ءاليحانى كوپ ەل اداسپايدى

ەر بالاعا ءجيى قويىلعان ەسىم­­­دەردىڭ ۇشتىگىن ايسۇلتان (841) مەن نۇريسلام (765) تو­لىق­تىرسا, ال قىزدار اراسىندا اسىلىم (1 183) مەن رايانا (1 172) بەكىتىپ تۇر. 2019 جىلى دا ەر بالاعا بەرىلگەن وسى ءۇش ەسىم الدىڭعى قاتاردا بولعان. بۇل جىلى 4 268 بالاعا ءاليحان,

3 270 سابيگە ايسۇلتان, 2 528 ۇلعا نۇريسلام ەسىمى قويىلعان. ال قىزدار ەسىمىنىڭ ۇزدىك ۇشتىگىندە ءسال وزگەرىس بار. سەبەبى بىلتىر رايانا (5 601) ءبىرىنشى ورىنعا شى­عىپ, ەكىنشى ورىنعا مەدينا (5 320 قىز) تۇراقتاعان بولسا, 4 510 «كەستە تىگەرگە» ايزەرە ەسىمى بەرىلگەن.

بيىل الاش قايراتكەرى ءالي­حان بوكەيحاننىڭ تۋعانىنا 155 جىل تولدى. جوعارىداعى سان سانالى عۇمىرىن ۇلتىنا قىزمەت ەتۋگە ارناعان ۇلى تۇلعانىڭ ەسىمىن وسىلاي دا ۇلىقتاۋعا بولاتىنىن اڭعارتادى. ماقساتى ەلدىك مۇددە بولعان كوسەمنىڭ الاش جۇرتىمەن ماڭگى جاساۋى دەگەن وسى بولار! ال «پايعامبار قالاسىنىڭ» قاسيەتىن ارتتىرعان مەدينا-ءمادينالار كو­بەيسە, مۇسىلماندىعىمىزدىڭ مۇ­قالماسى انىق. ەكى جىلدان بەرى قىز بالاعا ەڭ كوپ قويىلىپ جۇرگەن ەسىمدەردىڭ ءبىرى – رايانا. «ار-رايان» – مۇسىلماندار كىرە­تىن ءجاننات قاق­پالارىنىڭ ءبىرى. ۇرپاعىنىڭ ساليقالى, قىزىنىڭ كوركەم مىنەزدى بولىپ ءوسۋىن تىلە­گەن اتا-انانىڭ سابيىنە بۇل ەسىمدى ىرىمداپ قوياتىنى ءسوزسىز. اي­سۇلتان مەن اسىلىم دا ءمانى تەرەڭ, ماعىناسى مول, ۇلت ەرەكشەلىگىن بىلدىرەتىن ەسىمدەر.

راس, ءار زاماننىڭ تالابى مەن سۇرانىسى ەسىم تاڭداۋعا دا اسەر ەتەدى. بالاعا ات قويۋ – ۇلاعاتتى ءداستۇر ەكەنىن ەسكەرسەك, بۇل سالتقا سالعىرت قاراماعان دۇرىس. سەبەبى, ادامنىڭ اتى – تاڭدالعان تاعدىرى ىسپەتتى.

ءبىزدى ەل ەگەمەندىگىنىڭ وردالى جاسىندا تاريحي تۇلعا­لار­دىڭ ەسىمىن جاڭعىرتىپ, يمان­دى­لىقتان ءنار الىپ, رۋحاني بو­لا­شاققا بەت تۇزەگەن قازاق ەلىنىڭ سابيىنە ەسىم قويۋعا ەرەكشە ءمان بەرگەنى قۋانتادى. ال قازىر­گىدەي الماعايىپ زاماندا ءالي­حان­دا­رىمىز كوبەيسە, قازاق ەلى العان باعىتىنان اداسپايتىنى انىق.