بۇگىن الماتى قالاسىنداعى حالىقارالىق اۋەجايعا قازاقستان قارۋلى كۇشتەرىنىڭ ءتورتىنشى قۇراما روتاسى مىنگەن بورت كەلىپ قوندى. اسكەري قىزمەتشىلەر 2020 جىلدىڭ تامىز ايىنان باستاپ بۇۇ-نىڭ مانداتىنا سايكەس ليۆانداعى ءۇندى باتالونىنىڭ قۇرامىندا مىندەتتەرىن اتقارىپ كەلەدى.
ميسسيا باسشىلىعى, شەتەلدىك ارىپتەستەر مەن باقىلاۋشىلار ەل اسكەري قىزمەتشىلەرى وزدەرىن جاۋاپكەرشىلىگى مول, جوعارى بىلىكتى مامان رەتىندە تانىتقاندارىن بىرنەشە مارتە اتاپ وتكەن.
– «بۇۇ-نىڭ ليۆانداعى ۋاقىتشا كۇشتەرى» ميسسياسىنىڭ باسشىلىعى سىزدەردىڭ كاسىبي شەبەرلىكتەرىڭىزدى جوعارى باعالادى. ادال قىزمەتتەرىڭىز بەن جوعارى جاۋىنگەرلىك دايارلىقتىڭ ناتيجەسىندە وتانىمىزدىڭ عانا ەمەس, سونىمەن قاتار بۇكىل الەمگە پاتريوتيزم مەن اسكەري قىزمەتتى جوعارى دەڭگەيدە ۇيىمداستىرۋدىڭ جانە جاۋىنگەرلىك ازىرلىكتىڭ ۇلگىسىن كورسەتتىڭىزدەر. الەم ارەناسىندا ەلىمىزدىڭ بەدەلىن نىعايتۋ ءۇشىن قازاقستاننىڭ اتىنان بىتىمگەرلىك ميسسياعا قاتىسۋدىڭ ماڭىزى زور. سىزدەر وسى ميسسياعا اۋقىمدى ۇلەس قوستىڭىزدار, - دەدى دەسانتتىق-شابۋىلداۋ اسكەرلەرىنىڭ باسشىسى گەنەرال-مايور قانىش ابۋباكىروۆ.
جۋىردا ليۆان رەسپۋبليكاسىنا بەسىنشى بىتىمگەرلىك كونتينگەنتى كەتتى. بارلىق اسكەري قىزمەتشىلەر مۇقيات تەكسەرۋدەن وتكەن. بىتىمگەرلەردىڭ ىستىق كليماتتا, كۇردەلى سانيتارلىق-ەپيدەميولوگيالىق جاعدايدا ورىندايتىن قىزمەتىن ەسكەرە وتىرىپ, ولاردىڭ دەنساۋلىعى مەن مورالدىق-پسيحولوگيالىق تۇراقتىلىعىنا باسا نازار اۋدارىلادى. ىرىكتەۋ بارىسىندا دەنە دايارلىعى, اعىلشىن ءتىلىن مەڭگەرۋى, سونداي-اق قارۋلى كۇشتەر قاتارىنداعى قىزمەت تاجىريبەسى ەسكەرىلەدى.
ليۆانعا ساپار الدىندا كونتينگەنت ءبىر اي ۋاقىت بويى كارانتيندە بولىپ, ۇشارعا ەكى كۇن قالعاندا پتر تەست تاپسىردى.
قازاقستان كونتينگەنتى يزرايل مەملەكەتىنىڭ شەكاراسىنداعى وڭتۇستىك ليۆانعا قاراستى UNIFIL بازالارىنىڭ بىرىنە ورنالاستىرىلماق.
كۇن سايىن قازاقستاندىق اسكەري قىزمەتشىلەر ءۇندى بىتىمگەرلەرىمەن بىرلەسىپ 50-گە جۋىق مىندەتتى ورىنداۋى ءتيىس. اتاپ ايتساق, جەرگىلىكتى جەردى پاترۋلدەۋ, باقىلاۋ بەكەتتەرىن, بلوك-بەكەتتەردى ۇيىمداستىرۋ مەن ميسسيانىڭ باسقا دا ءىس-شارالارىنا قاتىسۋ.
