اتالعان باسقوسۋ «ادامزاتتىڭ ەكىنشى ۇستازى» اتانعان ءال-ءفارابيدىڭ 1150 جىلدىق جانە ۇلى ويشىل ابايدىڭ 175 جىلدىق مەرەيتويىنىڭ قورىتىندىسى, جىر الىبى جامبىلدىڭ 175 جىلدىق مەرەيتويىنىڭ اشىلۋى ىسپەتتى ءوتتى.
ءىس-شارادا ءسوز سويلەگەن قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى 2020 فارابي جانە اباي جىلى اياسىندا تۇركيادا قىرۋار شارۋا اتقارىلىپ: كوشەلەرگە, ساياباقتار مەن ءتۇرلى مەكەمەلەرگە دالا دانىشپاندارىنىڭ اتى بەرىلگەنىن, ەسكەرتكىشتەرى اشىلدى, كىتاپتارى تۇرىك تىلىندە جارىق كورگەنىن جەتكىزدى. 2021 جىلى جامبىلدىڭ مۇراسىن تانىتۋ جىلى ەكەنىن ايتقان ەلشى جامبىلدىڭ شىعارمالارىن قازاق حالقىنىڭ مادەني ەنتسيكلوپەدياسى جانە رۋحاني قازىناسى رەتىندە سيپاتتادى.
2021 جىلدىڭ بۇكىل تۇركى الەمى ءۇشىن ماڭىزدى مەرەيتويلاردى اتاپ وتەتىن جىل بولاتىنىن ەسكە سالعان ساپاربەك ۇلى ەڭ اۋەلى ەلىمىزدىڭ تاۋەلسىزدىگىنىڭ 30 جىلدىق مەرەيتويىنىڭ اتالىپ وتىلەتىنىن ايتتى. ەلشى تۇركيانىڭ قازاقستاننىڭ تاۋەلسىزدىگىن العاش مويىنداعان ەل بولعانىن اتاپ ءوتىپ, «وسىعان بايلانىستى تۇركيادا ءبىز كەڭ اۋقىمدى ءىس-شارالار وتكىزۋدى جوسپارلاپ وتىرمىز» دەدى. ەلشى تاۋەلسىزدىكتىڭ 30 جىلدىعىمەن قاتار, قازاقستان تاريحىنداعى بىرقاتار ماڭىزدى وقيعانىڭ جىلدىقتارى مەن بەلگىلى تۇلعالاردىڭ مەرەيتويلارىنىڭ اتالىپ وتەتىنىن مالىمدەدى.
القالى جيىندا ءسوز سويلەگەن حالىقارالىق تۇركى اكادەمياسىنىڭ پرەزيدەنتى دارحان قىدىرالى الەمدىك پاندەمياعا قاراماستان, اباي مەرەيتويىنىڭ تۇركيادا وتە اۋقىمدى تويلانۋىنىڭ تۇرىك حالقىنىڭ قازاقستانعا دەگەن ىقىلاسىنىڭ كورسەتكىشى ەكەنىن جەتكىزدى.
«فارابي, يۋنۋس ەمىرە, اباي جانە جامبىل – ءبىزدىڭ ورتاق قۇندىلىقتارىمىز», دەگەن تۇركى اكادەمياسىنىڭ باسشىسى وسى تۇعىرلى تۇلعالار ارقىلى تامىرلاس تۇركى الەمىنىڭ ىنتىماعى ارتىپ كەلە جاتقانىنا نازار اۋداردى.
2020 جىلدىڭ اباي, ءال-فارابي جانە ابىز تونىكوك جىلى رەتىندە اتاپ وتىلگەنىن ايتىپ وتكەن د.قىدىرالى وسى ورايدا جامبىلدىڭ باعزى تۇركىدەن تامىر تارتقان, تونىكوك, يوللىع –تەگىننەن باستاۋ الاتىن جىراۋلىق ءداستۇردىڭ سارىن-سارقىتى ەكەنىن ەسكە سالدى.
ەۋرازيا جازۋشىلار وداعىنىڭ توراعاسى ياكۋپ ومەروعلۋ اباي, فارابي جانە جامبىلعا ارنالعان ءىس-شارامەن ورايلاسىپ انكارادا بىلگە تونىكوك ەسكەرتكىشىنىڭ اشىلۋىن جاقسىلىققا جورىدى.
ءىس-شارادا ءسوز سويلەگەن تۇركسوي باس حاتشىسى دۇيسەن قاسەيىنوۆ اباي, فارابي جانە جامبىل قازاقتار ءۇشىن عانا ەمەس, بۇكىل تۇركى الەمى ءۇشىن ماڭىزدى قايراتكەرلەر سانالاتىنىنا توقتالدى. ءفارابيدىڭ مۋزىكا تۋرالى كىتابىنىڭ اراب تىلىنەن تۇرىك تىلىنە اۋدارىلىپ جاتقانىن ايتقان قاسەيىنوۆ شىعارمانىڭ جاقىندا وقىرماندارعا جول تارتاتىنىن جەتكىزدى.
قۇتتىقتاۋ سوزدەردەن كەيىن مىرزاتاي جولداسبەكوۆتىڭ «دالا ادەبيەتىنىڭ ۇلى اقىنى جامبىل» اتتى كىتابىنىڭ تۇرىك تىلىنە اۋدارىلعان نۇسقاسىنىڭ تۇساۋكەسەرى بولدى.
وسىدان كەيىن, 2020 جىلى اباي مەن ءفارابيدىڭ تۇركيادا تانىلۋىنا ۇلەس قوسقان عالىمدار, جۋرناليستتەر مەن مەملەكەتتىك قايراتكەرلەر قازاقستان پرەزيدەنتىنىڭ, حالىقارالىق تۇركى اكادەمياسىنىڭ, قازاقستان مادەنيەت جانە سپورت مينيسترلىگىنىڭ جانە قازاقستان ەلشىلىگىنىڭ العىس حاتتارى جانە مەدالدارىمەن ماراپاتتالدى.
اتاپ ايتقاندا, «ۇلتتىق كوزقاراس» جۋرنالىنىڭ باس رەداكتورى, Tۇركيا پارلامەنتى دەپۋتاتى مەتين گۇندوعدۋعا, TRT Avaz ارناسىنىڭ ۇيلەستىرۋشىسى سەدات ساعىركاياعا جانە پامۋككالە ۋنيۆەرسيتەتىنىڭ پروفەسسورى نەرگيز بيرايعا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ العىس حاتى تابىستالدى.
