تاۋەلسىزدىك قۇرداستارى

سپورتتى دامىتۋعا مەملەكەت تاراپىنان جاسالعان تۇراقتى قولداۋدىڭ ناتيجەسىندە ءىرى حالىقارالىق تۋرنيرلەردە، ازيا، الەم چەمپيوناتتارى مەن وليمپيادادا ەل نامىسىن ابىرويمەن قورعاپ، كوك تۋىمىزدى جەلبىرەتىپ، ءانۇرانىمىزدى شىرقاتقان تاۋەلسىزدىكتىڭ قۇرداستارى تۋرالى اڭگىمەلەگەندى ءجون كوردىك. 

دانيار ەلەۋسىنوۆ (كاسىپقوي بوكس)

دانيار ەلەۋسىنوۆتە (سۋرەتتە ەلباسىمەن بىرگە) اۋەسقوي بوكستاعى جۇلدە اتاۋلىنىڭ بارلىعى بار. ول ەكى دۇركىن ازيا، ەكى دۇركىن ازيا ويىندارىنىڭ جەڭىمپازى. الەم چەمپيونى، الەم چەمپيوناتىنىڭ كۇمىس جۇلدەگەرى. ريو وليمپياداسىنىڭ جەڭىمپازى.

2016 جىلى ريو وليمپياداسىنان جەڭىمپاز بولىپ ورالعاننان كەيىن دانيار ەلباسى نۇرسۇلتان نازارباەۆقا كوك تۋدى تاپسىرىپ تۇرىپ، راحمەتىن بىلاي جەتكىزگەن ەدى: «اسا مارتەبەلى ەلباسى! ءبىز ريوعا اتتاناردا «جەڭىسپەن ورالىڭدار» دەپ تاپسىرما بەرگەن ەدىڭىز. سول تاپسىرماڭىز ورىندالدى. سول سەنىمدى، ءۇمىتتى اقتاپ شىققانىما ماقتانامىن. مەن تاۋەلسىزدىكتىڭ ءتول قۇرداسىمىن. وسى تاۋەلسىزدىك جىلدارىندا ەلىمىزدىڭ جەتكەن جەتىستىكتەرىن ايتىپ جەتكىزۋ مۇمكىن ەمەس. ءبىز، تاۋەلسىزدىكتىڭ پەرزەنتتەرى، ارقاشان ءسىزدىڭ جانە ەلدىڭ سەنىمىنەن شىعۋعا تىرىسامىز»، دەدى.

II دارەجەلى «بارىس» وردەنىنىڭ يەگەرى دانيار بۇگىندە كاسىپقوي بوكستا دا ۇزدىك ناتيجە كورسەتىپ ءجۇر. 10 كەزدەسۋدىڭ بارلىعىن جەڭىپ، ونىڭ ىشىندە التى كەزدەسۋىن ۋاقىتىنان بۇرىن اياقتادى. IBF Intercontinental بەلبەۋىنىڭ يەگەرى ەلەۋسىنوۆ الداعى ۋاقىتتا بۇدان دا بيىك شىڭعا جەتەتىنىنە سەنىمىمىز مول.

ءىلياس سۇلەيمەنوۆ (بوكس)

1991 جىلى ناۋرىزدا دۇنيەگە كەلگەن ءىلياس سۇلەيمەنوۆ بوكسپەن 2002 جىلدان بەرى شۇعىلدانىپ كەلەدى. ول – ازيا ويىندارىنىڭ چەمپيونى، ازيا بىرىنشىلىگىنىڭ كۇمىس جۇلدەگەرى. «استانا ارلانس» ساپىندا بىرنەشە كەزدەسۋ وتكىزگەن. ءبىر قىزىعى، 2020 جىلعى قازاقستان چەمپيوناتىندا 60 كيلو سالماقتا قولا جۇلدەگەر اتانعان ءىلياس قازاقستان قۇراما ساپىنا الىنعان جوق. سەبەبى 60 كيلو سالماقتا وليمپيادا جولداماسى بەرىلمەيتىندىكتەن، چەمپيوناتتا فينالعا شىققان ەكى سپورتشى عانا قۇراماعا قابىلداندى.

ارتەم زاحاروۆ (ۆەلوسپورت)

1991 جىلى 27 قازاندا پەتروپاۆلدا دۇنيەگە كەلگەن ارتەم زاحاروۆ 2017 جىلدان بەرى Astana Pro Team كومانداسىندا ەل نامىسىن قورعاپ كەلەدى. ول ۆەلوترەكتەن دە، ۆەلوسپورتتان دا ۇزدىك ناتيجە كورسەتكەن امبەباپ سپورتشى. ۆەلوترەكتەن ازيا چەمپيونى اتانسا، تۋرا وسىنداي جەتىستىككە ۆەلوسپورتتا دا جەتكەن. ازيا كۋبوگىنىڭ ەكى دۇركىن جەڭىمپازى. الەم كۋبوگىنىڭ قولا جۇلدەگەرى، ازيا چەمپيوناتىنىڭ كۇمىس جانە قولا جۇلدەگەرى. ريو وليمپياداسىنا قاتىسۋشى.

گ ۇلىسحان ناحباەۆا (شاحمات)

گ ۇلىسحان ناحباەۆا قازاق قىزدارى اراسىنان شىققان تۇڭعىش گروسسمەيستەر (2012 جىل). قازاقستاننىڭ جەتى دۇركىن چەمپيونى. جاسوسپىرىمدەر اراسىندا ازيانىڭ ەكى دۇركىن جەڭىمپازى (16 جانە 18 جاس). ازيانىڭ كۇمىس جۇلدەگەرى (20 جاسقا دەيىن). ايەلدەر اراسىندا ازيا چەمپيوناتىنىڭ كۇمىس جۇلدەگەرى.

– مەن حالقى قوناقجاي، ءبىلىمدى كەلەتىن تاۋەلسىز قازاقستاندا، ونىڭ ىشىندە شىمكەنت قالاسىندا تۇراتىنىمدى ماقتان تۇتامىن. شەتەلدەرگە بارعاندا قازاقستاندى ايتساڭ، شيكىزاتى باي، قارقىندى دامۋشى ەل دەپ بىلەدى. ولارعا سپورتتان دا، ونىڭ ىشىندە ءوزىمنىڭ سۇيىكتى سپورتىم شاحماتتان دا مىقتى ەكەنىمىزدى ايتۋدان جالىقپايمىن. تاۋەلسىزدىكتىڭ 20 جىلدىعى، ياعني 2011 جىلى لوندونداعى ءىرى حالىقارالىق تۋرنيردە جەڭىمپاز اتانىپ، گروسسمەيستەرلىك ءنورماتيۆتى ورىندادىم. ارادا 10 جىل وتكەندە ەكى بالانىڭ اناسى رەتىندە 30 جاسقا كەلىپ وتىرمىن. باستى ارمانىم – الەم چەمپيونى بولۋ. ءساتىن سالسا، الداعى ۋاقىتتا وسىنداي ۇلكەن مەجەنى باعىندىرسام ارمانىمنىڭ ورىندالعانى، – دەدى قازاق قىزدارى اراسىنان شىققان تۇڭعىش گروسسمەيستەر.

ولگا سافرونوۆا (جەڭىل اتلەتيكا)

تاۋەلسىز ەلمەن تۇيدەي قۇرداس (05.10.1991 ج.) ولگا سافرونوۆا جەلاياقتار اراسىندا ەڭ تاجىريبەلى ءارى جۇلدەنى مولىنان جيناعان سپورتشى. 2014 جىلعى ينچحوندا وتكەن ازيا ويىندارىندا 200 مەتر جۇگىرۋدەن التىن، 4ح100 ەستافەتا بويىنشا كۇمىس جانە 100 مەترگە جۇگىرۋدەن قولا مەدال جەڭىپ الدى. 2015 جىلعى ازيا چەمپيوناتىندا كۇمىس مەدال، 2017 جىلعى وتكەن سارى قۇرلىق دوداسىندا 1 التىن، 1 كۇمىس جانە 1 قولا مەدال يەلەندى. قازاقستاننىڭ بىرنەشە دۇركىن چەمپيونى سافرونوۆا – لوندون وليمپياداسىنا قاتىسۋشى.

نۇرسۇلتان بەلگىباەۆ (حوككەي)

نۇرسۇلتان بەلگىباەۆ – ەلىمىزدىڭ ىشكى چەمپيوناتىندا مۇزايدىنعا شىعىپ جۇرگەن ساناۋلى قازاقتىڭ ءبىرى. استانانىڭ حوككەي مەكتەبىنىڭ تۇلەگى نۇرسۇلتان 2007 جىلدان بەرى «بارىس»، «نوماد» «التاي-تورپەدو»، «الماتى» حوككەي كوماندالارىنىڭ جەيدەسىن كيدى. قىسقى ۋنيۆەرسيادانىڭ ەكى دۇركىن جۇلدەگەرى. «نوماد» حوككەي كلۋبى ساپىندا قازاقستان چەمپيونى اتاندى.

فەرۋزا ەرگەشوۆا (تاەكۆوندو)

تاەكۆوندودان بىرنەشە حالىقارىلىق جارىستا ولجا سالعان فەرۋزا ەرگەشوۆا تۇركىستان وبلىسىندا دۇنيەگە كەلگەن. قازاقستاننىڭ بىرنەشە دۇركىن چەمپيونى اتانعان ول – قارا بەلبەۋ، I دان يەگەرى. ازيا ويىندارىنىڭ كۇمىس جۇلدەگەرى، ازيا چەمپيونى. لوندون وليمپياداسىنا قاتىسۋشى.

راسۋل قاليەۆ (ەركىن كۇرەس)

ەركىن كۇرەستە 57 كيلودا سىنعا تۇسكەن راسۋل قاليەۆ 2013 جىلى ءۇندىستاندا وتكەن ازيا چەمپيوناتىنىڭ قولا جۇلدەگەرى. 2014 جىلى استانادا وتكەن ازيا بىرىنشىلىگىنىڭ جەڭىمپازى. ازيا ويىندارىنىڭ كۇمىس جۇلدەگەرى. 2014 جىلى FILA-نىڭ رەيتينگىسىندە كوش باستاعان راسۋل – جاستار اراسىندا الەم چەمپيوناتىنىڭ ءفيناليسى. رەسەي، رۋمىنيا، يران، بولگاريادا وتكەن تۋرنيرلەردە ولجا سالعان.

ۆيكتور دەميانەنكو (دزيۋدو)

10 جاسىنان باستاپ دزيۋدومەن شۇعىلداناتىن ۆيكتور دەميانەنكو الماتى قالاسىندا دۇنيەگە كەلگەن. بۇگىندە 100 كيلو سالماقتا سىنعا ءتۇسىپ جۇرگەن ول قازاقستاننىڭ بىرنەشە دۇركىن چەمپيونى. جاستار اراسىندا الەم چەمپيوناتىنىڭ (2010)، ازيا بىرىنشىلىگىنىڭ قولا جۇلدەگەرى (2012). ازيا كۋبوگىنىڭ جەڭىمپازى (2019). ۆيكتور بوكستان ماسكەۋ وليمپياداسىنىڭ چەمپيونى ۆيكتور دەميانەنكونىڭ نەمەرە ءىنىسى.

نۇرسۇلتان تۇرسىنوۆ (گرەك-ريم كۇرەسى)

2014 جىلى كۇرەس تۇرلەرىنەن ەلوردادا وتكەن ازيا چەمپيوناتىندا التىن مەدال جەڭىپ العان نۇرسۇلتان تۇرسىنوۆ يسپانيادا وتكەن گران-ءپريدىڭ جەڭىمپازى جانە كوپتەگەن حالىقارالىق ءتۋرنيردىڭ جۇلدەگەرى. 2020 جىلعى قازاقستان بىرىنشىلىگىنىڭ جەڭىمپازى. نۇرسۇلتاننىڭ اكەسى شىڭعىسبەك تۇرسىنوۆ قازاق كۇرەسىنەن بىلىكتى جاتتىقتىرۋشى. اعاسى مۇحيت تۇرسىنوۆ قازاق كۇرەسىنەن ەكى دۇركىن الەم چەمپيونى، «قازاقستان بارىسى». 

P.S. جوعارىدا ءسوز ەتكەن ون سپورتشى ۇزدىكتەردىڭ ءبىر شوعىرى عانا. ايتپەسە ەلىمىزدە فۋتبولدان قۇرامانىڭ ويىنشىلارى – باۋىرجان تۇرىسبەك، سەرگەي حيجنيچەنكو، الەكسەي ششەتكين باستاعان تاۋەلسىزدىك قۇرداستارى بار. جەڭىل اتلەتيكادان ۋنيۆەرسيادا چەمپيونى، ازيا بىرىنشىلىگىنىڭ قولا جۇلدەگەرى يۋليا راحمانوۆا سەكىلدى اتلەتتەرىمىز تاعى بار. دزيۋدودان قازاقستاننىڭ ەكى دۇركىن چەمپيونى، گۋانچجوۋدا وتكەن ازيا ويىندارىنىڭ كۇمىس جۇلدەگەرى يسلام بوزباەۆ تا وردا بۇزار جاستا قازىر.