قوعام • 01 ءساۋىر، 2021

الماتىدان اۆتوبۋستار تۇندە اتتانادى...

364 رەت كورسەتىلدى

الدەقانداي شارۋامەن الماتىدان شىمكەنتكە جول جۇرەتىن بولدىق. جولاۋشى تاسىمالدايتىن كولىكتەردىڭ كۇندىز دە اعىلىپ جاتاتىنى بەلگىلى، الايدا، «اتار تاڭعا جۇرسەڭ دە، باتار كۇنگە جۇرمە» دەيتىن كەشەگى قيسىن بۇگىنگە جۇرمەيدى، اۆتوبۋستار الماتىدان تۇندە اتتانادى.

اقشام مەزگىلى بولىپ قالعان ۋاقىت، بيلەتىمىزدى الىپ، ساپارلاستارمەن ءيىن تىرەسە بارىپ ورنىمىزعا جايعاستىق. الىس ساپار العاشقى قادامنان باستالادى، باستىسى، ەرمەك ەتكەنگە تەلەديدارى بار جايلى، جاڭا اۆتوبۋس. شاھار شەكاراسى ىسپەتتى «التىن وردا» اتالاتىن اۋماقتان شىعا بەرە، اۆتوبۋس جۇرگىزۋشىسى «پراۆيلا ۋگونا» دەگەن ءفيلمنىڭ ديسكىسىن قوستى. جول ۇزاق، بۇرىن ۇزىن جولعا اۆتوبۋس­پەن شىعىپ كورمەگەن سوڭ شالقايىپ جاتىپ ەل قاتارلى ءبىز دە قىزىقتاپ كوز سالدىق. رەسەي مەن ۋكراينانىڭ دوس بولىپ تۇرعان كەزىندە بىرلەسىپ تۇسىرگەن قىلمىس تاقىرىبىنداعى دەتەكتيۆ سەريالدىڭ ستسەناريىن جازعان – مۇرات تولەەۆ. اتىس-شابىس، زورلىق-زومبىلىق، ادام ءولتىرۋ سياقتى قىلمىس تاقىرىبىنداعى «شەدەۆر» فيلمدەردى شىعارۋدا الدىنا قارا سالمايتىن رەسەيدىڭ كينونارىعىندا شەبەرلىگى ولاردان ءوتىپ، ۇلكەن باسەكەدە قىلاڭ بەرىپ جۇرگەن بۇل قاي قازاق بولدى دەگەن اۋەستىك الگى فيلمگە ەرىكسىز شۇقشيتتى. 40 مينۋتتان تۇراتىن سەگىز سەريانىڭ العاشقى مينۋتتارىنان-اق اجال مۇڭكىگەن اقشانىڭ سوڭىنداعى الا شاپقىن باستالدى دا كەتتى – جەڭىل كولىكتەردى يەسىنەن تارتىپ الىپ ايداپ اكەتۋ، جوعارى جىلدامدىقپەن اعىزىپ كەلە جاتىپ اۋدارىلۋ، قۇقىق قورعاۋشىلاردىڭ زاڭدى بەلدەن باسىپ، قىلمىسكەرلەرگە ساتىلۋى، قىزىلشەكە توبەلەس، قاندى وقيعالاردىڭ تىزبەگى سەكۋند سايىن جالعاسىپ، 700 شاقىرىمعا جۋىق جولدى «قىسقارتۋعا» تولىقتاي جەتتى. تىلسىم ءتۇن تىنىشتىعىن بۇزعان بۇل بەينەكورىنىستەرگە سوعىلعان كولىكتىڭ، اتىلعان قارۋدىڭ، شاعىلعان اينەكتىڭ، شىڭعىرعان ادامنىڭ داۋىسى قوسىلعاندا، زاۋلاپ كەلە جاتقان اۆتوبۋس جولىنان تايىپ، انە-مىنە زاۋال كەلىپ قالعانداي جان مۇرىننىڭ ۇشىنا كەلەدى.

«بۇيتكەن قازاعى بار بولسىن» دەدىك، ينەنىڭ ۇشىندا وتىرىپ تاڭعا دەيىن سول ءفيلمدى كورگەن وزىمىزگە ياكي، جانتۇرشىگەرلىك وقيعانى كورۋگە ءماجبۇر ەتكەن جۇرگىزۋشىگە رەنجىگەنىمىزدى بىلمەي مەڭ-زەڭ قالپى كولىكتەن ءتۇسىپ بارا جاتىپ. ەڭ سۇمدىعى سول، قايتقاندا باسقا اۆتوبۋسقا وتىرعانىمىزبەن، وندا دا وسى قيقۋلاعانداردىڭ قاندى قاسابى، ايىرماشىلىعى «راسپلاتا» دەپ اتالادى...

اۆتوبۋس ءىشىن ازان-قازان ەتىپ، ءبىر-ءبىر ءۇيدىڭ ارقاسۇيەرىن، اسىراۋشىسىن، التىن قازىعىن، قازىناسىن، شامشىراعىن تيەپ الىپ قۇيىنداتىپ كەلە جاتقان جۇرگىزۋشى كوكتىڭ قارىمتا قاھارىن المادى قايتا، جانىمىز امان قالدى. جول كەشىردى. ۇنەمى كەشىرە بەرمەيتىنىن، ءدال وسى ادام تيەگەن اۆتوبۋستاردىڭ جول اپاتىنا ءجيى ءتۇسىپ جاتاتىنىن كۇندە كورىپ، ەستىپ ءجۇرمىز. باقىتسىزدىقتان، قايعىدان ءبارىمىز قاشىق بولعىمىز كەلەدى. بەيبىت كۇندە قاسىرەتتىڭ قۇردىمىنا قۇلاپ، جول اپاتىنان قايتىس بولاتىنداردىڭ سانى سوعىستا ءجۇرىپ قازا تاباتىنداردىڭ سانىمەن تەڭەسەتىن دارەجەگە جەتتى. جىلدامدىعىن اسىرىپ جۇرگىزگەنىمەن قويماي، ادامعا جاعىمسىز اسەر ەتەتىن فيلم كورسەتىپ، ءومىرىن قاتەرگە تىككەن وسى اۆتوبۋس جۇرگىزۋشىسىنىڭ بەلىنە گراناتا بايلاپ الىپ اتويلاپ شاباتىن تەررويست-كاميكادزەدەن نە ايىرماشىلىعى بار، مىسالى؟

ناتيجەسىندە، بيىلعى جىلدىڭ 1 اق­پا­نىن­داعى دەرەك بويىنشا، كارانتين كە­زىن­دە شەكتەۋ قويىلىپ، كولىك قوزعالىسى تەجەلدى دەگەن 2020 جىلى 13 515 جول-كولىك وقيعاسى تىركەلىپ، 19 841 ادام زارداپ شەككەن، 1997 ادام، ياعني 2 مىڭعا جۋىق ادام قايتىس بولعان. ادام ولىمىمەن اياقتالعان، جاراقاتتانعاندار سانى جاعىنان ادەتتەگىدەي الماتى قالاسى ەڭ الدىڭعى ورىندا. جول-كولىك وقيعاسىنىڭ كورسەتكىشى 2019 جىلمەن سالىستىرعاندا 19،3 پايىزعا عانا تومەندەگەن. اس پەن توي دەسە انداعايلاپ شاباتىن سابىلىس تىيىلدى دەگەندەگى كورسەتكىشتىڭ تومەندەگەن ءتۇرى وسى عانا. دۇنيەجۇزىلىك دەنساۋلىق ساقتاۋ ۇيىمىنىڭ دەرەگىنشە، قازاقستان بويىنشا جىل سايىن ءار 100 مىڭ تۇرعىنعا شاققاندا 17،3 ادام ءولىمى تىركەلەدى. الەمدىك كورسەتكىشتە بۇل ورتاڭعى ورىنداردىڭ بىرىنە تيەسىلى. حالقى بىزدەن 10 ملن-عا ارتىق اۋستراليادا وسى كورسەتكىشپەن بەس ادام اجال قۇشسا، الىپ اۋماقتا ورنالاسقان حالقى از ەل ءۇشىن بۇل ءتىپتى دە كەشىرىلمەيتىن كورسەتكىش.

قۇدايىن جۇرەگىنە قۇنداقتاپ الىپ، بەل­گىسىزدىككە باس قويىپ الىس ساپارعا شىققان ءمۇ­ساپىر جولاۋشىعا الىستاعى بالە-جالا اتىس-شابىس كينونىڭ اسەرىمەن-اق تابان استىنان تابىلۋى مۇمكىن. زورلىقشىل كينونىڭ اگرەسسياسى باس كلەتكاسىنان باستاپ جۇرەك، جۇيكە تامىرلارىن تۇتاس جايلاپ، اقىرىندا ساناسى، دەنەسى تۇرشىككەن ادامنىڭ ءوز مىنەزىنىڭ دە اشۋلانشاق، قاتال تارتاتىنى، پسيحولوگتەردىڭ قاتىگەزدىكتى ناسيحاتتايتىن فيلمدەردى كورۋدەن ساقتاندىراتىن دابىلى تەكتەن-تەك ەمەس. ارينە، جول قاۋىپسىزدىگى ءۇشىن قورقىنىشتى كينو دا، ءبىلىم دە جاۋاپكەرشىلىك ارقالامايدى، وعان بار بولعانى سانا بيىكتىگى مەن ەرەجە-ءتارتىپتىڭ ساقتالعانى عانا كەرەك. ەفيردىڭ ارزانقول، قارادۇرسىن «ەكشندەرىن» تابىس تابۋدىڭ ءبىر قۇرالى ەتكەن ەكسترەمالدارعا مۇنى قايتىپ تۇسىندىرەرسىڭ؟..

سوڭعى جاڭالىقتار

Atmaca زىمىرانى سىناقتان ءساتتى ءوتتى

تەحنولوگيا • بۇگىن، 18:35

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار