سالتاناتتى ءىس-شارا بارىسىندا ەلشىلەر ەرگەنەقوننان باستالاتىن بايىرعى تۇركىلەردەن كەلە جاتقان ءتوس سوعۋ داستۇرىمەن قولدارىنا بولات بالعا الىپ, شويىن ءتوستى سوعىپ, ۇلىستىڭ ۇلى كۇنىن قارسى الۋ ءراسىمىن اتقاردى.
اكادەميا باسشىسى دارحان قىدىرالى ۇيىمنىڭ اتقارىپ جاتقان جۇمىستار تۋرالى بايانداپ, بيىلعى جوسپارلاردىڭ جۇزەگە اسۋ بارىسىمەن تانىستىردى.
كەلەلى كەزدەسۋدە قوناقتار ناۋرىزعا مەيرامىنا ىزگى تىلەكتەرىن ايتىپ, باۋىرلاس ەلدەر اراسىنداعى ىنتىماقتاستىقتى نىعايتۋ ماسەلەلەرى جونىندە ەركىن فورماتتا پىكىر الماستى.
سالتاناتتى قابىلداۋدا قۇتتىقتاۋ ءسوز سويلەگەن ازەربايجان ەلشىسى راشاد ماممادوۆ قاراباقتاعى وتان سوعىسى كەزىندە تۇركى اكادەمياسى تاراپىنان كورسەتىلگەن زور قولداۋعا ريزاشىلىعىن ءبىلدىردى.
موڭعوليا ەلشىسى لۋۆسانگيين باتتۋلگا مىرزا بيىلعى جىلدىڭ اياعىنا دەيىن تۇركى اكادەمياسىنا باقىلاۋشى مەملەكەت مارتەبەسىن الۋعا نيەتتى ەكەنىن, سونداي-اق بۇل باعىتتا جۇمىستار ءجۇرىپ جاتقانىن جەتكىزدى.
ءوز كەزەگىندە ماجارستان ەلشىسى ميحاي گالوشفاي اكادەميانىڭ عىلىمي جوبالارعا بەلسەندى اتسالىپ كەلە جاتقانىن اتاپ ءوتتى.
كەزدەسۋ سوڭىندا مارتەبەلى مەيماندارعا تارتۋ جاسالىپ, اكادەميا شىعارعان باعالى ەڭبەكتەر سىيعا بەرىلدى.
