سپورت • 25 اقپان، 2021

كوك تۋدىڭ جەلبىرەگەنى...

213 رەت كورسەتىلدى

الاش جۇرتىنىڭ الەمدە اتوي سالعان چەمپيوندارى از ەمەس. «Egemen Qazaqstan» گازەتى اقپان ايىندا تاۋەلسىزدىك العالى 30 جىل ىشىندە بيىك تۇعىردان كورىنگەن ونداعان وليمپيادا، جۇزدەگەن الەم چەمپيونى مەن جۇلدەگەرىن وقىرمان نازارىنا ۇسىندى. ال وسىنداي تولاعاي تابىستاردىڭ ار جاعىندا شاكىرتتەرىن قىرانداي باپتاپ، الامانعا قوساتىن جۇزدەگەن باپكەردىڭ ەڭبەگى جاتقانى ءcوزسىز. سپورتشىلاردى جوعارى دەڭگەيدە باپتاعان جاتتىقتىرۋشىلاردىڭ ارقاسىندا حالىقارالىق جارىستاردا ەلدىڭ ءانۇرانى ورىندالىپ، كوك تۋدىڭ جەلبىرەيتىنى ءسوزسىز. سونداي-اق باپكەردەن بولەك تاۋەلسىزدىك العاننان باس­تاپ بۇگىنگى كۇنگە دەيىن سپورتتىڭ دامۋىنا ۇنەمى قولداۋ كورسەتەتىن، ەلباسى نۇرسۇلتان نازارباەۆتىڭ ەڭبەگىن ەرەكشە اتاپ كەتكەن ءجون. تۇڭعىش پرەزيدەنتتىڭ سپورتقا دەگەن قامقورلىعىنىڭ ارقاسىندا جەرلەستەرىمىز جاھاندىق سايىستاردا ولجا سالىپ، الەمدىك قاۋىمداستىق الدىندا قازاقستاننىڭ ابىرويى مەن مارتەبەسىن اسقاقتاتىپ كەلەدى.

  • باپكەر دەسە، الدىمەن ءابدىسالان نۇرماحانوۆتاي دارا تالىمگەر ەسكە تۇسەرى حاق. ءا.نۇرماحانوۆ 1993-1997 جىل­دارى بوكستان ۇلتتىق قۇرامانىڭ باس جات­تىقتىرۋشىسى قىز­مەتىن اتقاردى. قا­زاقستان قۇراماسى ءابدى­سالان اعامىزدىڭ باپكەرلىگىمەن دۇنيە ءجۇزى بويىنشا ۇزدىك ۇشتىكتىڭ قاتارىندا، ازيا قۇرلىعىندا №1 كوماندا بولدى.

1994 جىلى يراندا وتكەن ازيا چەمپيوناتىندا بولات ءجۇمادىلوۆ، بولات نيازىمبەتوۆ، نۇرجان سمانوۆ، قاناتبەك شاعاتاەۆ جانە اركادي توپاەۆ سىندى بەس بىردەي بوكسشى جەڭىمپاز اتاندى. سونىمەن قاتار تايلاندتا وتكەن الەم كۋبوگىندا دا اركادي توپاەۆ قارسىلاستارىنىڭ بارلىعىنان باسىم بولسا، قاناتبەك شاعاتاەۆ فينالعا دەيىن جەتتى. بولات نيازىمبەتوۆ پەن ۆيكتور شتورم جارتىلاي فينالدا ءسۇرىندى. 1995 جىلى سارى قۇرلىق بىرىنشىلىگىندە جەرلەستەرىمىز تاعى دا اتوي سالدى. ال تاش­كەنتتە وتكەن ازيا بىرىنشىلىگىندە بوكسشى جىگىتتەر التى بىردەي التىندى مويىن­دارىنا تاقتى: بولات ءجۇمادىلوۆ، باقتيار تىلەگەنوۆ، بولات نيازىمبەتوۆ، ەرماحان يبرايىموۆ، ۆاسيلي جيروۆ. 1995 جىلى جاھاندىق جارىستا دا ءا.نۇرما­حانوۆ باپتاعان سايىپقىراندار بولات ءجۇمادىلوۆ كۇمىس، ۆاسيلي جيروۆ قولا مەدالدى جەڭىپ الدى. بۇل جۇلدەلەر تاۋەلسىز قازاقستان سپورتشىلارىنىڭ رۋحىن كوتەرگەن ۇلكەن جەڭىستەردىڭ باس­تاۋى ەدى.

1996 جىلى اتلانتا وليمپياداسىندا بيىك مىنبەردەن كورىنگەن بوكسشىلار ۆاسيلي جيروۆ – التىن، بولات ءجۇمادىلوۆ – كۇمىس جانە بولات نيازىمبەتوۆ پەن ەرماحان يبرايىموۆ قولا مەدال جەڭىپ الدى. وسىلايشا، كۋبا مەن بولگاريا قۇرامالارىنان كەيىنگى ۇزدىك ۇشتىكتەن كورىنگەن ۇلتتىق قۇراما وزبەكستان، گرۋزيا، ارمەنيا سەكىلدى مەملەكەتتەردى ايتپاعاننىڭ وزىندە بازاسى مەن سپورتتىق الەۋەتى بىزدەن الدەقايدا مىقتى رەسەي مەن ۋكراينا ەلدەرىنىڭ ءوزىن ارتقا تاستادى.

  • 2017 جىلى الماتىدا وتكەن قىس­قى ۋنيۆەرسيادادان كەيىن شورت-ترەك­تەن قازاقستان قۇراماسىنىڭ باس جات­تىق­تىرۋشىسى مادىعالي قارسىبەكوۆتىڭ ەڭبەگى قالىڭ جۇرتقا ءمالىم بولدى. باس باپكەردىڭ ءتول شاكىرتتەرى – ابزال اجعا­ليەۆ، نۇربەرگەن جۇماعازيەۆ، ايدار بەكجانوۆتار الەمدىك سايىستاردا ولجا سالىپ ءجۇر. ا.اجعاليەۆ – شورت-ترەكتەن الەم كۋبوگىنىڭ جەڭىمپازى، قىسقى ازيادانىڭ قولا جۇلدەگەرى، دۇنيەجۇزىلىك ۋنيۆەرسيادانىڭ ەكى دۇركىن كۇمىس جۇلدەگەرى. ءدال وسى ابزال 2018 جىلى قىسقى وليمپيا ويىندارىنىڭ اشىلۋ سالتاناتىندا قازاقستاننىڭ مەملەكەتتىك تۋىن ۇستاپ شىقتى. ن.جۇماعازيەۆ تە وسال ەمەس. ونىڭ قورجىنىندا الەم كۋبوگىنىڭ ەكى التىن مەدالى، سارى قۇرلىقتىڭ قولا مەدالى، ۋنيۆەرسيادانىڭ قوس قولا مەدالى بار. سونداي-اق الەم كۋبوگىنىڭ ەكى دۇركىن قولا جۇلدەگەرى ايدار بەكجانوۆ، ازيا ويىندارىنىڭ قولا جۇلدەگەرى ارتۋر سۇلتانعاليەۆ، ازيا كۋبوگىنىڭ قولا جۇلدەگەرى اسلان داۋىموۆ سەكىلدى قازاق جىگىتتەرى حالىقارالىق ارەنادا ەل نامىسىن قورعاپ ءجۇر.

بەلگىلى سپورت ءجۋرناليسى قىدىربەك رىسبەكتىڭ «قازاقتىڭ 72 باپكەرى» كىتا­بىن­داعى دەرەكتەرگە سۇيەنسەك، 1988-1996 جىلدارى جانە 2006 جىلدان قازىرگى ۋاقىتقا دەيىن ۇلتتىق قۇرامانىڭ باس باپكەرى قىزمەتىندە جۇرگەن مادىعالي ابدىعالي ۇلى ءۇشىن مۇنداي جەتىستىك قۇراماعا وڭاي كەلگەن جوق. سول تۇستا سپورت اگەنتتىگىنىڭ باسشىسى داۋلەت تۇرلىحانوۆتىڭ ۇسىنىسىمەن الماتىدان ورالعا بەت العان باپكەر اۋەلى قالا مەكتەپتەرى مەن اۋلالاردى ارالاپ ءجۇرىپ، وزىنە شاكىرت ىزدەدى. كوشەگە حابارلاندىرۋ ءىلدى. سونداي تاباندىلىقتىڭ ارقاسىندا 5 مىڭداي بالانى سىناپ كورىپ، سونىڭ ىشىنەن 60-قا جۋىعىن شورت-ترەككە باۋلىپتى. سول الپىستىڭ ىشىنەن حالىقارالىق دودالاردا ولجا سالعان چەمپيوندار شىقتى.

  • قازاق بوكسىنىڭ جۇلدىزدى ءساتى تۇرسىنعالي ەدىلوۆتىڭ ەسىمىمەن بايلانىستى. سيدنەي وليمپياداسىندا قازاق بوكسشىلارى اتوي سالىپ، كوماندالىق ەسەپتە دۇنيە ءجۇزى بويىنشا ءۇشىنشى ورىندى يەلەندى. ۇلتتىق قۇرامانىڭ تىزگىنىن تۇرسىنعالي باپكەر ۇستاعان سول 1997-2001 جىلدارى قازاق بوكسى الەمدەگى ەڭ مىقتى قۇرامانىڭ بىرىنە اينالدى.

تۇرسىنعاليدىڭ تۇسىندا وعان دەيىن شارشى الاڭدا اتوي سالعان ءبىراز بوكس­شىلار رينگپەن قوش ايتىسقان-دى. ەندىگى جەردە ەدىلوۆكە سولاردىڭ ورنىن باسار مىقتى كوماندا جاساقتاۋ قاجەت ەدى. ول جاساقتاعان كوماندانىڭ مىقتىلىعى بانگكوكتا وتكەن ازيا ويىندارىندا ايقىن­دالدى. ەرماحان يبرايىموۆ، مۇح­تار­حان دىلدابەكوۆ، ۆياچەسلاۆ بۋربا وسى اتالمىش دودادا قارسىلاستارىنان باسىم ءتۇسىپ، ناتيجەسىندە ەدىلوۆتىڭ جىگىتتەرى 3 التىن، 1 كۇمىس، 1 قولا ەنشىلەدى.

قازاق سپورتىنىڭ تاريحىندا تۇڭعىش رەت ءتورت بىردەي بوكسشى – بولات ءجۇمادىلوۆ، بەكزات ساتتارحانوۆ، ەرماحان يبرايىموۆ جانە مۇحتارحان دىلدابەكوۆتىڭ وليمپيا ويىندارىنىڭ فينالىنا شىعاتىن كەزى دە قۇراما تىزگىنىن تۇرسىنعالي ۇستاعان تۇس ەدى. سيدنەي وليمپياداسىندا قازاق-كۋبا بوكسشىلارى ءبىر-بىرىنە ءۇش رەت قارسىلاس بولسا، سونىڭ ۇشەۋىندە دە ءبىزدىڭ جىگىتتەر باسىم ءتۇستى. ب.ساتتارحانوۆ پەن ە.يبرايىموۆ وليمپيادانىڭ التىن مەدالىن السا،  م.دىلدابەكوۆ پەن ب.ءجۇمادىلوۆ كۇمىس تۇعىردان كورىنىپ، ەل ابىرويىن اسىردى. بۇل – قازاق بوكسى بۇرىن-سوڭدى وليمپيا ويىندارىندا باعىندىرماعان بەلەس ەدى.

  • سپورتتىق گيمناستيكادان قازاق­تان شىققان ەڭ تانىمال جات­تىق­تىرۋشى ەدىگە جاروۆتىڭ ەڭبەگى ەرەن. 11 جاسىنان باستاپ الماتىدا سپورتتىق گيم­ناستيكامەن شۇعىلدانا باستاعان ەدىگە نۇرماحان ۇلىنىڭ العاشقى باپكەرى الەكساندر كاليش بولاتىن. كاليشتىڭ قولاستىندا جاتتىققان ەدىگە گيمناس­ت­شى رەتىندە بيىك بەلەستەردى باعىندىرا الماسا دا، باپكەر رەتىندە الەمدەگى مىقتىلاردىڭ ءبىرى بولدى. ونىڭ ءتول شاكىرتى ۆالەري ليۋكين سەۋل وليمپياداسىنىنىڭ ەكى دۇركىن جەڭىمپازى جانە ەكى دۇركىن كۇمىس جۇلدەگەرى اتانعانى وسىعان دالەل. نەگە ءتول شاكىرتى؟ سەبەبى، كسرو-نىڭ ەڭبەك سىڭىرگەن باپكەرى ەدىگە ءوزىنىڭ شاكىرتى ۆالەريدى 1977 جىلى اقتوبەدەن 11 جاسىندا الماتىعا الدىرىپ، تاربيەلەدى. كۇنىنە 6-7 ساعات تەر توگۋىنىڭ ارقاسىندا بىلىكتى باپكەردەن شىڭدالىپ شىققان ليۋكين ەكى مارتە الەم، بەس مارتە ەۋروپا چەم­پيونى اتاندى. الەمدە ەشكىم جاساماعان بىرنەشە ەلەمەنتتى دۇنيەگە اكەلدى. سول ادىستەردىڭ ءبىرى ءھام بىرەگەيى بەلدەمەدە (تۋرنيك) 360 گرادۋس بۇرىلىسپەن العا بۇگىلىپ جاسايتىن سالتو. بۇل ءادىستى ويلاپ تاپقان ەدىگە باپكەر ەدى. الماتى وبلىسى نارىنقول اۋىلىنىڭ تۋماسى 1990 جىلدان 2000 جىلعا دەيىن فرانتسيادا ەڭبەك ەتىپ، 2000 جىلدان بەرى كانادادا تۇرادى. فرانتسيادا باپتاعان شاكىرتى جيل ستابلو 1995 جىلى ەۋروپا چەمپيونى اتاعىن جەڭىپ السا، 1997 جىلى تاعى ءبىر شاكىرتى فرانتسيا چەمپيوناتىندا توپ جاردى.

2000 جىلى كاناداعا قونىس اۋدارعان ەدىگە باپكەردىڭ بارۋىمەن تۇرالاپ قالعان كانادا گيمناستيكاسى اياقتان تۇردى. 1999 جىلعى الەم بىرىنشىلىگىندە بار-جوعى 18-ورىنعا تۇراقتاعان كانادا، 2001 جىلى 12-ورىنعا، ال 2003 جىلى 5-ورىنعا تابان تىرەدى. 2004 جىلى افينادا وتكەن وليمپيا ويىندارىندا كانادالىق كايل شيفەلت الدىنا جان سالعان جوق. بۇگىنگى كۇنى ەدىگە باپكەر حالىقارالىق گيمناستيكا فەدەراتسياسى تەحنيكالىق كوميتەتىنىڭ مۇشەسى. كانادا تاريحىندا سپورتتىق گيمناستيكادان وليمپيادا چەمپيونىن دايىنداعان تۇڭعىش باپكەر.

  • ەسىمىن ەرەكشە اتاپ وتۋگە بولاتىن باپكەردىڭ ءبىرى – التاي تاناباەۆ. «قازاق­تىڭ 72 باپكەرى» كىتابىندا ايتىلعانداي، الدىمەن جاس بالۋانداردى جاتتىقتىرعان ا.تاناباەۆقا كەيىننەن ەر­كىن كۇرەستەن ۇلتتىق قۇراما سەنىپ تاپ­سىرىلدى.

2011 جىلى تۇركيادا وتكەن الەم چەم­پيو­ناتىنا بارعان قازاقستان قۇراما­سى ساپىندا بەس بىردەي قازاق بالۋا­نى بولدى. ال ولاردىڭ ەكەۋى – داۋلەت نياز­بەكوۆ پەن داۋرەن جۇماعازيەۆ قولا جۇلدەگەر اتاندى. بۇعان دەيىن ۇلتتىق قۇراما ساپىندا قازاق بالۋاندارىنىڭ كوپ بولماعانىن جانە 1997 جىلدان بەرى قازاق بالاسىنىڭ ەركىن كۇرەستەن الەمدىك دودانىڭ تۇعىرىنا شىقپاعانىن ەسكەرسەك، بۇل جەڭىستەردى تاريحي ەرلىك دەۋگە تۇرارلىق. تارتىپكە نىق، تالاپشىل تاناباەۆ بۇل جەڭىسكە توقمەيىلسىگەن جوق. كەيىننەن لوندون وليمپياداسىنىڭ قولا جۇلدەگەرى اتانعان اقجۇرەك تاڭاتاروۆتىڭ قارىم-قابىلەتىن دە تاني ءبىلدى. داعىستانداعى وقۋ-جاتتىعۋ جيىنىندا اقجۇرەكتىڭ قايراتىن بايقاپ، وليمپيا ويىندارىنا قوستى.

لوندون وليمپياداسىنىڭ قولا جۇلدەسى ءۇشىن كۇرەسكەن شاكىرتى داۋلەت نيازبەكوۆ قارسىلاسىنا ەسەسى كەتىپ، بەسىنشى ورىنعا تۇراقتادى. ال اقجۇرەك تاڭاتاروۆ پەن داۋلەت شابانباي ءدال وسىنداي مۇمكىندىگىن ءمۇلت جىبەرگەن جوق. اتلانتادا ماۋلەن مامىروۆ قولا مەدال ەنشىلەگەننەن كەيىن قازاقتىڭ ەركىن كۇرەس بالۋاندارى وليمپيادا جۇلدەسىن الماعان ەدى. وسىلايشا، ارادا 16 جىل وتكەننەن كەيىن كۇرەستەن وليمپيادا ويىندارىنىڭ قوس قولا جۇلدەسى قازاق بالۋاندارىنا بۇيىردى.

  • گرەك-ريم كۇرەسىنە قىزىعاتىندار اراسىندا تاڭات ساعىندىقوۆتى بىلمەيتىن جان جوق. قازاقستان ۇلتتىق قۇراما تىزگىنىن ءۇش مارتە ۇستاعان بىلىكتى مامان، قازاقتان شىققان تۇڭعىش الەم چەمپيونى باقتيار بايسەيىتوۆتىڭ باپكەرى. ودان بولەك، كسرو حالىقتارى سپارتاكياداسىنىڭ جەڭىمپازى ەسەنكەلدى باتىرعارين، ازيانىڭ قولا جۇلدەگەرى رۇستەم بايسەيىتوۆ سىندى شاكىرتتەرىنىڭ جەڭىسكە جەتۋىنە بىردەن-ءبىر سەبەپكەر بولعان جاتتىقتىرۋشى.

1992-1993 جىلدارى قۇراما تىزگىنىن العاش ۇستاعان تۇستا، ياعني 1993 جىلى باس باپكەردىڭ شاكىرتتەرى ازيا چەمپيوناتىندا جۇلدە سانى بويىنشا كوماندالىق ەسەپتە ءۇشىنشى ورىنعا شىقتى. 2006-2009 جىلدارى قۇراما تىزگىنىن ەكىنشى مارتە ۇستاعان كەزدە، شاكىرتتەرى حالىقارالىق ارەنادا اجەپتەۋىر ناتيجە كورسەتە باستادى. 2008 جىلعى بەيجىڭ وليمپياداسىندا نۇرباقىت تەڭىزباەۆ پەن اسەت مامبەتوۆ ۇزدىك ۇشتىكتەن كورىندى. اراعا جىل سالىپ ن.تەڭىزباەۆ الەمدىك دودادا قولا جۇلدەگەر اتاندى.

2012-2016 جىلدارى ۇلتتىق قۇراماعا ءۇشىنشى مارتە كەلگەن ساعىندىقوۆتىڭ شاكىرتتەرى الەمدە، سارى قۇرلىقتا اتوي سالدى. دوسجان قورتىقوۆ، المات كەبىس­باەۆ سىندى بالۋاندار الەم بىرىنشىلىگىنىڭ قولا مەدالىن مويىندارىنا ءىلدى. ال الەم چەمپيوناتىندا ۇزدىك ۇشتىكتەن كورىنگەن نۇرماحان تىناليەۆ ازيا ويىندارى مەن سا­رى قۇرلىق چەمپيوناتىندا الدىنا جان سالعان جوق. سونداي-اق 2014 جى­لى استانادا وتكەن ازيا چەمپيوناتىن­دا تاڭات ساعىندىقوۆتىڭ شاكىرتتەرى 2 ال­­تىن، 1 كۇمىس جانە 2 قولا مەدالمەن جال­­پى­­­كو­ماندالىق ەسەپتە ءبىرىنشى ورىنعا شىقتى.

  • بوكستان قازاقستان قۇراما كومان­داسىنىڭ باس باپكەرى قىزمەتىن توعىز جىل (2009-2018) اتقارعان مىرزاعالي ايتجانوۆ «الەمنىڭ ەڭ ۇزدىك باس باپ­كەرى» دەگەن اتاقتى ەكى رەت يەلەنگەن جالعىز باپكەر. ول قۇرامانى باسقارعان جىل­دارى قازاق بوكسشىلارى ازيا چەمپيوناتىنان – 15 التىن، 7 كۇمىس، 6 قولا، ازيا ويىندا­رى­نان – 8 التىن، 5 كۇمىس،
    2 قولا، الەم چەم­پيو­ناتىنان – 5 التىن،
    8 كۇمىس، 7 قولا جانە وليمپيا ويىندارى­نان – 2 التىن، 3 كۇمىس، 2 قولا مەدال جەڭىپ الدى.

الەم چەمپيوندارى ءبىرجان جاقى­پوۆ پەن قايرات ەراليەۆ، بەيجىڭ وليم­پياداسىنىڭ جانە الەم بىرىنشىلىگىنىڭ قولا جۇلدەگەرى ەركەبۇلان شىناليەۆ، سونداي-اق 2019 جىلعى الەم چەمپيو­ناتىنىڭ قولا جۇلدەگەرى جانە توكيو وليمپياداسىنىڭ جولداماسىنا يە بولعان ساكەن بيبوسىنوۆ سىندى شاكىرت­تەردى تاربيەلەگەن م.ايتجانوۆ وسىنداي جەتىستىكتىڭ بارلىعى ەل تاۋەلسىزدىگىنىڭ ارقاسىندا كەلگەنىن ايتادى: ء«بىزدىڭ جەتىستىكتەرىمىزدىڭ نەگىزى – ازاتتىقتىڭ ارقاسى، تاۋەلسىز ەل رەتىندە بۇگىندە بار­لىق سالادا ەشكىمگە جالتاقتاماي، ءوز قالاۋىمىزشا جۇمىس ىستەۋدەمىز. سونىڭ اياسىندا سپورتىمىزعا دا جوعارى دەڭگەي­دە كوڭىل بولىنۋدە. بۇگىندە مەملەكەت تارا­پىنان سپورتقا جاسالىپ جاتقان جاعدايعا كوڭىل تولادى. سوندىقتان، قازاق سپورتىنىڭ جوعارى ناتيجە كورسەتۋىنە مۇددەلى بولعان بارلىق باسشىلار مەن جاناشىرلارعا قاشاندا ريزامىز»، دەيدى الەمنىڭ ەكى دۇركىن ۇزدىك باپكەرى.

جوعارىدا ءسوز ەتكەن باپكەرلەر ۇزدىك­تەردىڭ ءبىر شوعىرى عانا. ايتپەسە، الەم، وليمپيادا چەمپيوندارى مەن جۇلدەگەرلەرىن باپتاعان نەبىر تالانتتى ماماندار ەلىمىزدە جەتەرلىك. مىسالى، بوكستان وليمپيادا جانە الەم چەمپيونى دانيار ەلەۋسىنوۆتىڭ اكەسى ءارى باپكەرى مارات ەلەۋسىنوۆ، باقتيار ار­تاەۆتاي وليمپيادا جەڭىمپازىن تار­بيەلەگەن نۇرلان اقۇرپەكوۆ، اتاقتى گەن­نادي گولوۆكيننىڭ باپكەرى، بۇگىندە بوكستان ۇلتتىق قۇرامانىڭ باس جاتتىق­تىرۋشىسى عالىم كەنجەباەۆ، وليم­پيادانىڭ ەكى دۇركىن كۇمىس جۇلدەگەرى ادىلبەك نيازىمبەتوۆ، الەم چەمپيوندارى ەردوس جاڭابەرگەنوۆ پەن بەكزات نۇرداۋلەتوۆتىڭ باپكەرى مارات جاقيەۆ سەكىلدى تاعى باسقا مامانداردى ءسوز ەتۋگە بولادى. سونداي-اق جەڭىل اتلە­تيكادان ءۇش وليمپيادادا ولجا سالعان، لوندون وليمپياداسىنىڭ چەمپيونى ولگا رىپاكوۆانىڭ اكەسى ءارى باپكەرى سەرگەي الەكسەەۆ، اۋىر اتلە­تيكادان بىرنەشە الەم جانە وليم­پيادا چەمپيوندارىن باپتاعان، ريو وليم­پياداسىنىڭ جەڭىمپازى نيجات راحي­موۆتىڭ باپكەرى الەكسەي ني، سۋ دوبىنان قازاقستان قۇراماسىن جاتتىقتىرىپ، ازيا ويىندارىنىڭ جەڭىمپازى بولعان اسقار ورازالينوۆ، جۇزۋدەن ريو وليم­پياداسىنىڭ چەمپيونى دميتري ءبالان­ديننىڭ باپكەرى الەكسەي كازاكوۆ، ۆولەيبولدان قازاقستان قىزدار قۇراماسىن جاتتىقتىرىپ، ازيادا ۇزدىكتەردىڭ تىزىمىنەن كورىنگەن باقىتجان بايتورەەۆ تە بىلىكتى ماماندار قاتارىندا. قىسقى وليم­­پيادانىڭ قولا جۇلدەگەرى دەنيس تەندى سوچي وليمپيداسىنا دايىنداعان فرەنك كەررولل، 2018 جىلعى پحەنچحان وليمپيادانىڭ قولا جۇلدەگەرى يۋليا گالىشەۆانىڭ جەكە باپكەرى ەلەنا كرۋگلىحينا سەكىلدى قىسقى سپورت تۇرلەرى بويىنشا دا مىقتى باپكەرلەر بار.

سوڭعى جاڭالىقتار

ۇقساس جاڭالىقتار