بەكزات ساتتارحانوۆ 1980 جىلدىڭ 4 ساۋىرىندە تۇركىستان قالاسىندا دۇنيەگە كەلگەن. ءۇيدىڭ كەنجەسى كىشكەنتايىنان ءالجۋاز بولىپ وسكەن سوڭ, اتا-اناسى بەكزاتتى سپورت ۇيىرمەسىنە بەرۋدى ءجون سانايدى. العاشىندا كۇرەس ۇيىرمەسىنە قاتىسقان ول بالۋاندار سايىسىن قۇپ كورمەي, 1995 جىلدان باستاپ بىلعارى قولعاپقا قۇمارتقان.
بەكزاتتىڭ بوكستاعى عۇمىرى بار-جوعى بەس جىلعا سوزىلعان. كەيبىرەۋلەر ءۇشىن جىلدار بويى باعىنباي كەتكەن وليمپيادا بيىگى بەكزاتقا بەس جىلدىڭ ىشىندە بۇيىرعانى دا تاڭ قالارلىق جايت. اينالدىرعان ەكى جىلدىڭ ىشىندە ەرەسەكتەر قۇراماسىنا ءوتىپ, 1998 جىلى جاستار اراسىنداعى الەم چەمپيوناتىنىڭ كۇمىسىن يەلەنگەن ساتتارحانوۆتان سيدنەي جۇلدەسىن كۇتكەندەر از ەدى. ءتىپتى, ۇلتتىق قۇراماداعى تىسقاققان سپورتشىلار بولماسا, بەكزاتتى جاقىن تانيتىن جانكۇيەرلەردىڭ سانى دا كوپ ەمەس-ءتىن.
دەسە دە, بالا كۇنىنەن چەمپيوندىق اتاقتى ارمانداپ, توقسانىنشى جىلداردىڭ قيىندىعىنا قاراماي جاتتىققان بەكزات ءوز جەڭىسىنە سەنىمدى بولىپ شىقتى.
سيدنەي وليمپياداسىندا ول الەمنىڭ ەڭ ۇزدىك بوكسشىلارىن جۇلدەدەن قاقتى. اتاپ ايتار بولساق, العاشقى اينالىمدا رۋمىنيالىق وۆيديۋ بوبيرناتتى 14:5 ەسەبىمەن جەڭدى.
ەكىنشى كەزدەسۋدە وڭتۇستىك افريكا رەسپۋبليكاسىنىڭ وكىلىن 16:5 ەسەبىمەن ءسۇرىندىردى.
ساتتارحانوۆتىڭ سيدنەيدەگى ەڭ باستى جەكپە-جەگى دەپ رامازان پاليانيمەن وتكەن كەزدەسۋدى ايتۋعا بولادى. بۇكىل تۇرىك جۇرتىنىڭ ءۇمىتى, ەۋروپا چەمپيونى ءپاليانيدى 12:11 ەسەبىمەن ۇتقان سوڭ, بەكزاتتىڭ مىقتىلىعىن مويىندايتىندار قاتارى كوبەيدى.
جارتىلاي فينالا ماروككولىق ءتامسامانيدى 12 ۇپاي باسىمدىعىمەن جەڭگەن قازاق باتىرىن فينالدا باسقا ەمەس, 1999 جىلعى الەم چەمپيونى, امەريكالىق ريكاردو حۋارەس كۇتىپ تۇردى.
ايتسە دە, ازۋلى امەريكالىق تا بەكزاتقا ءتىسىن باتىرا العان جوق. سيدنەي وليمپياداسىنىڭ فينالىندا ساتتارحانوۆ حۋارەستى 22:14 ەسەبىمەن تازا جەڭىپ, قازاقستانعا تاريحي التىن جۇلدەنى سىيلادى.
بەكزات ساتتارحانوۆ وليمپيادا چەمپيونى اتانعان سوڭ بار بولعانى ءۇش اي عانا ءومىر ءسۇردى. سول ءۇش ايدا ەلىمىزدىڭ بار ءوڭىرىن ارالاپ, ءوزى ءۇشىن تاقىم قىسقان قاراپايىم حالىقپەن جۇزدەستى. ەڭ سوڭعى رەت تۋعان قالاسىنداعى مەرەكەلىك جيىندا «جىلدىڭ ۇزدىك سپورتشىسى» اتاعىن الدى دا, اناسىمەن قوشتاسىپ, ماڭگىلىك ساپارعا كەتە باردى.
