بۇل تەحنولوگيا باعدارشامدى قىزىلدان جاسىلعا اۋىستىرۋ ارقىلى رەانيموبيلدەرگە «جاسىل ءدالىز» ۇسىنادى. قازىرگى ۋاقىتتا جابدىقتار رەانيماتسيالىق بريگادالارى بار بىرقاتار جەدەل مەديتسينالىق كومەك ماشينالارىنا ورناتىلدى.
جەدەل جاردەمگە ارنالعان بۇل تەحنولوگيا پيلوت رەتىندە «City Transportation Systems» كومپانياسىمەن بىرلەسىپ دەنساۋلىق ساقتاۋ سالاسىن تسيفرلاندىرۋ اياسىندا 2018 جىلى ەنگىزىلگەن. تەحنولوگيا جمك اۆتوموبيلدەرىنە ورناتىلعان اقپاراتتىق جۇيەلەر مەن ارنايى جابدىقتاردى ينتەگراتسيالاۋ ارقىلى جۇرگىزۋشىلەر قاجەت بولعان جاعدايدا باعدارشام سيگنالدارىن قىزىلدان جاسىلعا اۋىستىرا الاتىندىعىمەن ەرەكشە.
«اتالعان تەحنولوگيانى ەنگىزۋ بريگادانىڭ ناۋقاسقا جەتۋ ۋاقىتىن ايتارلىقتاي قىسقارتادى. وسىلايشا جەدەل مەديتسينالىق كومەكتى ۋاقىتىلى جانە ساپالى كورسەتۋ بويىنشا كورسەتكىشتەر جاقساردى. ارى قاراي قالا اكىمدىگى مەن قوعامدىق دەنساۋلىق ساقتاۋ باسقارماسى سانيتارلىق اۆتوكولىكتەردىڭ ءبارىن وسى تەحنولوگيامەن جابدىقتاۋدى جالعاستىرادى», دەلىنگەن باسقارما حابارلاماسىندا.
«جاسىل باعدارشام» جەدەل جاردەم كولىگىن سۇيەمەلدەۋدىڭ جاعىمدى جاقتارىن كورسەتتى. اتاپ ايتقاندا, ءجۇرۋ ۋاقىتى ورتا ەسەپپەن 30%-عا قىسقاردى.
وسىعان دەيىن گوسپيتالعا جەتۋ ۋاقىتى 14 مينۋتتى السا, بۇل تەحنولوگيانىڭ كومەگىمەن جەدەل جاردەم كولىگى مەجەلى جەرگە, سونداي-اق 11 كم نەمەسە ودان دا ۇزاق جولعا 10 مينۋتقا جەتەر-جەتپەس ۋاقىتتا جەتەدى.
«شاقىرۋعا اسىعىپ بارا جاتقاندا نەمەسە پاتسيەنتتى اۋرۋحاناعا مۇمكىندىگىنشە جەدەل جەتكىزۋ كەزىندە بۇل تەحنولوگيا ءبىز ءۇشىن تاپتىرمايتىن كومەك بولىپ سانالادى. سەبەبى ءبىز ءۇشىن ءار مينۋت قۇندى. اسىرەسە, كەشكى كەپتەلىس ۋاقىتىندا ماڭىزدى ءرول اتقارادى», دەيدى جممك رەانيموبيل جۇرگىزۋشىسى اسحات اقتاەۆ.
قالا اكىمى التاي كولگىنوۆ 2020 جىلدىڭ كۇزىندە «103» كولىك قۇرالدارىن ينتەللەكتۋالدى كولىك جۇيەسىنە تولىققاندى بىرىكتىرۋدى قامتاماسىز ەتۋ ماسەلەسىن تاپسىرعان بولاتىن.
