ۇلىستىڭ ۇلى كۇنى ناۋرىز مەيرامى قارساڭىندا ۇيىمداستىرىلعان شارانىڭ ماقساتى - ەل تاۋەلسىزدىگىنىڭ 30 جىلدىعىنا وراي «رۋحاني جاڭعىرۋ» باعدارلاماسى اياسىندا تاريحي ءداستۇردى جاڭعىرتۋ, كەسەنە اۋماعىندا ورىندالعان يگى ءىس-ارەكەتتەردى ناسيحاتتاۋ, تاريحي سانانى قالىپتاستىرۋ.
-ياساۋي كەسەنەسىندە كۇلشە تاراتۋدىڭ دا وزىندىك ءداستۇرلى تاريحى بار. بۇرىن مۇندا ءامىر تەمىردىڭ ۋاقىفتىق قولحاتى بويىنشا ەت پەن بيدايدى 24 ساعات بويى قايناتىپ, پىسىرەتىن ء«حالىم بوتقا» تاماعى دايىندالاتىن بولعان. اپتاسىنا ەكى رەت ازىرلەنەتىن بوتقانى اعاش استاۋلارعا سالىپ, قاريلارعا, دارۋىشتەرگە, جارلى-جاقىبايلارعا, مۇگەدەكتەرگە, جينالعان كوپشىلىككە, جولاۋشىلارعا ۇلەستىرگەن. كۇن سايىن اسحانادا پىسىرىلگەن كۇلشە ناندى الىس جولدان كەلگەن زياراتشىلارعا دا تاراتاتىن بولعان. بۇگىن ءبىز بۇل ءداستۇردى قايتا جاڭعىرتىپ ۇلىستىڭ ۇلى كۇنىنە وراي ۇيىمداستىرىپ وتىرمىز,-دەدى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى نۇربولات احمەتجانوۆ.
تاريحقا كوز جۇگىرتسەك, ورتاعاسىرلاردان باستاۋ العان ءداستۇر حح عاسىردىڭ باسىنا دەيىن جالعاسقان. ۆاكۋفناما قۇجاتتارىندا «....قاريلارعا, جەرگىلىكتى حالىققا ارنايى «حاليم ابا» اس بەرىلىپ تۇراتىن بولسىن. ونىڭ ۇستىنە ءار جىلى, شامامەن العاندا ۇن ەتىپ ديىرمەنگە تارتىلعان ءجۇز باتپانعا جۋىق بيدايدان كۇلشە ءپىسىرىلىپ تاراتىلسىن» دەلىنگەن.
تۇركى جۇرتىنىڭ تۇلعاسى قوجا احمەت ياساۋي مەن قازاقتىڭ حاندارى جانە بيلەرى, باتىرلارى مەن يگى جاقسىلارىنىڭ سۇيەگى جاتقان قاسيەتتى جەرگە كەلگەن قوناقتار «ىرىس پەن بەرەكەنىڭ باستاۋى – ءاز ناۋرىز» مەيرامىندا تاراتىلعان نانعا قۋانا قول سوزىپ, جاقسى ىرىمعا بالاپ, العىستارىن جاۋدىردى.
