ويىننان كەيىن فۋتبولشىلار نارازىلىعىن ءبىلدىردى. ماسەلەن, «استانا» كلۋبىنىڭ قورعاۋشىسى انتونيو رۋكاۆينا وسىنداي الاڭدا ويناعانىنا ۇيالاتىنىن جەتكىزدى.
«ونداعان ميلليون دوللارعا سالىنعان ستاديوننىڭ وسىنداي ەكەنىنە ۇيالامىن. بۇگىن-ەرتەڭ وسى ماتچتى بۇكىل الەم كورەدى. وسىلايشا قازاقستان فۋتبولى جەتەر جەرىنە جەتتى. ەرتەڭ-اق ءبارى قازاقستان فۋتبولىن اجۋاعا اينالدىرادى. بىزگە كەرەگى وسى ما؟», دەدى ا.رۋكاۆينا.
قارت قۇرلىقتىڭ بەلدى كوماندالارىندا تەر توككەن فۋتبولشىنىڭ ءسوزىنىڭ جانى بار. «تۇركىستان-ارەنا» – ەلىمىزدەگى ەڭ جاڭا ستاديون. كەشەن بىلتىر قولدانىسقا بەرىلگەن-تۇعىن.
راس, الەمنىڭ تۇكپىر-تۇكپىرىندە جاۋعان جاڭبىرعا قاراماستان, فۋتبول ماتچتارى وتكىزىلەدى. ويتكەنى ونداعى الاڭداردا سۋ اعار جۇيەسى جاقسى جۇمىس ىستەيدى. وكىنىشكە قاراي, «تۇركىستان-ارەنا» كەز كەلگەن جاۋىنعا شىداس بەرمەيتىن سەكىلدى. بۇل بىرىنشىدەن.
ەكىنشىدەن, ستاديون قۇرىلىسىنا كەتكەن قارجى دا نازار اۋدارۋدى قاجەت ەتەدى. تۇگەل تۇركى الەمىنىڭ تەمىرقازىعى سانالاتىن تۇركىستاندا سالىنعان جاڭا ارەناعا نەبارى 7 مىڭ ادام عانا سىيادى. ال ونىڭ قۇرىلىسىنا شامامەن 35 ميلليون دوللارداي قارجى جۇمسالىپتى. سالىستىرمالى تۇردە قاراساڭىز, يتالياداعى «ۋدينەزە» كلۋبىنىڭ ستاديونىنا 23,6 ميلليون دوللار جۇمسالعان. ءبىر ساتتە جاسىل الاڭداعى ويىندى 25 مىڭنان استام كورەرمەن تاماشالاي الادى.
باۋىرلاس تۇركيا دا جاڭا ارەنا سالۋدا ەشكىمگە دەس بەرمەيدى. ماسەلەن, «سيۆاس ارەنا» ستاديونىنىڭ قۇرىلىسىنا 20 ميلليون دوللار, «توركۋ ارەنانى» سالۋعا 20 ميلليون دوللار, «تيمساھ ارەناعا» 22 ميلليون دوللار قاراجات جۇمسالىپتى. كورەرمەن سانى دا اناعۇرلىم كوپ.
وسىدان ءبىراز بۇرىن قازاقستان فۋتبول فەدەراتسياسىنىڭ وكىلدەرى «تۇركىستان-ارەناعا» ات باسىن تىرەپ, الاڭنىڭ ۇڭعىل-شۇڭعىلىن تەكسەرىپ قايتقان ەدى. ولار سۋ جاڭا ستاديوندى ۋەفا-نىڭ بۇكىل تالاپتارىنا ساي كەلەدى دەپ قورىتىندى شىعارعان-دى. الايدا, ميلليونداپ قارجى جۇمسالعان ستاديون ءبىر جىل وتپەي سىر بەردى.
جالپى, قازاق فۋتبولىنىڭ مۇنداي ماسقاراعا ۇشىراۋى العاش رەت ەمەس. ەستەرىڭىزدە بولسا, 2007 جىلى پرەمەر-ليگانىڭ كەزەكتى تۋرىندا «ەكىباستۇز» بەن «الماتى» فۋتبول كلۋبتارى كەزدەسكەن. ويىن ەكىباستۇز قالاسىنداعى ستاديوندا وتكەن ەدى. تولاسسىز جاۋعان جاڭبىردىڭ كەسىرىنەن الاڭعا سۋ تولىپ, دوپ تەبۋ قيىندايدى. الايدا ويىن توقتاتىلمادى.
كەيىنىرەك وسى ۆيدەو ينتەرنەتتە تاراپ, بۇكىل الەمگە كۇلكى بولعانىمىز بار. سول كەزدە The Sun باسىلىمى الگى ۆيدەو تۋرالى بىلاي دەپ جازدى: «فۋتبول تاريحىندا سۋدا وتكەن العاشقى ويىن. مۇنداي جاعدايدا دوپ تەبۋ مۇمكىن ەمەس. ەگەر ءسىز جارتىلاي سۋعا تولى الاڭدا وتكەن ويىندى كورسەڭىز, «بۇل قانداي پرەمەر-ليگا؟» دەۋىڭىز ابدەن مۇمكىن. الاڭنىڭ سۋعا تولىپ كەتكەنى سونشالىق, تانكەر سۋدى سورىپ ۇلگەرە الماعان. بۇرىشتاما تەبەيىن دەپ كەلگەن بايعۇس ويىنشى قويعان دوبىنىڭ سۋ ۇستىندە قالىقتاپ جۇرگەنىنە قاراپ تۇر».
The New England Sports Network (NESN): ەندىگى جەردە قازاقستاندا ءبىرتۇرلى ليگا بار ەكەنىن ءبىلىپ جۇرەتىن بولدىق. ويىن سۋعا تولى الاڭدا وتكەن, قاجەت دەسەڭىز ونى دالەلدەيتىن ۆيدەو بار. قىسقاشا كليپتە ويىنشىنىڭ سۋ باسقان الاڭدا بۇرىشتاما دوبىن قالاي تەپكەنى كورسەتىلەدى. قولايسىز جاعدايعا بايلانىستى ويىنشى بۇرىشتاما دوبىن قولمەن ورىندايدى. الايدا, تورەشى اياقپەن دۇرىستاپ تەبۋدى بۇيىرعان.
The Telegraph: «ەشكىم ويىننىڭ كەيىنگى شەگەرىلگەنىن قالامايدى. بىراق بۇرىشتا سۋ ايداپ جاتقان جۇك كولىگىنە قاراپ-اق, ويىندى كەيىنگە قالدىرۋعا بولاتىنى بەلگىلى. «بوراتقا» ەنبەي قالعان, بىراق شىندىقتى بەينەلەيتىن ۆيدەودان تورەشى بەلگىلەگەن بۇرىشتاما دوبىن سۋ باسقان الاڭدا قولمەن ەمەس, اياقپەن ورىنداعانىن كورەسىڭ».
قالاي دەسەك تە, شەتەلدىكتەر كەزىندە قازاقستان فۋتبولىنا ەسى كەتكەنشە كۇلدى. سودان بەرى 14 جىل وتسە دە جاعداي ءالى وزگەرمەپتى. وكىنىشتى-اق...
