جالپىۇلتتىق جوبا تۇركىستان قالاسىندا باستاۋ الىپ, جامبىل , ماڭعىستاۋ, قىزىلوردا وبلىستارى مەن شىمكەنت قالاسىندا جالعاستى.
وسىلايشا پرەزيدەنتتىڭ ورمان القاپتارىندا 2 ملرد, ەلدى مەكەندەردە 15 ملن اعاش وتىرعىزۋ تۋرالى تاپسىرماسىن ورىنداۋعا ستارت بەرىلدى. «مەكەنىم – جاسىل ەلىم» اكتسياسىنا 60 مىڭ ادام ات سالىسىپ, 486 مىڭ ءتۇپ اعاش وتىرعىزىلدى. وقۋشىلاردىڭ «مەنىڭ اعاشىم» چەللەندجىنە 31 مىڭ ادام قاتىسىپ, 39 مىڭ كوشەت ەگىلدى.
«مەملەكەت باسشىسى قاسىم-جومارت توقاەۆ حالىققا جولداۋىندا قورشاعان ورتا احۋالىن جاقسارتۋ باعىتىندا تاپسىرمالار بەردى. جالپىۇلتتىق ەكولوگيالىق شارالار Nur Otan پارتياسىنىڭ سايلاۋالدى باعدارلاماسىندا, ەل تاۋەلسىزدىگىنىڭ 30 جىلدىعى اياسىندا دا قاراستىرىلعان. وزگە وڭىرلەردە دە وسىنداي شارالار اۋا رايىنا بايلانىستى ساۋىردە وتەدى», دەدى مينيستر تۇركىستانداعى شاراداعى سوزىندە.
مينيستر جۇمىس ساپارىمەن كەلگەن تۇركىستانداعى اكتسيا اياسىندا قالا ىرگەسىندە قۇرىلىپ جاتقان جاسىل بەلدەۋگە كوپ جىلدىق اعاش كوشەتتەرى ەگىلدى.
«وبلىسىمىز بويىنشا 3 ملن 131 مىڭ گا ورمان قورى جەرلەرى بار, ونىڭ ىشىندە ورمانمەن كومكەرىلگەن القابى 1 ملن 630 مىڭ گەكتاردى قۇرايدى. تۇركىستان ىرگەسىندەگى جاسىل بەلدەۋ اۋماعىن كەلەر جىلعا دەيىن تاعى 3000 گەكتارعا كەڭەيتىپ, تولىق اياقتاۋ جوسپارى بار. ال ورمان تۇقىمباقتارىن دامىتۋ ءۇشىن وندا ءار جىلى 35,0-40,0 ملن. ءار-ءتۇرلى اعاش كوشەتتەرىن وسىرەمىز», - دەپ اتاپ ءوتتى وبلىس اكىمى ومىرزاق شوكەەۆ.
تۇركىستان وبلىسى اكىمدىگى مەن مينيسترلىك بىرلەسە قابىلداعان كەشەندى جوسپارعا سايكەس, 2025 جىلعا دەيىن ءوڭىر اۋماعىندا جالپى اۋماعى 110210 گەكتارعا 170000,0 ءتۇپ كوشەت ەگىلمەك.
شارا بارىسىندا ارداگەرلەردىڭ, وتاندىق جانە تۇركىستان حالىقارالىق مەديافورۋمىنا جينالعان تۇركىتىلدەس ەلدەر باق وكىلدەرىنىڭ قاتىسۋىمەن قوجا احمەت ياسساۋي كەسەنەسى ماڭىنداعى بوتانيكالىق باققا دا اعاش وتىرعىزىلدى. جاڭا اۋەجاي جولىنداعى جەمىس باۋىنا ورىك ەگىلدى. ساياباقتار, اللەيالار اباتتاندىرىلىپ, سەنبىلىك ۇيىمداستىرىلدى.
ماعزۇم مىرزاعايەۆ «تازا تابيعات» اكتسياسىنىڭ ناۋرىز مەرەكەسىندە, تۇركىستاندا وتكىزىلۋىنىڭ ەرەكشە ءمانى بار ەكەنىن جانە جوبانى داستۇرگە اينالدىرۋ قاجەتتىگىن ايتتى.
«تۇركى الەمىنىڭ بەسىگى بولعان كيەلى مەكەننىڭ گۇلدەنۋى ەل ابىرويىن ارتتىرادى. ەلباسى نۇرسۇلتان نازارباەۆتىڭ باستاماسىمەن كوركەيىپ جاتقان قالاعا كەلگەن قوناقتاردىڭ كوزى الدىمەن اينالانىڭ تازالىعى مەن جاسىل جەلەككە تۇسەدى. ءبىز ناۋرىز مەيرامىن اينالانى كوگالداندىرۋ مەن تازارتۋدان باستاۋدى داستۇرگە اينالدىرۋىمىز كەرەك. مۇنداي اكتسيالار حالىقتىڭ ەكولوگيالىق مادەنيەتىن, تابيعاتقا جاناشىرلىقتى ارتتىرادى. قازاقستاندا ەكولوگيا پروبلەمالارىنا بەيجاي قارامايتىن, وسىنداي شارالارعا بەلسەندى قاتىساتىن ازاماتتار سانىنىڭ كوبەيۋى ءبارىمىزدى قۋانتادى», دەدى مينيستر.
«تازا تابيعات» جوباسى شەڭبەرىندە جوعارىدا اتالعان بارلىق وڭىردە قوقىستان تازارتۋ ماقساتىنداعى «بىرگە – تازا قازاقستان» جوباسى جالعاسىن تاپتى. «تازا سۋ ايدىندارى» اكتسياسى اياسىندا وزەن-كولدەر جاعاسى تازارتىلىپ, بۇلاق كوزدەرى, سۋارمالى سۋ ارنالادى ارشىلدى. ۇلتتىق پاركتەر مەن باسقا دا تابيعي اۋماقتاردا «پاركتەر شەرۋى» ءوتتى.
ەسكە سالايىق, كەشە مەملەكەت باسشىسى قاسىم-جومارت توقاەۆ ناۋرىز مەيرامىمەن قۇتتىقتاۋىندا «تازا تابيعات جوباسىنىڭ ماڭىزىن اتاپ وتكەن بولاتىن.
«ناۋرىزدىڭ تاعى ءبىر بەلگىسى – ۇقىپتىلىق پەن تازالىق. قازاق – تابيعاتقا ەتەنە جاقىن حالىق. ۇلىستىڭ ۇلى كۇنى بۇلاقتىڭ كوزىن اشىپ, اعاش ەگۋ, قورشاعان ورتانى تازا ۇستاۋ – ەرتەدەن جالعاسىپ كەلە جاتقان ءداستۇرىمىز. ءبىز قولعا العان «تازا تابيعات» جوباسىنىڭ نەگىزگى ماقساتى – سول يگى شارانى جالعاستىرۋ», دەگەن بولاتىن پرەزيدەنت.
