدا قاراۋسىز مال عانا ەمەس, باعۋلى ت ۇلىكتى تۇمسىق استىنان ۇرلاپ كەتۋ فاكتىسى دە جوق ەمەس. مىسالى, اياگوز اۋدانى, بايقوشقار اۋىلىنىڭ تۇرعىنى پەرىمحان قۇلقاەۆ 2020 جىلى 1 ساۋىردە ۇيىرگە قوسقان جىلقىسىن جوعالتىپ العان. ايتۋىنشا, ىزدەستىرە كەلە جىلقىسىن 19 ساۋىردە ءبىر شارۋا قوجالىعىنان تاپقان ەكەن. ولار جىلقىعا تاڭبا سالىپ ۇلگەرگەن. ءسويتىپ قوجالىق يەسى پەرىمحان قۇلقاەۆقا مالىن قايتارۋدان باس تارتقان. امالى تاۋسىلعان ول پوليتسياعا ارىزدانعان.
– پوليتسيا ەشقانداي شارا قولدانبادى. كەرىسىنشە, 29 شىلدەدە ءىستى دالەلسىز دەپ جاۋىپ تاستاعان. كۋاگەرلەر دە بار. ادىلەتسىزدىككە كونبەي اۋداندىق, وبلىستىق پروكۋراتۋراعا دا ارىز ءتۇسىردىم. ازىرشە, ەش ناتيجە جوق, – دەيدى پەرىمحان قۇلقاەۆ.
وسى ماسەلەگە بايلانىستى شىعىس قازاقستان وبلىستىق پوليتسيا دەپارتامەنتىنە سۇراۋ جولداعان ەدىك. قۇقىق قورعاۋ قىزمەتكەرلەرىنىڭ جاۋابىنا قاراعاندا, ءىس ءالى جابىلماپتى. پ. قۇلقاەۆقا تيەسىلى جىلقىنىڭ جوعالۋىنا بايلانىستى سوتقا دەيىنگى تەرگەۋ جۇرگىزىلىپ جاتقان كورىنەدى. ارىزدانۋشىنىڭ جىلقىسى وبلىس تۇرعىندارىنىڭ ءبىرىنىڭ ۇيىرىندە ەكەندىگى تۋرالى بولجام تەكسەرىلۋدە. ال ءۇيىر يەسى ول جىلقىنىڭ وزىنە تيەسىلى ەكەنىن ايتىپ, ارىزدانۋشىنىڭ بولجامىن جوققا شىعارىپ وتىر. قازىرگى ۋاقىتتا ءتيىستى ساراپتاما جاساۋ جوسپارلانعان. ناتيجەسى بويىنشا تۇپكىلىكتى پروتسەستىك شەشىم قابىلدانادى.
شىعىس قازاقستان وبلىسى
