ارداقتى اعايىن!
بارشاڭىزدى ۇلىستىڭ ۇلى كۇنىمەن شىن جۇرەكتەن قۇتتىقتايمىن!
تىرشىلىكتى تۇلەتىپ, تابيعاتقا جان بىتىرەتىن ناۋرىز – ءبىزدىڭ ءتول جاڭا جىلىمىزدىڭ باستاۋى, جاڭعىرۋ مەن جاڭا ومىرگە ۇمتىلۋدىڭ نىشانى. ەجەلگى جىل قايىرۋ ءداستۇرى – حالقىمىزدىڭ تەرەڭ تانىمى مەن تاعىلىمدى تاريحىنىڭ كورىنىسى.
شۋاقتى كوكتەم مەرەكەسىن بۇكىل ەل بولىپ اسىعا كۇتەمىز. ءبىز تاعدىرىمىزبەن ساباقتاس ءاز-ناۋرىزدان وتكەن عاسىردا ەرىكسىز اجىراپ قالدىق. ەگەمەندىكتىڭ ەلەڭ-الاڭىندا ەجەلگى سالتىمىزبەن قايتا قاۋىشتىق. ناۋرىزدىڭ كونە داستۇرلەرىن نىعايتۋ ءۇشىن ەلباسى بۇل مەرەكەنى مەملەكەتتىك مەيرامعا اينالدىردى.
جىل باسىندا جاريالانعان «تاۋەلسىزدىك بارىنەن قىمبات» اتتى ماقالامدا ناۋرىزدى جاڭاشا اتاپ ءوتۋ قاجەتتىگىنە توقتالدىم. مەرەكەنىڭ ءار ءساتى ەلگە پايداسى تيەتىن, ۇرپاققا ونەگە بولاتىن يگىلىكتى ىسكە ۇلاسۋعا ءتيىس.
سوندىقتان, قازىر بارلىق ايماقتا جاس ۇرپاق ءۇشىن تاربيەلىك ءمانى زور كوپتەگەن شارا قولعا الىنۋدا. مۇنىڭ ءبارىن امال ايىنان كەيىن دە جالعاستىرا بەرەمىز.
ۇلىستىڭ ۇلى كۇنىن تويلاۋ قالالار مەن اۋىلداردىڭ اۋقىمدى الاڭدارى مەن كورىكتى كوشەلەرىندە وتەتىن بىرنەشە ساعاتتىق ءىس-شارامەن عانا شەكتەلمەۋى قاجەت. ناۋرىز – ەڭ الدىمەن, تاعىلىمى مول وتباسىلىق مەيرام. مەرەكەلىك كوڭىل-كۇي بارلىق شاڭىراقتا بولۋى كەرەك. جاستار ۇلكەندەرگە سالەم بەرىپ, باتاسىن السا, ءبىر-بىرىنە اق تىلەكتەرىن ارناسا, قانداي جاراسىمدى؟!
ناۋرىز – اعايىندى باۋىرمالدىققا, كورشى-قولاڭدى تاتۋلىققا شاقىراتىن بەرەكە-بىرلىكتىڭ مەرەكەسى. بۇل تۋرالى ۇلى اباي «قىرداعى ەل ويداعى ەلمەن ارالاسىپ, ك ۇلىمدەسىپ, كورىسىپ, قۇشاقتاسىپ» دەپ جىرلاعان.
مەيرامنىڭ تەرەڭ فيلوسوفيالىق مازمۇنى جاقسىلىقتى ەشقاشان ۇمىتپاي, قايىرىمدىلىقتىڭ قادىرىن بىلۋگە جانە تابيعاتپەن ۇندەستىكتە ءومىر سۇرۋگە ۇندەيدى.
ەل ۇعىمىندا قىردىڭ قىزعالداعى – ناعىز كوكتەمنىڭ نىشانى. وسى ورايدا, قىزعالداق گ ۇلىن ۇلى دالاداعى ۇلىستىڭ ۇلى كۇنىنىڭ باستى بەلگىسى رەتىندە بەكىتۋگە بولادى.
قۇرمەتتى قازاقستاندىقتار!
قازىر دۇنيەدە گەوساياسي دۇربەلەڭ بەلەڭ الىپ, حالىقارالىق تارتىستار شيەلەنىسە تۇسۋدە. كوروناۆيرۋس ىندەتى ءورشىپ, الەم ەكونوميكاسىنداعى داعدارىس كۇشەيۋدە. وسىنداي كۇردەلى كەزەڭدە قازاقستان حالقى بارلىق سىن-قاتەرلەرگە توتەپ بەرۋ ءۇشىن بىرلىگىن بەكەمدەپ, قايسارلىق تانىتۋى قاجەت.
ءبىزدىڭ بابالارىمىز ەجەلدەن ۇلىستىڭ ۇلى كۇنى ءبىر-بىرىنە كومەكتەسىپ, قيىن كەزەڭدە قولىنداعى بارىن بولىسكەن. وسى يگى ءداستۇردى حالقىمىز ءالى كۇنگە دەيىن بەرىك ۇستانىپ كەلە جاتقانى كوڭىل قۋانتادى.
پاندەميا كەزىندە ونداعان مىڭ دارىگەر مەن مەيىربيكە, ءتارتىپ ساقشىلارى مەن اسكەري قىزمەتشىلەر جانە ەرىكتىلەر ەلدىڭ دەنساۋلىعىن ساقتاۋ ءۇشىن ايانباي ەڭبەك ەتۋدە. ميكروبيولوگ ماماندارىمىز از ۋاقىتتىڭ ىشىندە كوروناۆيرۋسقا قارسى ۆاكتسينا جاساپ شىعاردى.
ازاماتتارىمىزدىڭ ناعىز مارتتىگى مەن شىنايى جاناشىرلىعىن, زور جەتىستىكتەرىن ايگىلەيتىن مىسالدار وتە كوپ. مۇنى وزدەرىڭىز كورىپ-ءبىلىپ جۇرسىزدەر. مىزعىماس بىرلىكتىڭ, تاتۋلىق پەن تۇراقتىلىقتىڭ ارقاسىندا ەڭسەسى بيىك ەل بولىپ وتىرمىز.
ءاز-ناۋرىز – ىزگىلىك پەن قايىرىمدىلىقتىڭ, مەيىرىم مەن جاناشىرلىقتىڭ مەرەكەسى. ءبىز ۇسىنعان ادىلەتتى قوعام جانە الەۋمەتتىك مەملەكەت قاعيداسى وسى قۇندىلىقتارمەن تولىق ۇندەسەدى.
سونىمەن بىرگە, ناۋرىز – ەلدى ەڭبەككە جۇمىلدىرىپ, ىرىسىمىزدى مولايتاتىن مەيرام. ءبىز بابالار جولىمەن بىلەك سىبانا جۇمىس ىستەپ, قازاقستاندى باسەكەلىك قابىلەتى زور, قۋاتتى مەملەكەتكە اينالدىرامىز.
ناۋرىزدىڭ تاعى ءبىر بەلگىسى – ۇقىپتىلىق پەن تازالىق. قازاق – تابيعاتقا ەتەنە جاقىن حالىق. ۇلىستىڭ ۇلى كۇنى بۇلاقتىڭ كوزىن اشىپ, اعاش ەگۋ, قورشاعان ورتانى تازا ۇستاۋ – ەرتەدەن جالعاسىپ كەلە جاتقان ءداستۇرىمىز. ءبىز قولعا العان «تازا تابيعات» جوباسىنىڭ نەگىزگى ماقساتى – سول يگى شارانى جالعاستىرۋ.
وسىلايشا, ۇلىس كۇنىن سان ءتۇرلى سيپاتتا اتاپ ءوتۋ اتا سالتىمىز بەن ۇرپاقتار ساباقتاستىعىن ساقتاۋ ء ۇشىن كەرەك. قازاقتا «سالتىنا قاراپ, حالقىن تانيسىڭ» دەگەن قاناتتى ءسوز بار. ۇلتتىڭ جاڭا بولمىسى جاقسى داعدى مەن جاعىمدى قاسيەت ارقىلى قالىپتاسادى.
بيىل ءبىز تاريحي مەجە – تاۋەلسىزدىكتىڭ 30 جىلدىعىن اتاپ وتەمىز. وسى ۋاقىتتىڭ ىشىندە ەلىمىز تولاعاي تابىسقا جەتتى. بىراق, جەتىستىككە مارقايىپ, بوساڭسۋعا بولمايدى. ءبىز مەملەكەتىمىزدى جۇيەلى وزگەرىستەرگە جەتەلەيتىن اۋقىمدى رەفورمالاردى جالعاستىرا بەرەمىز.
جان-جاقتى جاڭعىرۋ ۇلتىمىزدى ورگە باستاپ, قازاقستاننىڭ ماڭگىلىك ەل بولۋىنا جول اشادى. ءبىزدىڭ باستى ماقساتىمىز – وسى!
بوساعامىزدان اتتاعان جاڭا جىل بارشاڭىزعا ىرىس-نەسىبە اكەلسىن دەپ تىلەيمىن!
ءار شاڭىراققا قىدىر قونىپ, قۇت دارىسىن!
ۇلىستىڭ ۇلى كۇنى قۇتتى بولسىن!
