وبلىستاعى تۋريزم يندۋسترياسىن نەگىزىنەن وسى ءۇش باعىتتا دامىتۋدىڭ قولعا الىنعانى دا وسى ويدى قۋاتتاي تۇسەدى.
ءبىر قۋانارلىعى سول, بۇگىنگى كۇندە ءتۋريزمنىڭ تالپىنعان جاندى تابىسسىز قالدىرماسىن ۇققان قاراعاندىنىڭ بيزنەس وكىلدەرى بۇل سالانى دامىتۋعا بىلەك سىبانا كىرىسكەن. زادى, قارقارالىنى «قازاقستاننىڭ شۆەيتسارياسى» دەپ تەگىن ايتپايدى. مۇندا ءوڭىردىڭ ءوڭىن كىرگىزىپ, شىرايىن كەلتىرىپ جانە تۋريستەردى ماگنيتشە تارتىپ تۇراتىن مەملەكەتتىك ۇلتتىق تابيعي پارك بار. جەرى تاۋ-تاستى, نۋ ورماندى بولىپ كەلەتىن پاركتىڭ اۋماعى 112,1 مىڭ گەكتاردى قۇرايدى. ونىڭ 29,1 مىڭ گەكتارىن تۋريستىك-رەكرەاتسيالىق دامۋعا ارنالعان جەرلەر الىپ جاتىر. ال بۇل دەگەنىڭىز, وسى اۋماقتا ءتۋريزمدى دامىتۋعا مول مۇمكىندىك بەرەتىن اسا قولايلى جاعداي بار دەگەن ءسوز.
قازىردىڭ وزىندە قارقارالى ۇلتتىق تابيعي پاركىنىڭ اۋماعىندا وسى ماقساتتا جالپى كولەمى 143,1 گەكتار جالعا الۋعا بولاتىن جەر ۋچاسكەلەرى بەلگىلەنگەن. ونىڭ ىشىندە 19 جەر ۋچاسكەسى قىسقا مەرزىمگە جانە 11 جەر ۋچاسكەسى ۇزاق مەرزىمگە بەرىلەتىن بولادى. قازىرگى ۋاقىتتىڭ وزىندە قىسقا مەرزىمگە بەرىلەتىن 11 جەر ۋچاسكەسىندە 17 كەلىسىمشارت جاسالعان جانە بەس جەر ۋچاسكەسى ۇزاق مەرزىمگە جالعا تاپسىرىلىپ, جاڭا نىساندار اشۋ جۇمىستارى جۇرگىزىلۋدە.
جالپى ۇلتتىق تابيعي پاركتە تۋريستەردى تارتۋ ماقساتىندا قولعا الىنعان شارۋالار از ەمەس. مىسالى مۇندا تابيعات مۇراجايى مەن جابايى اڭدار تۇراتىن ۆولەر ساياحاتشىلارعا قىزمەت كورسەتەدى. ۇلتتىق تابيعي باقتىڭ اۋماعىندا 11 تۋريستىك مارشرۋت رەسمي تىركەلىپ, جۇمىس ىستەپ تۇرعانىن دا ەسكە سالا كەتكەن ءجون.
قارقارالى ۇلتتىق تابيعي پاركىنىڭ ديرەكتورى ايدار دارباەۆتىڭ ايتۋىنشا, مەكەمەدە ورمانشى, قورىقشى, كۇزەتشى, ەكولوگ, تۋريستىك مامانداردىڭ ءبارىن قوسىپ ەسەپتەگەندە, 120-دان استام ادام جۇمىس ىستەيدى ەكەن. وسىنداعى ەلىك, بۇعى, قابان جانە بيزون سىندى اڭداردى كورۋگە ىنتىققان جۇرتتىڭ قاراسى ءتىپتى دە قالىڭ بولاتىن كورىنەدى. مىسالى 2019 جىلدىڭ وزىندە 35 مىڭنان استام ادام بۇل جەرگە ارنايى كەلىپتى. بيزون دەمەكشى, پاركتە تابيعاتتا سيرەك كەزدەسەتىن بۇل جانۋاردىڭ ءۇش انالىعى مەن ءبىر بۇقاسى بار ەكەن.
ۇلتتىق پاركتىڭ اۋماعىنا كىرۋ ءۇشىن ءار ادام 0,1 اەك كولەمىندە اقى تولەيدى. قازىر ول شامامەن 278 تەڭگەنى قۇرايدى. بىلتىر, مىسالى, قىزمەتتىڭ وسى تۇرىنەن 42,8 ملن تەڭگە پايدا ءتۇسىپتى. ءتۋريزمنىڭ قۇدىرەتى دە وسىندا: ءىستىڭ قيۋىن تاپساڭ, اسپاننان اقشانى قارشا جاۋدىرادى!
قارقارالىنىڭ جاقسى اتىن جالعىز ۇلتتىق تابيعي پارك قانا شىعارىپ تۇرعان جوق. كورەم دەگەنگە نيەت بىلدىرگەن قاۋىمعا ودان تىس جەرلەردە دە كوپتەگەن كوزايىم نىساندار بار. مىسالى قۇنانباي قاجى مەشىتى, اباي تۇسكەن ءۇيى, ءمادي ءباپي ۇلىنىڭ ەسكەرتكىشى مەن بەيىتى, تاريحي-ولكەتانۋ مۇراجايى, 78 كوممۋناردىڭ ەسكەرتكىشى, باسقا دا كوپتەگەن تاريحي-مادەني ورىنداردىڭ جەتكىلىكتى ەكەنىن ايتا كەتكەن ءجون.
بۇگىنگى كۇندە اۋدانعا ات ارىتىپ كەلەتىن قوناقتارعا ارنالعان 31 دەمالىس ورنى مەن قوناق ءۇي جۇمىس ىستەپ تۇر. بۇلاردىڭ جالپى العاندا 2,7 مىڭنان استام ادامدى قابىلداپ, قىزمەت كورسەتۋگە الەۋەتى جەتەدى. ەڭ باستىسى, بۇل سالادا 300-دەن استام ادام جۇمىس ىستەپ, ناپاقاسىن تاۋىپ ءجۇر.
اۋدان اكىمى ەلدار دۇيسەتاەۆ قارقارالى قالاسى ءۇشىن اسا قولايلى تۋريزم سالاسىن دامىتۋ قاجەت دەپ سانايدى. «الداعى ۋاقىتتا قارقارالى قالاسىنىڭ تاريحي ورتالىعىن جاڭعىرتۋ ويدا بار. ءتۋريزمدى دامىتۋ جوباسى اياسىندا ينفراقۇرىلىمدى جەتىلدىرۋدى, تاۋ-شاڭعى, ساۋىقتىرۋ كەشەندەرىن سالۋدى, قوناق ءۇي, مەيرامحانالاردىڭ جانە بوگەتتە قالالىق جاعاجايدىڭ قۇرىلىس جۇمىستارىن جۇرگىزۋدى جوسپارلاپ وتىرمىز», – دەيدى اۋدان باسشىسى.
رەسمي ستاتيستيكاعا سەنسەك, 2020 جىلدىڭ 9 ايىنىڭ قورىتىندىسى بويىنشا دەمالۋعا كەلگەندەرگە كورسەتىلگەن قىزمەت كولەمى 197,9 ملن تەڭگەنى قۇراپتى. كەلۋشىلەردىڭ سانى 11680 ادامعا جەتكەن. البەتتە, دەمالۋشىلاردىڭ سانى كارانتيندىك شەكتەۋلەرگە بايلانىستى ءسال-ءپال تومەندەگەن ەكەن. الايدا ماماندار مۇنىڭ ۋاقىتشا كورسەتكىش ەكەنىن ايتادى.
قارقارالىدا دەمالۋشىلاردىڭ قىزىعىپ كەلەتىن جەرىنىڭ ءبىرى – سامالكولدىڭ جاعاسىنا ورىن تەپكەن «شاحتەر» دەمالىس ءۇيى. «ارسەلورميتتال تەمىرتاۋ» كومپانياسىنا قاراستى بۇل بازانىڭ جانىندا تاۋ شاڭعىسى كەشەنى بار. قىستىڭ قىزىعىن وسىندا كەلىپ كورگەندەر ونىڭ اتاقتى شىمبۇلاقتان ءبىر دە ءبىر كەم ەمەسىن ايتار ەدى. مىسالى, مۇندا دا 500 مەتر بيىكتىكككە شىعاراتىن اسپالى ارقانجول بار. مەجەلى بيىككە كوتەرىلگەننەن كەيىن شاڭعىمەن نەمەسە شانامەن قۇلديلايمىن دەسەڭىز, ەرىك وزىڭىزدە.
«شاحتەر» دەمالىس ۇيىندە كەلۋشىلەرگە ارنالعان سەرۆيستىك قىزمەت دۇرىس جولعا قويىلعان. بۇل جەردەگى قوناتىن بولمەلەردىڭ جايلىلىعى, تاماعىنىڭ دامدىلىگى تۋراسىندا جىلى لەبىز بىلدىرەتىن دەمالۋشىلاردىڭ قاتارى ۋاقىت وتكەن سايىن ارتىپ كەلەدى. باعاسى دا قولجەتىمدى. مىسالى, مۇندا ادام باسىنا تاۋلىگىنە 12 مىڭ تەڭگەدەن الىنادى. بۇل سومانىڭ ىشىنە جاتىن ورىن جانە ءتورت مەزگىل تاماق كىرەدى. ال قالعان قىزمەت تۇرلەرىنىڭ, مىسالى, ساۋناعا ءتۇسۋ, بيليارد ويناۋ, قىستا شاڭعى تەبۋ, جازدا قايىقپەن ءجۇزۋدىڭ اقىسىن ءتىپتى دە سۋ تەگىن دەۋگە بولادى.
«بەرلوگا» دەپ اتالاتىن دەمالىس ءۇيىنىڭ دە «شاحتەردەن» كەم تۇسەر جەرى جوق. مۇندا كوبىنە دەمالىستىڭ وتباسىلىق ءتۇرىن تاڭداعاندار ات باسىن تىرەيدى ەكەن. دەمالۋشىلار شاڭعى, شانا, تيۋبينگ تەبۋدەن شارشاسا, اتپەن سەرۋەندەۋىنە دە جاعداي جاسالعان. ءتىپتى حاسكي يتتەرى جەگىلگەن شاناعا ءمىنىپ, قىزىققا باتۋعا دا مول مۇمكىندىك بار. سالاماتتى ءومىر سالتىن ۇستانۋعا باعىتتالعان وسى دەمالىستاردان كەيىن كاراوكە زالىنا بارىپ, قالاعانىڭىزشا ءان ايتىپ, كوڭىل كوتەرۋ دە قوناقجاي مەكەننىڭ سۇيسىنتەتىن قىزمەتىنىڭ بىرىنە اينالعان. ايتپاقشى, ءدال وسى «بەرلوگا» دەمالىس ءۇيىنىڭ تۇبىنەن 1200 مەتر بيىكتىكتە جاتقان اتاقتى شايتانكولگە تىكەلەي كوتەرىلۋگە بولادى.
قارقارالى اۋداندىق كاسىپكەرلىكتى دامىتۋ جانە ونەركاسىپ ءبولىمىنىڭ باسشىسى سەرىك تولەۋبەكتىڭ ولكەدە تۋريزم سالاسىن دامىتۋدى ماقسات ەتكەن جوسپارلار تۋرالى ايتقانى كوڭىلگە قۋانىش ۇيالاتادى. مىسالى, الداعى ۋاقىتتا قالانىڭ ءوز باسىندا قۇنى 15 ملن تەڭگەنى قۇرايتىن قوناق ءۇيدىڭ قۇرىلىسى باستالادى ەكەن. تاعى ءبىر كاسىپكەر ەسكى قازاندىق عيماراتىن قالپىنا كەلتىرىپ, قوماقتى قارجى سالىپ, قوناق ءۇيدىڭ قۇرىلىسىن جۇرگىزبەكشى.
ال «بۇعىلى» شاتقالىندا قولعا الىنباقشى جوبا اۋقىمدىلىعىمەن نازار اۋدارادى. ءساتىن سالسا, مۇندا ينجەنەرلىك ينفراقۇرىلىم دۇرىس جولعا قويىلعاننان كەيىن, تاۋ-شاڭعى جانە شيپاجاي-ساۋىقتىرۋ كەشەندەرىنىڭ, ستاديوننىڭ, قوناقۇيلەر, دەمالىس ۇيلەرى, مەيرامحانالاردىڭ قۇرىلىسى باستالادى. كول جاعاسىندا قالالىق جاعاجاي جاسالماقشى. بۇدان بولەك ەتنو, جاياۋ ءجۇرۋ, تاۋعا شىعۋ, شاڭعى تەبۋ, ات سپورتى, ۆەلوسيپەد جانە موتوتسيكل ءتۋريزمىن دامىتۋ دا جوسپارعا تۇزىلگەن. سونىمەن قاتار قارقارالىداعى بارلىق ساۋىقتىرۋ, كوڭىل كوتەرۋ, دەمالۋ, قىزمەت كورسەتۋ ورىندارىنا قىزىعۋشىلىق تانىتقان ادامدارعا ارنالعان Visit.Karkaraly ۆەب-سايتىن ازىرلەۋ بويىنشا جۇمىستار قولعا الىنباقشى. ال بولاشاقتا شاعىن ۇشاقتارعا ارنالعان اۋەجاي اشۋ يدەياسى قارقارالىلىقتاردىڭ تۋريزم سىندى يگىلىكتى جانە ىرزىقتى سالاعا ەرەكشە ءمان بەرىپ وتىرعانىن كورسەتسە كەرەك.
