ارداقتى انالار, اياۋلى ارۋلار!
بارشاڭىزدى حالىقارالىق ايەلدەر كۇنىمەن شىن جۇرەكتەن قۇتتىقتايمىن! بۇل كۇن – انالارىمىزدىڭ, اپكە-قارىنداستارىمىزدىڭ جانە قىزدارىمىزدىڭ مەرەكەسى. سوندىقتان 8 ناۋرىزدى مەيىرىم مەن سۇلۋلىقتىڭ كۇنى دەپ قابىلدايمىز.
ايەلدەر قاۋىمى قاشاندا وتباسىنىڭ ۇيىتقىسى جانە بەرەكە-بىرلىكتىڭ باستاۋى ەكەنى ءسوزسىز. سىزدەر ۇرپاق تاربيەلەۋ ارقىلى تۇتاس ۇلتتى تاربيەلەيسىزدەر. سول ارقىلى ەلدىڭ بولاشاعىن قالىپتاستىرۋعا تىكەلەي ۇلەس قوسىپ كەلەسىزدەر.
تاريحىمىزدا قيىن-قىستاۋ كەزەڭدەردە ەل تاعدىرىنا ارالاسىپ, دانالىق پەن پاراساتتىلىقتىڭ وزىق ۇلگىسىن كورسەتە بىلگەن انالارىمىز دا از بولعان جوق. وعان دومالاق, قاراشاش, بوپاي سياقتى انالارىمىزدىڭ ونەگەلى ءومىرى ايقىن دالەل. قازىرگى تاڭدا قازاقستان ايەلدەرى وسىنداي سارا جولدى لايىقتى جالعاستىرىپ كەلەدى دەۋگە تولىق نەگىز بار.
شىن مانىندە, بۇگىندە ايەلدەر قاۋىمى وتباسىلىق قۇندىلىقتاردى ساقتاۋمەن بىرگە, مەملەكەتتىك باسقارۋ, الەۋمەتتىك قىزمەت, بيزنەس سياقتى بارلىق سالادا وتە بەلسەندى. سوعان سايكەس, قوعامدا ايەل ازاماتتاردىڭ ءرولى ايتارلىقتاي ارتا ءتۇستى. وسى رەتتە تاۋەلسىز قازاق ەلىنىڭ جەڭىستەرى مەن جەتىستىكتەرىنە ايەلدەردىڭ دە سىڭىرگەن ەڭبەگى وراسان زور ەكەنىن ەرەكشە اتاپ وتكىم كەلەدى.
بۇگىنگى مەيراممەن قۇتتىقتاي وتىرىپ, بارشاڭىزعا زور دەنساۋلىق, ۇزاق عۇمىر جانە وتباسىلارىڭىزعا اماندىق تىلەيمىن! ءاردايىم كوكتەمدەي قۇلپىرىپ جۇرە بەرىڭىزدەر. مەرەكە قۇتتى بولسىن!
