سەناتورلار حالىقارالىق دەڭگەيدە قازاقستاننىڭ ۇلتتىق مۇددەسىن قورعاۋدى كۇشەيتەتىن زاڭ قابىلدادى

پارلامەنت • 25 اقپان، 2021

سەناتورلار حالىقارالىق دەڭگەيدە قازاقستاننىڭ ۇلتتىق مۇددەسىن قورعاۋدى كۇشەيتەتىن زاڭ قابىلدادى

11 رەت كورسەتىلدى

قازاقستاندا ەگەر حالىقارالىق شارتتاردىڭ وزگە قاتىسۋشىلارى ءوز مىندەتتەمەلەرىن ورىنداماعان جاعدايدا اتالعان كەلىسىمنىڭ نەمەسە ولاردىڭ جەكەلەگەن ەرەجەلەرىنىڭ ىسكە اسىرىلۋىن توقتاتۋ، سونداي-اق، جاۋاپ شارالارىن قابىلداۋ ءتارتىبى زاڭمەن بەلگىلەندى. بۇل نورمالار بۇگىن سەنات وتىرىسىندا دەپۋتاتتار قابىلداعان «قازاقستان رەسپۋبليكاسىنىڭ حالىقارالىق شارتتارى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋ ەنگىزۋ تۋرالى» زاڭدا جازىلعان، دەپ حابارلايدى Egemen.kz.

Marzhan Tileubekova

سەنات توراعاسى الداعى ۋاقىتتا بۇل زاڭ ەلىمىزدىڭ ۇلتتىق مۇددەلەرىن قورعاۋدى كۇشەيتۋگە ءوز ۇلەسىن قوساتىنىنا سەنىم ءبىلدىردى.

«بۇگىن قابىلدانعان زاڭ حالىقارالىق دەڭگەيدە ۇلتتىق مۇددەلەرىمىزدى قورعاۋعا قوسىمشا مۇمكىندىكتەر بەرەدى. بۇدان بىلاي، حالىقارالىق كەلىسىمنىڭ ەكىنشى تارابى ءوز مىندەتتەمەلەرىن ورىنداماعان نەمەسە تيىسىنشە ورىنداماعان جاعدايدا قازاقستان تاراپىنان جاۋاپ شارالارىن قابىلداۋعا جول اشىلادى. وسى ماقساتپەن قۇجاتتا حالىقارالىق شارتتاردىڭ نەمەسە ولاردىڭ جەكەلەگەن ەرەجەلەرىنىڭ ورىندالۋىن توقتاتا تۇرۋ تۋرالى نورمالار قاراستىرىلعان»، – دەدى ماۋلەن اشىمباەۆ.

سونىمەن قاتار سەناتورلار «قازاقستان رەسپۋبليكاسى مەن كورەيا رەسپۋبليكاسىنىڭ اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭدى قاراپ، قابىلدادى. وسى قۇجاتقا سايكەس ەندى مەملەكەتتەردىڭ ءبىر-بىرىنە سوتتالعانداردى بەرۋىنە مۇمكىندىك تۋادى. ول ءۇشىن جاسالعان ءىس-ارەكەت ەكى ەلدە دە قىلمىس رەتىندە تانىلۋعا ءتيىس جانە سوتتالعانداردى بەرۋگە قوس مەملەكەت تە كەلىسۋى قاجەت. ال سوتتالعان ازاماتتىڭ وزىنەن كەرى ورالۋدى راستايتىن جازباشا كەلىسىم بولۋى كەرەك. قازاقستان رەسپۋبليكاسىنان شارت ەرەجەلەرىن ىسكە اسىرۋشى ورتالىق ورگان رەتىندە باس پروكۋراتۋرا بەلگىلەندى.

سونداي-اق سەنات وتىرىسىندا دەپۋتاتتار «1993 جىلعى 22 قازانداعى قازاقستان رەسپۋبليكاسى مەن موڭعوليا اراسىنداعى ازاماتتىق جانە قىلمىستىق ىستەر جونىندەگى ءوزارا كومەك تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى دا قابىلدادى. بۇل قۇجاتتا ازاماتتىق جانە قىلمىستىق ءوندىرىس سالاسىندا قۇقىقتىق كومەك كورسەتۋ بويىنشا سوت جانە قۇقىق قورعاۋ ورگاندارىنىڭ ناقتى مىندەتتەرى كورسەتىلگەن.

ودان بولەك، پالاتانىڭ جالپى وتىرىسىندا بىرقاتار دەپۋتاتتىق ساۋال جولداندى. دەپۋتات مۇرات باقتيار ۇلى اشارشىلىق تاقىرىبىن جان-جاقتى زەرتتەۋ ماسەلەسىن كوتەرىپ، وسى باعىتتاعى جۇمىستاردى كۇشەيتۋ قاجەت ەكەنىن ايتتى. ال سەناتور سۇلتان دۇيسەمبينوۆ اگرارلىق سەكتوردى دامىتۋدىڭ نەگىزگى فاكتورلارىنىڭ ءبىرى سانالاتىن اۋىلشارۋاشىلىق عىلىمىن قولداۋ ماسەلەسىن ءسوز ەتتى. سەنات دەپۋتاتى ءلاززات سۇلەيمەن جوعارى ءبىلىمدى زاڭگەرلەر دايارلاۋعا قاتىستى تۇيتكىلدەردى قوزعاپ، وسى سالاداعى پروبلەمالاردى شەشۋ جولدارىن ۇسىندى. سەناتور دانا نۇرجىگىت قازاقستان حالقىنىڭ ۇلتتىق قۇندىلىقتارىن دارىپتەيتىن تەلەۆيزيالىق ونىمدەردى كوبەيتۋ كەرەكتىگىن ايتسا، دەپۋتات دينار نوكەتاەۆا الماتىداعى مەكتەپتەردىڭ بىرىنە قازاقستاننىڭ ەڭبەك سىڭىرگەن مۇعالىمى، سوتسياليستىك ەڭبەك ەرى، بيىل تۋعانىنا 100 جىل تولىپ وتىرعان عالىم، پەداگوگ رافيقا نۇرتازينانىڭ ەسىمىن بەرۋدى ۇسىندى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز