ەستەرىڭىزگە سالا كەتەيىك, 2021 جىلدىڭ 10 ناۋرىزىنان باستاپ الماتى قالاسى كوروناۆيرۋستىڭ ورشۋىنە بايلانىستى «قىزىل ايماقتا» تۇر. كەشە الماتى قالاسىنىڭ باس مەملەكەتتىك سانيتارلىق دارىگەرى «الماتى قالاسىندا كوروناۆيرۋستىق ينفەكتسيا اۋرۋلارىنىڭ الدىن الۋ بويىنشا شارالاردى كۇشەيتۋ تۋرالى» جاڭا قاۋلى شىعاردى, ول وسى جىلدىڭ 13 ناۋرىزىنان باستاپ كۇشىنە ەنەدى.
ەپيدەميالىق جاعدايدىڭ ناشارلاۋىن ەسكەرە وتىرىپ, شەكتەۋ شارالارى ءدىني نىساندارعا دا قاتىستى بولادى. اتاپ ايتقاندا, عيبادات نىساندارىنىڭ عيماراتتارىندا الەۋمەتتىك قاشىقتىقتى (كەمىندە 2 مەتر) جانە باسقا دا سانيتارلىق نورمالاردى: ماسكالىق رەجيمدى, دەزينفەكتسيانى جانە ت. ب. قاتاڭ ساقتاي وتىرىپ, تەك «جەكە قۇلشىلىق ەتۋ» راسىمدەرىن (ۇجىمدىق راسىمدەرسىز: جۇما نامازى, جەكسەنبىلىك قىزمەتتەر جانە ت. ب.) وتكىزۋگە رۇقسات ەتىلەدى.
ءوز كەزەگىندە ءدىني بىرلەستىكتەردىڭ باسشىلىعى ءدىني راسىمدەردى وتكىزۋ ءۇشىن سانيتارلىق نورمالارعا سايكەس كەلەتىن بارلىق جاعدايلاردى قامتاماسىز ەتۋ جونىندە ءتيىستى شارالار قابىلداۋى قاجەت:
- عيماراتقا كىرەر الدىندا كەلۋشىلەردىڭ تەمپەراتۋراسىن ولشەۋ;
- بەتپەردەسىز ازاماتتاردى كىرگىزبەۋ;
- 2 مەتردەن كەم ەمەس ارالىقپەن ءدىني بىرلەستىكتەر اۋماعىندا ارنايى جازىلعان بەلگىلەر جاساۋ;
- ىرگەلەس اۋماقتى تازا ۇستاۋدى قامتاماسىز ەتۋ.
«سونىمەن قاتار قالامىزدىڭ ءدىني بىرلەستىكتەرى باسشىلارى مەن ءدىندار جاماعاتتان وسى ۋاقىتشا شەكتەۋلەرگە تۇسىنىستىكپەن قاراۋلارىن سۇرايمىن. ءبىز بۇنداي شەكتەۋلەرمەن ءبىرىنشى رەت تاپ بولىپ وتىرعان جوقپىز جانە بارلىعىمىز بىرگەلىكتە بۇل قيىندىقتى بىرگەلىكتە جەڭەمىز دەپ سەنەمىن. سونداي-اق ءدىن ىستەرى باسقارماسىنىڭ قىزمەتكەرلەرى سەس جانە قۇقىق قورعاۋ ورگاندارىنىڭ قىزمەتكەرلەرىمەن بىرلەسىپ قالانىڭ ءدىني عيماراتتارىندا سانيتارلىق نورمالاردىڭ ساقتالۋىنا مونيتورينگ جۇرگىزەتىنىن اتاپ وتكىم كەلەدى», دەدى الماتى قالاسى ءدىن ىستەرى باسقارماسى باسشىسىنىڭ ورىنباسارى.
ءدىن ىستەرى باسقارماسىنىڭ قىزمەتكەرلەرى سانيتارلىق-ەپيدەميولوگيالىق باقىلاۋ دەپارتامەنتىنىڭ قىزمەتتەرىمەن جانە قۇقىق قورعاۋ ورگاندارىنىڭ قىزمەتكەرلەرىمەن بىرلەسىپ قالانىڭ عيبادات عيماراتتارىندا سانيتارلىق نورمالاردىڭ ساقتالۋىنا مونيتورينگ جۇرگىزەتىن بولادى.
