وبلىستىق دەنساۋلىق ساقتاۋ باسقارماسى ماماندارىنىڭ مالىمەتىنشە, سovid-19 ينفەكتسياسىنا قارسى ۆاكتسينانىڭ ءبىرىنشى كومپونەنتىن 14 مەملەكەتتىك قىزمەتكەر جانە سوزىلمالى اۋرۋلارى بار 157 ادام العان. سونىمەن قاتار 403 پەداگوگ, 410 كۇش قۇرىلىمدارىنىڭ قىزمەتكەرى, 107 ۋچاسكەلىك پوليتسيا قىزمەتكەرى, 88 مەديتسينالىق-الەۋمەتتىك جانە جابىق بالالار مەكەمەلەرىنىڭ قىزمەتكەرى ۆاكتسينالاندى. ودان بولەك, ىندەتپەن بەتپە-بەت كۇرەسۋى مۇمكىن 7 282 مەديتسينا قىزمەتكەرىنە ەكپە ەگىلدى. ەرىكتى تۇردە ەكپە الىپ جاتقانداردىڭ ىشىندە ستۋدەنتتەر مەن قاتارداعى قاراپايىم حالىق تا بار.
1 ءساۋىر كۇنى العاشقىلاردىڭ ءبىرى بولىپ ەكپە سالعىزعان كوكپەكتى اۋدانىنا قاراستى سامارا ورتا مەكتەبىنىڭ اعىلشىن ءتىلى ءپانىنىڭ وقىتۋشىسى انار احماديەۆا ۆاكتسينانى ينتەرنەت ارقىلى مۇقيات زەرتتەپتى. شەتەلدىك جوعارى ساناتتى دارىگەرلەردىڭ, عالىمداردىڭ دالەلدى پىكىرلەرىن وقىعان, اقىل-كەڭەستەرىنە قۇلاق تۇرگەن. ونىڭ ۇستىنە بىلتىرعى جازدا حالىقتىڭ جاپپاي اۋىرعانىن ەسكەرىپ بارىپ, ەكپە الۋعا بەل بۋعان.
– مەن ۆاكتسينا الۋعا ءوز ەركىممەن شەشىم قابىلدادىم. ويتكەنى ءبىز مەكتەپتە جۇمىس ىستەگەندىكتەن, كۇن سايىن بالالارمەن, اتا-انالارمەن بەتپە-بەت كەزدەسەمىز. ءوزىمدى عانا ەمەس, وتباسىمنىڭ, تۋعان-تۋىستارىمنىڭ دەنساۋلىعىن دا ويلادىم. قۇداي ساقتاسىن, اۋرۋ جۇقتىرىپ الىپ, ەم ىزدەگەنشە, الدىن الىپ قويعان ءجون. ەكپەنى كوز جۇما بارىپ قويدىرا سالعان جوقپىن, قۇرامىن دا زەرتتەدىم. دارىگەرلەردىڭ ايتقان سوزدەرىن تارازىلادىم, – دەيدى مەكتەپ مۇعالىمى انار قادىربەكقىزى.
ەكپە العان ازاماتتاردىڭ ايتۋىنشا, پروتسەدۋرا باستالماس بۇرىن دارىگەرلەر ءتۇسىندىرۋ جۇمىستارىن جۇرگىزەدى. تەراپەۆت دارىگەر پاتسيەنتتەردىڭ دەنساۋلىعىن مۇقيات تەكسەرىپ شىعادى. اق حالاتتىلاردىڭ ايتۋىنشا, ەكپە ەگىلگەن سوڭ كەيبىر پاتسيەنتتەردىڭ دەنە قىزۋى كوتەرىلۋى مۇمكىن. كەيبىر جاعدايدا تەمپەراتۋرا 39,2 گرادۋسقا دەيىن بارادى. وعان الاڭداۋعا ەش نەگىز جوق. ىستىق كوتەرىلگەن جاعدايدا دارىگەردىڭ بەرگەن رەتسەپتى بويىنشا ءدارى-دارمەك قابىلداپ, دەنە تەمپەراتۋراسىن قالىپقا كەلتىرۋگە بولادى.
ابىروي بولعاندا, وسى ۋاقىتقا دەيىن ەكپە العانداردىڭ ىشىندە دەنساۋلىعى ناشارلاپ, دارىگەردىڭ كومەگىنە جۇگىنگەن ەشكىم جوق. ءبارى ساتىمەن ءوتىپ جاتقان كورىنەدى. ءبىرىنشى ۆاكتسيناسىن العان ازاماتتار ەندى ەكىنشى كومپونەنتتى الۋعا دايىندالادى.
شىعىس قازاقستان وبلىسى
