ۇكىمەت باسشىسىنىڭ ورىنباسارى ەرالى توعجانوۆتىڭ قاتىسۋىمەن وتكەن وتىرىستى ءبىلىم جانە عىلىم ءمينيسترى اسحات ايماعامبەتوۆ «پەداگوگ مارتەبەسى تۋرالى» زاڭ اياسىندا پەداگوگتەردىڭ ەڭبەك جاعدايى جاقسارىپ كەلە جاتقانىن جەتكىزۋدەن باستادى.
«پەداگوگتەردى مىندەتىنە جاتپايتىن جۇمىستارعا, ەسەپتىلىككە تارتۋعا جول بەرمەۋ شارالارى قابىلداندى. بارلىق وبلىستا پەداگوگتەردىڭ قۇقىقتارىن قورعاۋ جونىندەگى كەڭەستەر اشىلا باستادى. بيىل وسى جۇمىستى سوڭىنا دەيىن جەتكىزەمىز. 2024 جىلعا قاراي مەملەكەت باسشىسىنىڭ بەرگەن تاپسىرماسى شەڭبەرىندە پەداگوگتەردىڭ جالاقىسى 2 ەسە كوبەيەدى. كەشەندى شارالار مەكتەپتەردى كاسىبي كادرلارمەن تولىق قامتاماسىز ەتۋگە مۇمكىندىك بەرەدى. پەداگوگتەردى جۇمىسقا قابىلداۋ ەندى كونكۋرس ارقىلى, ناقتى بىلىكتىلىك كورسەتكىشتەرىنە سايكەس جۇرگىزىلەدى جانە ءبىز ونى ەلەكتروندى فورماتقا كوشىرەمىز», دەدى ا.ايماعامبەتوۆ.
پاندەميانىڭ كەسىرىنەن مەكتەپتەردىڭ باسىم بولىگى قاشىقتان ءبىلىم بەرۋگە كوشتى. مۇعالىمدەر مۇنداي توسىن جاعدايعا كاسىبي تۇرعىدا تولىق دايىن بولمادى. وسىعان وراي مينيسترلىك پەداگوگتەردى قىسقا مەرزىمدى كۋرستان وتكىزدى. بۇل كۋرستار ءالى جالعاسىن تابادى. ءمينيستردىڭ مالىمدەۋىنشە, قاشىقتان وقىتۋدىڭ ءادىس-تاسىلدەرى بويىنشا پەداگوگيكالىق ۋنيۆەرسيتەتتەردە پەداگوگ ماماندارىن دايىنداعاندا مىندەتتى ءپان مەن مىندەتتى مودۋل ەنگىزىلەدى جانە بىلىكتىلىكتى ارتتىرۋ كۋرستارىندا دا وسى ماسەلە بويىنشا ءتيىستى مودۋل قوسىلادى.
ۆەدومستۆو باسشىسى ا.ايماعامبەتوۆ ءسوز اراسىندا بالاباقشالارعا قاتىستى ءبىر ماسەلەنى شەشۋ مىندەتىنە دە توقتالىپ: «3 پەن 6 جاستاعى بالالاردى وقۋ جانە تاربيەمەن قامتۋ كورسەتكىشى 98,8 پايىزعا جەتتى. دەسەك تە 2-دەن 6 جاسقا دەيىنگى بالالاردى قامتۋ دەڭگەيى ءالى دە 71%-دى قۇرايدى. سوندىقتان جەكەمەنشىك بالاباقشالاردى دامىتۋدى ىنتالاندىرۋ ءۇشىن ءبىز ۆاۋچەرلىك تەتىكتى دايىنداپ جاتىرمىز. ونى بيىل قاناتقاقتى رەجىمدە باستاپ, كەلەسى جىلى تولىعىمەن بارلىق جۇيەگە ەنگىزەمىز», دەدى.
ەلىمىزدە «تەگىن كاسىپتىك-تەحنيكالىق ءبىلىم بەرۋ» جوباسى جالعاسادى. كوللەدجدەرگە دە اكادەميالىق دەربەستىك بەرىلەدى. 9 سىنىپتان كەيىن كوللەدجگە وقۋعا تۇسكەن ستۋدەنتتەر ءۇشىن وقۋ مەرزىمى بۇرىنعىداي 3,5 جىل ەمەس, 2 جىلعا دەيىن قىسقارادى. 11 سىنىپتان كەيىن كوللەدجگە تۇسكەندەر ءۇشىن وقۋ مەرزىمى 2,5 جىل ەمەس, 1,5 جىلدى قۇرايدى.
ال جوعارى جانە جوعارى وقۋ ورنىنان كەيىنگى ءبىلىم بەرۋدە بيىل اتقارىلعان ەڭ نەگىزگى جۇمىس – گرانت قۇنىنىڭ 340-420 مىڭ تەڭگەدەن 1 ملن تەڭگەگە دەيىن ۇلعايتىلۋى بولدى.
«بۇل ءوز كەزەگىندە ۋنيۆەرسيتەتتەرگە ماتەريالدىق-تەحنيكالىق جاعدايىن جاقسارتۋعا جانە وقىتۋشىلاردىڭ جالاقىسىن كوتەرۋگە مۇمكىندىك بەردى. 2019 جىلى قىركۇيەكتە مينيسترلىككە قاراستى جوو-دا پەداگوگتەردىڭ جالاقىسى 20%-عا كوتەرىلسە, 2020 جىلى قىركۇيەك ايىندا تاعى 20%-عا كوتەرىلدى. ءالى دە ءبىز بۇل جۇمىستى جالعاستىرۋىمىز قاجەت», دەدى ا.ايماعامبەتوۆ.
مەملەكەت باسشىسى قاسىم-جومارت توقاەۆ حالىققا جولداۋىندا ۇكىمەتكە جىل سايىن الەمنىڭ جەتەكشى عىلىمي ورتالىقتارىندا 500 عالىمنىڭ تاعىلىمدامادان ءوتۋىن قامتاماسىز ەتۋدى, سونداي-اق «جاس عالىم» جوباسى اياسىندا زەرتتەۋ جۇرگىزۋ ءۇشىن 1 مىڭ گرانت ءبولۋدى تاپسىرعان ەدى. مينيستر ا.ايماعامبەتوۆ القا وتىرىسىندا بۇل تاپسىرما تۋرالى: «تاعىلىمداما بويىنشا «بولاشاق» حالىقارالىق ورتالىعى اينالىسادى. سونىمەن قاتار «جاس عالىم» جوباسىمەن 1 مىڭ گرانت ءبولۋدى جۇزەگە اسىرۋ ءۇشىن ءتيىستى قارجى ءبولىندى, بۇل جۇمىس ۇيىمداستىرىلادى», دەدى.
